संस्कृति बिनाके पहिचान बचाई नै सेक्जाई

धनगढी, ७ पुस । सुदूरपश्चिम प्रदेशके भौतिक पूर्वाधार तथा योजना मन्त्री पठानसिंह बोहरा संस्कृति विनाके पहिचान परिकल्पनाफे करे नाइसेक्ना बटैले बाटै ।

शनिच्चरके रोज नेपाल रानाथारु समाज ओ मउर संरक्षण मञ्चके आयोजनामे धनगढीमे हुइल ‘मिस्टर एण्ड मिस रानाथारु कल्चरल फेस आइडल प्रतियोगिता २०७६ के उदघाटन कार्यक्रममे उहाँ पहिचान कहलेक कला, संस्कृति ओ परम्परा रहल बटैले रहिट ।‘सुदूरपश्चिम विविधता, कला, संस्कृतिमे धनी प्रदेश हो, पुर्खानके सिखाइल संस्कृति लोप हुइटी आधुनिकरणमे परिणत हुइटी गैल बा,’ मन्त्री बोहरा कहलै–‘संस्कृतिहे जिवित रख्ना हो, कलेसे पुर्खानके सिखाइल संस्कृति पुस्तान्तरण करटी जैना चाही ।’

कतिपय संस्कृतिमे विकृतिफे बा, खराबहे सुधार करटी मजाहे प्रवद्र्धन करटी जैना जरुरी रहल मन्त्री बोहरा कहलै । सुदूरपश्चिम प्रदेश ऐन बनैटी रहल कहटी सक्कु समुदायके भाषा, कला, संस्कृतिहे प्राथमिक डेना उहाँ कहलै ।नेपाल रानाथारु समाजके केन्द्रीय अध्यक्ष तथा प्रतिनिधिसभा सदस्य कृपाराम राना कला, संस्कृति ओ पहिचान जर्गेना कैना यूवाके हातमे रहल बटैलै ।

‘संस्कृति बचाई, कुरुटी हटाई निरझल समाज बनाइ’ कना कार्यक्रमके मुल नारा रहल ओरसे यिहीहे आत्मसात कैके जैना जरुरी रहल उहाँ कहलै । मिस्टर एण्ड मिस रानाथारु कल्चरल फेस आइडल प्रतियोगिताके प्रंशसा करटी ढेर बाबुभैया यहाँ अपन प्रतिभा डेखाई पाइल उहाँ कहलै ।कार्यक्रममे धनगढी उपमहानगरपालिका वडा नम्बर ७ के अध्यक्ष सीताराम राना, कञ्चनपुरके कृष्णपुर नगरपालिका वडा नम्बर ८ के वडा अध्यक्ष अमरसिंह बडायक पहिचान विनाके मानव जीवनके अर्थ नइरहल बटैलै ।

कार्यक्रममे नेपाल रानाथारु समाजके उपाध्यक्ष कमलसिंह राना मजा संस्कृतिके संरक्षण ओ खराब रुढीबादी अन्त्यके लाग मिस्टर एण्ड मिस रानाथारु कल्चरल फेस आइडल प्रतियोगिताके आयोजना करल जनैलै । पहिच चो आयोजना हुइल यी कार्यक्रममे रानाथारु समाजभिटर नुकल प्रतिभा बाहेर नन्ना उचित प्लेटफार्म रहल उपाध्यक्ष राना कहलै ।

कार्र्यक्रममे रानाथारु समुदायके टमान मेरिक सांस्कृतिक झाँकी डेखागिल रहे । प्रतियोगिताके संयोजकमे राकेश राना ओ संचालन भक्तराज राना ओ रामप्रसाद राना करले रहिट ।ओस्टेक मिस्टर एण्ड मिस रानाथारु कल्चरल फेस आइडल प्रतियोगिता २०७६ सालके पुरुष विजेतामे योगेन्द्र राना ओ महिला विजेतामे धनकुमारी राना हुइल बाटी । प्रतियोगितामे टमान चरण पार करटी ओ मोबाइलमे सबसे ढेर एसएमएस भोट पाइल पुरुषओर योगेन्द्र राना ओ महिला ओर धनकुमारी राना पहिल विजेता हुइल बाटै ।

पहिल विजेटा बनल दुनु जाने ५०र५० हजार नगद जिटना सफल हुइल बाटै ।ओस्टेक उहे प्रतियोगितामे दुसर हुइल पुरुषओर अमरसिंह राना, महिलाओर पार्वती राना २०र२० हजार नगद जिटले बाटै । टिसरामे पुरुषओर अविनाश राना, महिलाओर प्रमिला राना हुइल बाटी । ओइने १०र१० हजार नगद जिटना सफल हुइल बाटै ।

प्रतियोगितामे धनुकुमारी राना, नविना राना, सुमित्रा राना, दिपा राना, रोशनी राना, सुमित्रा राना, प्रतिभा राना, पार्वती राना, गोविन्द राना, निमक्षेत्र राना, नन्दगोपाल राना, अमरसिंह राना, अविनाश राना भाग लेहल रहिट । प्रतियोगिताके जजमे गोविन्दराज राना, भुलिया राना, शिवराज राना, नारायण राना, जीवन रेग्मी, गुणाकर पनेरु, रितिका गुरुङ लगायत रहल रहिट । कार्यक्रममे यासमा राना सांस्कृतिक पहिरनमे अपन प्रोफम डेखैले रहिट । पहुरासे ।