वाम गठबन्धनसे कैलालीमे उम्मेदवारके टुंगो, प्रतिनिधि सभामे तीन सित एमाले, दुई माओवादी
धनगढी, १४ कात्तिक । कुछ दिन आघे कैलाली जिल्लामे सिट बाँडफाँड करल नेकपा एमाले–माओवादी केन्द्रके वाम गठबन्धन उम्मेदवारके नाउ फेन टुंगो लगैले बा ।
एमाले केन्द्रीय सदस्य तथा पूर्व सभासद नारदमुनी रानाके अनुसार प्रतिनिधि सभा सदस्य निर्वाचन प्रत्यक्ष ओहोर कैलाली निर्वाचन क्षेत्र नम्बर १ मे गरिमा शाह, २ नम्बर क्षेत्रमे एमालेके झपट रावल, ३ नम्बर क्षेत्रमे माओवादी केन्द्रके पूर्व कृषि मन्त्री गौरीशंकर थारु चयन हुइल बाटै ।
ओस्टके, ४ क्षेत्रमे माओवादी केन्द्रके पोलिट ब्यूरो सदस्य लेखराज भट्ट चयन हुइल बाटै । कलेसे निर्वाचन क्षेत्र नम्बर ५ से एमालेके पूर्व सभासद नारदमुनि राना चयन हुइल जनागिल बा ।
प्रदेश सभा सदस्य निर्वाचनके लाग वाम गठबन्धनसे क्षेत्र नम्बर १ के क मे माओवादी, ख मे एमाले, क्षेत्र नम्बर २ के क मे एमाले, ख मे माओवादी, क्षेत्र नम्बर ३ के क मे माओवादी, ख मे एमाले, क्षेत्र नम्बर ४ के क ओ ख मे एमाले ओ क्षेत्र नम्बर ५ के क मे एमाले ओ ख मे माओवादीके भागमे परल एमाले नेता राना जानकारी डेलै ।
मने उम्मेदवारहुकनके नाउ भर टुंगो नैलागल जनागिल बा । यहेबीच नेपाली काँग्रेस ओ लोकतान्त्रिक फोरमबीच बनल लोकतान्त्रिक गठबन्धन फेन उम्मेदवार छनौटहे तीव्रता डेले बा ।
प्रतिनिधि सदस्य निर्वाचनके पत्यक्षओहोर निर्वाचन क्षेत्र नम्बर १ से सांसद बुद्धसागर चौधरी, ईश्वरी न्यौपाने, जनक चौधरी आकांक्षी रहल बाटै । मने बृद्धिसार चौधरीके प्रबल सम्भावना रहल जनागिल बा ।
काँग्रेस नेता तथा साँसद बुद्धिसागर चौधरीके अनुसार निर्वाचन क्षेत्र नम्बर २ मे कमल शाह, विजय स्वाँर ओ हेम रावलके नाउ चर्चामे बा । मने कमल शाहके ढिउर सम्भावना रहल सांसद चौधरी बटैलै ।
ओस्टके निर्वाच क्षेत्र नम्बर ३ से रामजनम चौधरी, क्षेत्र नम्बर ४ से सुनिलकुमार भण्डारी ओ ५ नम्बर क्षेत्रसे आरजु राणा देउवाहे चयन करल जनागिल बा । मने प्रदेश सभाके लाग उम्मेदवारके विषयमे छलफल हुइना बाँकी रहल नेपाली काँग्रेस कैलाली जनैले बा ।
