कैलाली–३ मे दुई पुर्व मन्त्रीहुकनके भिडन्त
धनगढी, १६ कार्तिक । कैलालीके थारु बाहुल्य निर्वाचन क्षेत्र नम्बर ३ मे दुई पूर्व मन्त्रीहुकनके कडा चुनावी प्रतिश्प्रर्धा हुइना हुइल बा ।
नेकपा एमाले–माओवादी केन्द्रके वाम गठबन्धनसे पूर्व कृषि मन्त्री गौरीशंकर चौधरी ओ काँग्रेसके ओहोरसे पूर्व स्वास्थ्य मन्त्री रामजनम चौधरीबीच कडा चुनावी प्रतिश्पर्धा हुइना डेखगिल हो । उ दुई पूर्वमन्त्री चुनावी कार्यक्रमहे तिव्रता डेले बाटै ।
बुधके रोज सञ्चारकर्मीहुकनसे बाचचित करटी माओवादी केन्द्रके नेता एंव पूर्व कृषि मन्त्री गौरीशंकर चौधरी अप्ने मन्त्री रहल छोट अवधीमे करल कामके आमजनताहुक्रे मूल्यांकन करल ओ आमजनताहुकनके माग अनुसार अप्ने उम्मेवारी डेहल बटैलै ।
उहाँ आघे कहलै–‘गोहुँ सुपर जोन, माछा ब्लक, तटबन्धन निर्माण, रसायनिक मलके मोल घटैना, हसुलियामे तरकारी संकलन केन्द्र स्थापना, पहलमानपुर ओ अत्तरियामे कोल्ड स्टोर स्थापनाके सुरुवात, जिल्लाके चार ठाउँमे अर्टिजन बोरिङ निर्माणके थालनी, पहलमानपुरमे पोष्ट हर्वेष्ट सेन्टर ओ अर्गनिक मल उत्पादन केन्द्रके स्थापनालगायत टमान विकास निर्माणके कामके सुरुवात मोर पहलमे हुइल बा । जिल्लाके पाछे परल क्षेत्र नम्बर ३ के वास्तविक विकास ओ आधुनिकीकरणके लाग मोर उम्मेदवारी हो ।’
ओस्टके उहाँ संविधान निर्माण अप्नेहुकनके पालामे जारी हुइलओरसे अप्नेहुक्रे चुनाव जिट्लेसे किल सहि कार्यान्वयन हुइना फेन उहाँके दाबी बा । वाम एकता समयके माग रहल बटैटी उहाँ वाम एकतासे किल देशके मुहार फेर्ना फेन पूर्व कृषि मन्त्री चौधरीके कहाई बा ।
उहाँ आपन प्रतिद्वन्द्वी रामजनम चौधरीहे पर्यटक उम्मेवारके सज्ञा फेन डेलै । साथै पटक–पटक मन्त्री बन्ना संगे ढिउर समय सत्तामे रहलेसे फेन जनचाहना अनुसार काम नैकरलओरसे जिट्न कौनो आधार नैरल आरोप लगैलै ।
उहाँ आघे थप्लै–‘उहाँ पहिलेसे कैलालीके निर्वाचन क्षेत्र नम्बर १ से चुनाव लड्टी आइल रहिट, उहाँ क्षेत्र नम्बर ३ मे टुरिष्टके रुपमे उम्मेदवारी डेले बाटै ।’
ओस्टके डोसर उम्मेदवार तथा पूर्व स्वास्थ्य मन्त्री रामजनम चौधरी लोकतन्त्रके जग बल्गर बनाइक लाग ओ मुलुकमे स्थायी शान्ति ओ विकासके लाग अप्ने उम्मेवारी डेहल बटैलै । उहाँ फेन अप्ने मन्त्री रहल बेला स्वास्थ्यके क्षेत्रमे ढिउर काम करल दाबी कर्लै । पूर्व स्वास्थ्य मन्त्री रामजनम चौधरी नेपाल लोकतान्त्रिक फोरम ओ काँग्रेसबीच एकीकरण हुइलपाछे काँग्रेससे उम्मेदवारी डेहल हुइट ।
कैलाली निर्वाचन क्षेत्र ३ अन्तरगत पर्ना कैलारी गाउँपालिका, घोडाघोडी नरपालिका, भजनी नगरपालिकामे स्थानीय तह निर्वाचनमे माओवादी केन्द्र ओ नेकपा एमालेके उम्मेदवारहुक्रे जीत हासिल कर्ले बाटै । जौन हिसाबसे फेन वामगठबन्धनहे उ क्षेत्रमे सहजता रहल डेखजाइठ ।
करिब डेड लाख जनसंख्या रहल निर्वाचन क्षेत्र नम्बर ३ मे करिब ६० हजारसे ढिउर मतदाता रहल बाटै । जौनमध्ये करिब ८५ प्रतिशत थारु बाहुल्य क्षेत्र हो ।
