थारु क्रान्तिकारी
सुरज थारु, कैलाली
उ निशा, उ जमिन्दारी, उ अन्धकार ।
निरंकुशता नैसहम
अत्याचार नैसहम
परिबर्तनके लाग लड्तीरहत
थारु क्रान्तिकारी ।।
झुठके खेती नैकरत ।
किसान, कुल्लीज्यामी, मिस्तरी मजदुर
रिक्साचालक ऊ
थारु देश निर्माणकारी
परिबर्तनके लाग लड्तीरहत
थारु क्रान्तिकारी ।।
मातृभाषा बिसराइल नै हो ।
लेहगाचोली , डेलुवाफेरुवा, दंगहादेउखरिया
संस्कृति परम्परा बा
थारु सस्ंकृति सरंक्षणकारी
परिबर्तनके लाग लड्तीरहत
थारु क्रान्तिकारी ।।
उचनिच नैहेरत ।
साथीसंगी, मायापिरिम, विहेबारी
स्वतन्त्र निजी सम्बन्ध बा
थारु अग्रगामी
परिबर्तनके लाग लड्तीरहत
थारु क्रान्तिकारी ।।
नाकछालाके घमण्ड कहा रु
माश खइना साकाहारी, सोनपानी छिट्ना ब्राहहमणबाद
इमान नै ब्रहामनत्वको परमाण बा
थारु दुरुतगामी
परिबर्तनके लाग लड्तीरहत
थारु क्रान्तिकारी ।।
छुवाछुत नैमानत, छाउपडी नैजानथ ।
मेलमिलाप, सहअस्तित्व ओ रीतिरिवाज
अनेकतामे एकताके बास बा
थारु समाजबादी
परिबर्तनके लाग लड्तीरहत
थारु क्रान्तिकारी ।।
निरंकुशता नैसहत ।
रगत देहल, लोकतन्त्र गणतन्त्र लेहल
सपना देखत छोपत
थारु परीबर्तनकारी
परिबर्तनके लाग लड्तीरहत
थारु क्रान्तिकारी ।।
