आज थारू समुदाय हुक्रनके पैनस्टोपी धोइना दिन
कैलाली । थारु समुदायमे आझुक दिन पैनस्टोपी धोइन दिन हो । डसियाके फूलपातीके दिन थारु समुदायमे पैनस्टोपी धोइना चलन बा ।
पैनस्टोपी धुइना दिन ढिकरी बनाइक लाग चाहना लौव धानक् चाउरके पिठा पसैना, ढिकरी उसिनेक् लाग प्रयोग हुइना पैन, ढकिया सुप्ता लगायत सामग्री धो के सुखैथा । ओकरसंगे आज डेहुरा से बहरी सम्म गोबर माटिलेके घर लिपके देउथान चोखियइन दिन रहल थारु अगुवा हुक्रनके कहाई बा ।
ओस्टहिक सोम्मारके रोज डसियाके महत्वपूर्व दिन ढिकरहुवा हो । थारू समुदायमे लौव धानेक् चाउरसे बनाइल ढिकरीहे प्रसादके रुपमे देउ दुर्गाहुकन चह्राके पूजापाठ कर्ना चलन बा ।
डसियाके एक प्रमुख दिनके रुपमे मानजिना ढिकरहुवाके दिन कौनो फेन घरके घरमुली तथा कुलदेउताहुकनके पूजा कर्ना मनै दिनभर निराहार व्रत बैठल रठै । साँझ्याके विधिपूर्वक पूजापाठ करलपाछे किल उहाँहुक्रे प्रसाद स्वरुप ढिकरी ओ अन्य परिकार खैठै ।
थारू बुद्धिजीवीहुकनके अनुसार यी दिन पूजापाठ कर्ना मनै तथा पुजेह्रुहुक्रे विहानके लहाखोरके काठिक् बोझा, पौवा, गुलेरुवालगायत टमान आकार प्रकारके ढिकरी बनैठै । साठे लग्गेक् बनुवा मन्से बेलुक डाँढ, कुश, भेलाक् पटिया पूजाके लाग नन्ठै । ओकरपाछे बनुवा मन्से नानल बेलुक काँटामे ढिक्रि झलरमलर गस्काके विधिपूर्वक घरेक कुल देवताहुकनके पूजापाठ कर्ना थारू समुदायके संस्कार रहल बा ।
