गोदावरीमे बाह्र राशि दर्शन मकर मेला लग्ना

धनगढी,१८ पुस । सुदूरपश्चिम प्रदेशके गोदावरीमे यिहे पुस २९ से माघ १२ गतेसम बाह्र राशि दर्शन मकर मेला २०७६ लग्ना बा ।

गोदवरीधाम विकास समिति बाह्र राशि दर्शन मकर मेला आयोजक समितिसे शुकके रोज धनगढीमे पत्रकार सम्मेलनके आयोजना करके पवित्र देवभूमिके प्रवेशद्वार पश्चिम नेपालके प्रसिद्ध तीर्थस्थल गोदाबरीधाम कैलालीमे मेला लग्ना जानकारी डेहल बा ।

उ मेलामे बाह्र राशि, नव ग्रह ओ २७ नक्षत्रके स्थापना करके १२ दिनसम धार्मिक अनुष्ठान संचालन कैना समितिके अध्यक्ष पदमराज जोशी बटैलै । मेलामे टमान व्यक्ति आ–अपन राशि ओ नक्षत्रके दर्शन, पुजा कैनाके साथे ग्रह गौचरके कुप्रभावसे स्वस्थ्य रहना ग्रह पुजन, जघ लक्ष्यहोम, तर्पण, मार्चन लगायत प्रत्येक दिन रुद्राविशेषक सहित योग ध्यानके कार्यक्रम कैना अध्यक्ष जोशी बटैलै । यी अवधिमे भागवत, पुराण वाचनके साथे प्रवचन, भजन, किर्तन लगायत हुइना आयोजक जनैले बा ।

मेला अवधिभर ४ से ५ लाखसम दर्शकहुक्रे अवलोकन कैना आपेक्ष करल समितिके प्रवक्ता मदनराज पाण्डेय बटैलै । १२ दिनसम हुइसम हुइना मकर राशिके लाग १ गते, कुम्भ राशिके लाग २ गते, मीन राशिके लाग ३ गते, मेष राशिके लाग ४ गते, वृष राशिके लाग ५ गते, मिथुन राशिके लाग ६ गते, कर्कट राशिके लाग ७ गते, सिंह राशिके लाग ८ गते, कन्या राशिके लाग ९ गते, तुला राशिके लाग १० गते, वृश्चित राशिके लाग ११ गते ओ धनु राशिके लाग १२ गते विशेष दर्शन कैना विशेष दिन रहना समितिके प्रवक्ता पाण्डेय जनैले ।

उहे अवसरमे १००८ शिवालिङ स्थापना कैना उहाँ कहलै । उदघाटनके लाग मन्त्री लेखराज भट्टहे पत्रचार करल आयोजना जनैले बा । ओस्टेक उदघाटन कार्यक्रममे प्रदेशके मुख्यमन्त्री, सभामुख,उपसभामुख, प्रदेश मन्त्री, प्रदेशसभा सदस्यहुकनहे बोलैना जनैले बा । नेपाल भ्रमण वर्ष २०२० सफल बनाइक लाग भारत लगायत और देशके दर्शनार्थीहुकनहे बोलैना आयोजक जनैले बा ।