बेनौलीमे माघी मेलाके तयारी सुरु
कैलाली, १२ पुस । गैल बरष जस्ते यी बरष फेन कैलालीके कैलारी गाउँपालिका–६ बेनौलीस्थित अपरम्पार तपस्वी बाबा मन्दिर परिसरमे लग्ना माघी मेलाके तयारी सुरु हुइल बा ।
आदिवासी थारू समुदायके लौव बरस माघीके अवसरमे बेनौलीस्थित यूवा जनज्योति क्लवके आयोजनामे लग्ना उ मेलाके तयारी सुरु हुइल हो । यहेबीच मेला आयोजनाके लाग टमान तयारी समिति गठन करगिल बा । अरविन चौधरीके अध्यक्षतामे सात सदस्यीय मूल आयोजक समिति गठन करगिल बा । जेकर सचिवमे चुनीलाल चौधरी, कोषाध्यक्षमे भुमी देवी चौधरी, सदस्यमे रिता महतो, लवरी देवी चौधरी, खगेन्द्र चौधरी ओ सीताराम चौधरी रहल बाटै ।
ओस्टके माओवादी केन्द्रके नेता अनिल चौधरीके संयोजकत्वमे विवाद व्यवस्थापन समिति फेन गठन करगिल बा । जेकर सदस्यमे कैलाली गाउँपालिका–६ के वडा अध्यक्ष प्रेम चौधरी, स्थानीय बुद्धिजीवी मेघनाथ चौधरी, राजाराम महतो, विक्रम चौधरी, छेदालाल चौधरी, स्थानीय शिक्षक रामकृष्ण महतोलगायत रहल बाटै ।
माघ १ गतेसे ५ गतेसम लग्ना उ मेला तयारी स्वरुप मन्दिर परिसरमे सरसफाईके काम संगे मन्दिरके रंगरोगन फेन हुइटी रहल जनागिल बा । मेला व्यवस्थापन समिति अध्यक्ष अरविन चौधरी दर्शनार्थी ओ मेला आगन्तुकहुकनके सेवाहे मध्येनजर करके मन्दिर परिसरमे खानेपानी नल्का बनैना काम फेन सुरु हुइल जानकारी डेलै ।
आयोजक क्लबके अध्यक्ष निर्मल चौधरीके अनुसार गैल बरससे मेला मन्दिरसे करिब दुई सय मिटर पुरुवके खाली ठाउँमे मेला लग्टी आइल बा । धार्मिक क्षेत्रमे हुइना फोहर ओ वनजंगलहे असर हु्इटी रहल मध्येनजर करके ठाउँ परिवर्तन करल उहाँ जानकारी डेलै ।
जिल्लास्थित धार्मिक तिर्थस्थलमध्ये अपम्पार तवस्वी बाबा मन्दिरके महत्व फेन धिउर रहल बा । यी मन्दिरके धार्मिक महत्व ओ ऐतिहासिक पक्ष फेन बहुट बल्गर मानजाइठ । जौनकारण यी मन्दिर धार्मिक आस्थाके केन्द्रविन्दु फेन बन्न सफल हुइल स्थानीयहुकनके कहाई बा ।
स्थानीयहुकनके अनुसार मन्दिरमे माघी लहानके दिन नेपाली ओ भारतीय दर्शनार्थीहुकनके धिउर जमघट रहटी आइल बा ।
बेनौलीके स्थानीय बुद्धिजिवि रामकुमार महतो बि.स. २०२९ सालमे मन्दिरके स्थापना हुइल जानकारी देलै । उहाँ बि.स. २०१६ सालमे लालबोझिमे मलवारा करमदेऊ फलहारी पुजारीके दर्शन करे गैल बेला पुजारीसे हालके मन्दिर रहल स्थानमे एक जाने तपस्पी बाबा तपस्या करटी–करटी अलोक हुइल अनुसार उ स्थानमे जाके दर्शन करलपाछे अप्नेहुक्रे मन्दिरके स्थापना करल बटैलै । हाल फेन मन्दिरके एक पश्चिम साइडमे उ तपस्वीके गारल चिम्टा रहल बा ।
आजसे करिब ६५/७० बरस आघे फकिर सिंह थारू वनुवामे काठी करे गैल बेला कुह्रारसे काठीहे काटेबर कुह्रार भुठ हुइल बेला ढुंगा खोजेबर शिवलिंग पाइल फेन स्थानीयहुकनके दाबी बा । उ ढुंगा मानके उखारेबेर उखारे नैसेकलपाछे फकिर सिंह थारू गाउँक मनैन बलाके नानेबर शिबलिंग हेराइल कारण फेन स्थानीयहुक्रे उ मन्दिर शक्तिशालि रहल जनागिल बा
