समुदाय स्तरमा कोरोना परीक्षणको तयारी

धनगढी, १३ भदौ । पछिल्लो समय नगरभित्रका समुदायमा कोराना देखिन थालेपछि धनगढी उपमहानगरपालिकाले समुदाय स्तरमा कोरोना परिक्षण गर्ने तयारी थालेको छ ।

नगरपालिकाले मापदण्ड बनाएर आईतबादेखि समुदायमा कोरोना परीक्षण गर्ने नगरपालिकाका प्रमुख नृपबहादुर वडले बताए । ‘समुदायमा सबैको कोरोना परीक्षण गर्नु आवश्यक छैन, संक्रमितका परिवार र बढी जनसम्पर्कमा रहने ब्यक्तिबाट नमुना छनौट विधीको प्रयोग गरेर छनौटमा परेकाहरुबाट स्वाव संकलन गरिने छ ।’

धनगढीमा भोलीदेखि थप ५ दिन निषेधाज्ञाको समय थप गरी समुदाय स्तरमा कोरोना परीक्षण गरिने नगरप्रमुख वडले बताए । उाले विस्तारै परीक्षणको दायरा बढाउदै लगिने जानकारी दिए ।

धनगढीमा समुदाय स्तरमा कोरोना संक्रमण फैलिएपछि स्थानीय संक्रमितको संख्या बढ्दै गएको छ । उप–महानगरमा संक्रमण पुष्टि भएका झण्डै २२ प्रतिशत भन्दा बढी संक्रमित स्थानीय रहेका छन् । धनगढीमा स्थानीय संक्रमितको संख्या ५१ पुगेको धनगढी उप–महानगरपालिकाले जनाएको छ ।