विकासके योजनाहे सुधारके लैजाइ परना : मन्त्री सुवेदी

धनगढी, १३ चैत । सुदूरपश्चिम प्रदेशके सामाजिक विकास मन्त्री कृष्णराज सुवेदी स्थानीय तहके विकासके योजना लक्ष्यमे पुगाइक लाग विकासके योजनाहे सुधारके लैजाइ परना बटैले बाटैं ।

जिल्ला समन्वय समिति कैलालीके शुकके रोज धनगढीमे हुइल आर्थिक वर्ष २०७६/०७७ मे सञ्चालित योजना तथा वार्षिक समीक्षा गोष्ठीमे मन्त्री सुवेदी विकासके योजनामे हुइल कमिकमजोरीहे सुधारके लैगिलेसे लक्ष्यमे पुग्ना सहग हुइना बटैलैं । उहाँ स्थानीय तह टमान विकासके योजना सफल हुइलमे प्रसंसा करलैं ।

उहाँ स्थानीय तहके विकासके लाग प्रदेश सरकार समन्वय ओ सहयोग करना प्रतिवद्धता व्यक्त करलैं । गोष्ठीमे कैलाली जिल्लाके १३ स्थानीय तह ओ जिल्ला समन्वय समितिसे आवद्ध परियोजनासे वार्षिक प्रगति प्रतिवेदन प्रस्तुत करल रहे ।

गोष्ठीमे धनगढी उपमहानगरपालिकाके प्रमुख प्रशासकीय अधिकृत हरिबहादुर चन्दसे प्रस्तुत करल वार्षिक प्रगति प्रतिवेदन अनुसार उपमहानगरपालिका ७३ प्रतिशत काम करल जानकारी करैलैं । उहाँ धनगढी उपमहानगरपालिकाके राजस्व लक्ष्य ओ संकलन, स्वास्थ्य, शिक्षा, विकासके योजना, पालिकाके उपलब्धीबारे जानकारी करैले रहैं ।

ओस्टेक गोष्ठीमे टीकापुर नगरपालिकाके प्रमुख प्रशासकीय अधिकृत मोहनप्रसाद अर्याल, घोडाघोडी नगरपालिकाके प्रशासकीय अधिकृत खगेन्द्रबहादुर सिंह, भजनी नगरपालिकाके प्रशासकीय अधिकृत धर्मराज विनाडी, लम्कीचुहा नगरपालिकाके प्रमुख प्रशासकीय अधिकृत विक्रम चौधरी आपन आपन पालिकाके वार्षिक प्रगति प्रतिवेदन प्रस्तुत करले रहैं ।

अस्टेक, कैलारी गाउँपालिकाके सामाजिक विकास अधिकृत यज्ञम कडेल, बर्दगोरिया गाउँपालिकाके गोविन्द विक, मोहन्याल गाउँपालिकाके नारायणप्रसाद शर्मा, जोशीपुर गाउँपालिकाके कमलराज उपाध्याय पालिकाके वार्षिक प्रगति प्रतिवेदन प्रस्तुत करले रहैं ।

अस्टेक, गोष्ठीमे प्रधानमन्त्री कृषि आधुनिकीकरण परियोजनाके वार्षिक प्रगति प्रतिवेदन परियोजनाके कृषि अधिकृत हरिप्रसाद पाण्डे प्रस्तुत करले रहैं ।

गोष्ठीमे सहरी विकास तथा भवन निर्माण कार्यालय ओ घरेलु तथा साना उद्योग कार्यालयके फेन वार्षिक प्रगति प्रतिवेदन प्रस्तुत करल रहे । जिल्ला समन्वय समिति कार्यालयके प्रमुख सूर्यबहादुर थापाके अध्यक्षतामे हुइल कार्यक्रममे स्वागत उपप्रमुख सुन्दरीदेवी चौधरी करले रही ।