कैलाली कारागारबाट ६ जनाको सजाय मिनाहा
धनगढी, ३ असोज । संविधान दिवसका अवसरमा कैलाली कारागारबाट एक महिला पाँच पुरुष गरि ६ जना कैद सजाई भोगिरहेकाहरुको सजाय मिनाहा गरिएको छ ।
जिल्ला कारागार कैलालीका निमित्त जेलर तथा नासु बिरेन्द्र बहादुर बोहराका अनुसार सजाय मिनाहाका लागि दुई जना भारतीयसहित ९ जनाको नाम सिफारिस गरिएको थियो । जसमध्ये ६ जनाको सजाय मिनाहा गरिएको हो ।
सजाय मिनाहा हुनेमा कैलालीको (साविक बलिया गाविस) वडा नम्बर ८ की खेमा कुमारी अर्याल देवकोटा, लम्कीचुँहा नगरपालिका–९ का चक्र बहादुर चौधरी, गौरीगंगा नगरपालिका–६ का प्रेम सिंह साउँद र धनगढी उपमहानगरपालिका–८ का राम प्रसाद राना रहेका छन ।
यस्तै कञ्चनपुरका राहुल भनिने कृष्ण कुमार चौधरी र पर्वत जिल्लाका कृष्ण शर्मा तिवारीको कैद सजाय मिनाहा भएको कैलाली कारागारका निमित्त जेलर बोहराले जानकारी दिए ।
सजाय मिनाह मध्ये चक्र बहादुर चौधरी र प्रेम सिं साउँद सवारी ज्यान मुद्धामा कैद भुक्तान गरिरहेका थिए । भने अन्य चारजना कर्तब्य ज्यान मुद्धा (हत्या) मा कैद सजाय भोगिरहेका थिए । उनीहरु ५० प्रतिशत कैद भुक्तान गरेका ६ जनाको बाँकी कैद मिनाहा गरिएको कैलाली कारागारका निमित्त जेलर बोहराले बताए ।
एक बर्ष कैद सजाय तोकिएकी देवकोटाले ६ महिना चार दिन, तीन बर्ष कैद सजाय तोकिएका चक्र बहादुर चौधरीले एक बर्ष ६ महिना दुई दिन, तीन बर्ष कैद सजाय तोकिएका प्रेम सिंह साउँदले एक बर्ष ६ महिना चार दिन र १२ बर्ष कैद सजाय तोकिएका राम प्रसाद रानाले ६ बर्ष एक महिना नौं दिन कैद भुक्तान गरे ।
यसैगरी २० बर्ष कैद सजाय तोकिएका कृष्ण कुमार चौधरीले ११ बर्ष ६ महिना २६ दिन र २० बर्ष कैद सजाय तोकिएका कृष्ण शर्मा तिवारीले १० बर्ष एक महिना ६ दिन कैद भुक्तान गरेका हुन् ।
जिल्ला कारागार कैलालीमा ३६ जना महिला, ३ जना आश्रित बालबालिका र ४५४ जना पुरुष गरी ४९३ जना कैदीबन्दी रहेको जिल्ला कारागार कैलालीले जनाएको छ ।
