अट्वारी पर्व मनाउन कैलारी गाउँपालिकाले दियो दुई दिन स्थानीय बिदा
धनगढी, २८ भदौ । पश्चिम नेपालका थारू समुदायले मनाउँदै आएको पर्व अट्वारमा कैलारी गाउँपालिकाले दूई दिन स्थानीय विदा दिएको छ । थारु समुदायको सांस्कृतिक तथा सामाजिक पर्वको रुपमा रहेको अँट्वारी पर्व यस वर्ष भदौ ३१ गते परेको छ ।
हरेक वर्ष कृष्ण जन्माष्टमीपछिको दोस्रो साताको आइतबार तथा कुशेऔंसी पछिको पहिलो आइतबारका दिन अँट्वारी पर्व मनाइन्छ ।
अट्वारी पर्व कुशे औंसी पछिको पहिलो आइतबार र भाद्र शुक्ल पक्षको पहिलो आइतबार भदौ ३१ गते परेकोले उक्त दिन थारु समुदायको अँट्वारी पर्व परेको थारु अगुवाहरु बताउछन् ।
अँट्वारी मुलतः थारु समुदायका पुरुषले मनाउने पर्व हो । यो पर्वमा पुरुहरुले आफ्नो दिदी बहिनीको दीर्घायूको कामना गर्दछन् । कैलाली, कञ्चनपुर, बर्दिया र दाङ जिल्लाका थारु समुदायले पुस्तौंदेखि अँट्वारी पर्व मनाउदै आईरहेका छन् ।
अँट्वारी पुजामा अण्डीक रोटी, काँक्रो, दही, केरा, बेलौटीलगायतका अग्रासन झिकेर पूजा गरिन्छ । त्यसको भोलिपल्ट बिहान पाँच अथवा सात प्रकारका गेडागुडीयुक्त तरकारी र भातको फरहार गरिन्छ ।
फरहारपछि आफ्ना विवाहित चेलीबेटीलाई अग्रासन दिन जाने चलन रहेको छ। अँट्वारी माइतीले आफ्ना चेलीबेटीलाई सम्मान दिने तथा दाजुभाई र दिदीबहिनीबीच मायाप्रेम साट्ने पर्वका रूपमा स्थापित छ ।
