बच्पन के दृष्य समेटल गयर्वा बुडु खिस्सा सङ्ग्रह
चिनजान त माहा पुरान तर बातचित औसी ओ पुन्नी जस्त कभुकाल केल होय । बातचित घनक नैहुइल ओर्से हुइ सायद शेखर जी के बारेम मजासे नै बुझल रहु जब थारु मानक भाषा के चर्चा हुइ लागल त शेखर जी के लिखल थारु भाषम आर्तिकल बिभिन्न मिडिया म छापगैलन जत्रा फे छापगैल आर्टिकल एकठो फेन नै छुटाक पहरल रहु सुरुसुरुम बहुट कर्रा लाग थारु भाषाम लिखल नै पहर्ना बानि होख हुई रसरस सब सजिलो लाग लागल जब पहर्ना बानी परल त आब और आर्टिकल कहिया आइ कैख पुछ डारु । लिखाइ पहराइके बाट ठनिक गझिनक चललागल रह । एक दिन शेखर पुछल म्वार लिखल किताब पहर्ल बाटी कि नाइ । नै पहर्ल हुइटी त धनगढी आइबेर लानदेम कल तब पटा पैनु उहा किताब फेन लिख्थ कैख ।
कुछ दिन पाछ म्वार हाथम किताब आइल कामके ब्यस्तताले पहर नै पैल रहु मनम खुल्दुली लग्टी रह कब समय मिली टे पहरम कैख । एक दिन फुर्सद मिलख पहर बैठनु किताब टे एक बैठावन म ओरैनु मने एकचो पहरक हौस नै बटाइल । फेन जाके पहर्नु, गयर्वा बुडु खिस्सा सङ्ग्रह छुटी रलसेफे बहुत्त बाट समेटल बा । इ खिस्सा सङग्रह म रलक सक्कु कथा एकठो पहिचान बोकल बा । थारु समुदायम पहिलसे भोग्टी आइल आर्थिक सामाजिक समस्या हे बरा मज्जासे उथ्थान कैगिल बा । बहुट रोचक बैराग लग्टीक सिन फेन बा धेर ठाउँ म ।
गयर्वा बुडु कथा म मैफे कौनो ठाउँम आपन ह भेटैनु हम्र छुटी छुटी रहल ब्याला कभुकाल गैया चराय गैलक दिनके याद आईल । इ कथा म सब्से मन छुलक सिन हो गयर्वा बुदुक लभ पर्लक बाट । न ठुन्यार से उठ्ठान कैगिल बाट । ढिर ढिर मैया बहर्टी गैलन गयर्वा बुडु ह डेख्टी की मुसुक्कसे हाँसी हुँ आखीसे सान मारि हुँ उ ध्यार रात बुडुक कोनाम सुट्ली हुँ डुनुजे उक्वार भिर्क कक्वा बर्झाठ । ओजरिया रात हो या अन्ढरिया रात उ अग्घ्रान ओहर्ल ठँ्याचा ठँ्याचा रटरानीक फुला झोटिम गोस्क धनसरोक पाछ आइ । दुनुजहन के उ सच्चा मैया धेर दिन मौलाइ नैपैलन बिचारा गयर्वा बुडु गरीब हुइलक कारनसे आफन मन पराइल मनैय हे गुमैल बाट ।
ओस्तहक छारा लर्कन के सघरेन लर्क रथ कथ इ बाट जात्टीक हो छुटीमसे छेग्री भेरी सँग सँग चरैलक बिहानसे लेक साझ सम्म सँग खेल्ना सघ¥या एक्कासी छोर्क जाईबेरीक पिडा सघरियनके कत्रा धेर मैया रहत कना इ कथा म लिखल बा ।
म्वार भाग जब मै म्वार भाग कथा बित्खोर्नु ट आगम काटा फुलगैल हमार नेपाली समाज म रलक जल्डोबल्डो घटना हो नेपाल म बहर्टी रलक बेरोजगारी देखासिखीके प्रबिधिके हाबी परिवार के खुशिके लाग आफन जिउ ज्यान के प्रवाहा नै कर्खे विदेश गैलक हजारौ युवा हुकनके वास्तबिक घटना हो । धन सम्पती कमैना आशम घरबार उजर गैलक बरा मार्मिक कथा बा ।
बटिय अत्वारी म मोर डाई मामक घरक अग्रासन के खुब बटिया हेरठ बटिया हेरठ हेरठ कभु ट सनझ्या होजाइन बटिया के बरा भारी अर्थ बाटिस कना बाट तब पता पैनु । ओस्टक हमार थारु समुदायम प्रद्यास जैना चलन अनुसार सल्गाउक मनै जब गाउभर सिधा मिलाईठ । तिना जार त्याल न्वान चाउर उ घरसे उ घर करिट त गाउँम औरमेरिक चैनार लाग जब प्रद्यास जाइकलाग घरमसे निक्रलागठ ट गल्ली भर गरागर पट्निक पहाट लह्रिया न थुन्यार देख जाए । जब लह्रिया नेग भिर टे छुटी छुटी लर्का आफन आफन बाबा के लह्रिया छुअ जइना ओ इ लान दिहस उ लानदिहस कहिट ।
