भुरामे माघ लहान मेला उसरल
सागर कुस्मी
१ माघ, बेलौरी। थारु कल्याणकारी सभा वडा कार्यसमिती भुरा के आयोजनामे बेलौरी नगरपालिका १० भुरा गाउँ मे माघ लहान मेला कार्यक्रम उस्रल बा । थारु भेष भुसा ओ सस्कृती हमार थारुन्के पहिचान, माघ लहान परम्परा बचैना हमार अभियान कना मुल नारा के साथ कार्यक्रम हुइल रहे ।
कार्यक्रम के बर्का पहुना रहल बेलौरी नगरपालिका के उप प्रमुख चित्रा कुमारी चौधरी थारुन के बर्का टिहुवार माघ हे अपन शक्ति अनुसार , चलन अनुसार सभ्य तरिका से मनैले से हमार सक्कुहुन के सद्भाव सम्बन्ध मजा हुइना बतैली । उहाँ आघे कहली इ ठाउँ मे हरेक साल मेला कार्यक्रम कैलेसे किल हमार इ ठाउँ के बिकास हुइना बटैलि ।
बिशिस्ट पहुना थारु कल्याणकारी सभा के केन्द्रिय सदस्य जिवलाल चौधरी पुरान गिटबास हे निरन्तर डेखैटि जाब कलेसे हमार पहिचान ओ सरक्षन हुइना ओ सिकरि कुन्दा टलुवा हे प्राकृतिक सिम्सार क्षेत्र बनैना मे जोड डेलै । ओस्टके थाकस जिल्ला सचिव रेसम चौधरी, थाकस नगर अध्यक्ष खडक चौधरी , १० नं वडा अध्यक्ष हरिलाल चौधरी , भलमन्सा नगर सचिब बिक्रम बखरिया, बेलडाँडि नगर पालिका ३ नं वडा अध्यक्ष दुर्गा प्रसाद चौधरी, रामनगर सामुदायिक बन के कोषाध्यक्ष दिपा चौधरी , बेलौरि के १ ओ २ नं वडा सचिव लेखकराम चौधरी , लगायत मन्तव्य डेले रहिट ।
कार्यक्रम मे शिवनगर, बाराजला, भुरा , भुरा गौरि, कलकत्ता के मघौटा नाच फेन डेखागैल रहे कलेसे राना होरि नाच फेन देखागैल रहे । ओस्टके गजलकार सागर कुस्मी गजल ओ माँगर गाके कार्यक्रम चम्पन बनैले रहिट ।
पुस ३० गते नाच गान ओ रात भर ढमार गित गाके मनागैल रहे । थारु कल्याण कल्याणकारी सभा १० वडा कार्य समिती के सभापती सोमलाल चौधरी के सभापति हुइल कार्यक्रम संचालन युवा गजलकार मोहन चौधरी कैले रहिट ।
