कमैया मुक्ति दिवसको अवसरमा कैलालीका स्थानीय तहले दिए सार्वजनिक बिदा
धनगढी । कमैया मुक्ति दिवसको अवसरमा कैलाली जिल्लास्थित स्थानीय तहहरूले बुधबार सार्वजनिक बिदा दिएका छन् । २४ औँ कमैया मुक्ति दिवसको अवसरमा थारु बाहुल क्षेत्रका स्थानीय तहहरूले सार्वजनिक बिदा दिएका हुन् ।
कैलालीको कैलारी गाउँपालिका, भजनी नगरपालिका, टीकापुर नगरपालिका, जोशीपुर गाउँपालिका, जानकी गाउँपालिकालगायत पालिकाहरूले छुट्टा छुट्टै सूचना जारी गर्दै सार्वजनिक बिदा दिएका छन् ।
कैलालीको जानकी गाउँपालिकाका अध्यक्ष गणेश चौधरीले कमैया रुपी दासताको जीवनबाट मुक्त भएको दिनको रूपमा कमैया मुक्ति दिवस भएको हुँदा पालिकास्तरमा सार्वजनिक बिदा दिएको बताए ।
पश्चिम तराइका कैलाली, कञ्चनपुर, दाङ, बाँके, बर्दिया जिल्लामा एकताका जमिनदारहरूका घरमा बाँधुवा मजदुरको रूपमा कमैया बस्ने गरिन्थ्यो । राज्यले २०५७ साउन २ गते कमैया मुक्तिको घोषणा गर्यो । ३२ हजार ५०९ कमैयाहरू मुक्त भए । बुधबार दिवसको अवसरमा पालिका स्तरमा भेला, र्याली, अन्तरक्रिया कार्यक्रम गरि दिवस मनाईरहेका छन् ।