बर्वत्वा म बन्कस कत्ला कहल जसिन सजिलो काँहा रही एक जन ग्वारा रपटके गिरक मुगैल जब प्रद्याससे सक्कुनके बाबान आइबेर बगाल म खुब आफन बाबह चिटाइट नै देखट ओकर बाबा ट इ दुनिया छोरसेकल रठीस काहासे आफन बाबा ह देखि उ बगालम । बाबसे लान मगल पहुरा पहुरा मे सिमिट हुइल बा ।
ठण्डा बरफ सायद पहिल हमार पालाम एक रुपिया के एकथो बरफ आए उ ब्याला एक रुपिया फेन नि जुहाए जब कि आब कम्तीम पचास रुपिया से तरक बरफ फेन माहा सस्ता कहबे । बरफ खाएक लाग पैसा नै होक मसरी डाइबेर भैस मस्री मस्री थसथस ह्यागट । उह ग्वाबर छित्वाभर उठाक अगैयक लड्डेम धोए गैलक दिन आखिक आघ देख्नु गोहँु बित्वार गैलक, बरफ किनख खोरियाम पानी बनख पिलक बचा बचा बरफ चाटबेर पलिस्टरके झबली भिजैलक प्वाक प्वाक बस्ती की तथ्यक भात छोर्क डौउरलक बाल्यकाल ह खित्खोरल बा ।
काला पहिल गाउँ गाउँ म खुब कलन्डर आइडठ उप्पर कुर्टी ओ टर पेटीकोट अस फर्र फेक्करल पैजामा हुइन कि का हुइन घल्ल रहिट । चुरयिा मदर ता¥या तिक्ली लुगा लत्ता अनि कुइ साप लेक कभु ग्वारा बठैला त्याल काका हो काका मनैक दिमाग चट्टना काम टे के सेकी । हुकन से दिनभर गाउँ म रहत साझ के बोक नै सेक्ना गोहँ मसरी लेख जाइत इह मार कहल हुहि पहिलक मनै मुअल बाजी जित्ती नेपाली हुकन ठक्ठ ओ हमार थारु कत्रा सोझ रलह कना बात फे प्रस्त बुझ सेक्जाइ काला कथा म से काजे की उ कलन्डरन फे ज्या डिहबेर ढक्या भर भर डेना ।
सिरुवा आर्थिक चपेटाम परक आफन जाहान पालन पोषण के लाग जिम्डरुवक आडम वर्षौ बरस जिम्डरुवक बनाडेलक सिरुवा म बैठक जिन्गी गुजर्लक जिम्डरुवक सौखी तिर नैसेक पुस्तौ पुस्ता सिरुवा म बैठलक बरा दर्दनाक कथा बा सिरुवा कथा म बुधनी के भुमिका जात मन परल आफन गोस्यक समस्या देख एक थो गोन्या ओ सिक्रल सिक्रल माहा पुरान गटिया ले कैयो वरस कत्ली जिन्गीक सफरम आफन गोस्यह कसिक साथ डिहे परट कथा बाट मज्जासे उठाइल बा इ सिरुवा कथा म ।
डलडल राजदरबार हत्याकाण्ड पाछ जनयुद्ध के ब्यालम थारु समुदाय ह हेर्ना नजरिया फरक रहिन सक्कु थारुन माहोबादी के बिल्ला भिराक सयौ जहन प्रहरी प्रशासन से यातना पैल कयोजन आभिन फे बेपत्ता बात हुकनके कनौ खोजिनिती नै हुइतन जस्तहक रध्वा काकुक मुअल जियल पता नै हो छोटह म बाबा गुमैलक छावा आब भारी हुइल पाछ आफन अस्तिव खोजत ।
बाबक चिठ्ठी आफन लर्का पर्कन कत्रा मैया कर्थ कना संदेश दिह खोजल बा छावा मजासे पहर्क मजा काम करी त हमार जसिन दुख कर नैपरहिस कैख अप्न नैखा नैलगाक छावह शहर म पहर पठैठ छावा भन्याको शहर के रमझम म फस्क रुपिया पैसा उरैती रलक सारा सम्पती बेचक फेन पैसा नैपुगा पाइलग्ल ट अन्तिम विचारा स्वाज बाबा आफन छावसे माफी मागल मार्मिक चिठ्ठी ।
इ गयर्वा बडु खिस्सा सङग्रह म धेर बात समेटल बा भाषा धर्म संस्कार थारु समुदायम पुस्तौ से भोक्ती आइल समस्या हमार पुस्ता हुक्र बेल्सलक शब्द हमार वाल्यकालमक भोगाइ थारु समुदायम घटल घटना के सहज तरिकाले उथ्थान कैगिल बा थारु समुदायके इतिहास म हेर्ना हो कलसे एकचो गयर्वा बुडु पहर्ना जरुरी बा गयर्वा बुडु थारु समुदायके पुरान इतिहास के पोकरी हो कभुकाल अक्कल झुकल सुनगैलक अघत्यक खिस्सा आज आफन हाथम धैक पहर्ना मौका मिलल याकर लाग ढक्या भरके धन्यबाद डेहम कथाकार शेखर दहिद हे । आघक दिनम आकुर ढेर अस्त अस्त इतिहास समेटल किताब पहर मिले कना शुभकामना फेन बा ।
