पर्यटकहुक्रनके रोजाई बनल थारु होमस्टे गाउँ भादा
धनगढी, ५ पुस । आन्तरिक तथा बाहिय पर्यटकहुकनके गन्तव्य स्थल बनल बा, थारु होमस्टे गाउँ भादा । थारु परिकार खैनास लग्लेसे, थारु कला, संस्कृति, नाँचगाँनमे रमैनस लग्लेसे आन्तरिक हुइट या बाहिय पर्यटक थारु होमस्टे गाउँ भादा पुग्ठै । पर्यटन वर्ष सन २०११ संगे भादा गाउँमे पुस १७ गते विधिवत होम–स्टे पर्यटन सुरुवाटसंगे वहाँ दिनहुँ आन्तरिक पर्यटक पुग्ठै ।
सभ्य समाज, सुन्दर प्रकृति ओ चैनार संस्कृतिसे रमाईक लाग पर्यटक यहाँ अइटी रहल बटैठै थारु होमस्टे गाउँ भादा पर्यटन विकास तथा व्यवस्थापन समितिके अध्यक्ष लक्ष्मीनारायण चौधरी । होम–स्टे संचालन करलपाछे अब्बेसम थारु होमस्टे गाउँ भादामे आन्तरिक पर्यटक २५ हजार ओ बाहय पर्यटक ४ सय जाने अवलोकन करल अध्यक्ष चौधरी बटैठै ।
‘१७ घरसे संचालन करल होमस्टे अब्बे परिमार्जित करटी अटेज बाथरुम सहिट २० घरेम संचालन कैना तयारी हुइटी रहल अध्यक्ष कहलै ।
‘बाहिय पर्यटकहुकनके चाहनानुसार होमस्टेहे परिमार्जित करटी तयारी आघे बह्रागिल बा,’ अध्यक्ष कहलै, ‘पर्यटन बर्ष २०२० हे लक्षित करले बाटी, अभिनसम जत्रा पर्यटक आइल बाटै ओकर दोब्बर एक बरसमे भित्रैना हमार लक्ष्य बा ।’
होमस्टे संचालनसंगे थारु परिकार, संस्कृति, भेषभुषा ओ रहनसहन निरन्तरता ओ व्यावसायिकता पाइल कोषाध्यक्ष पदम चौधरी बटैठै । पहुनाहे मजासे स्याहार करल होमस्टे संचालकहुक्रनके घरेक आम्दानीके स्रोतमे बृद्धि हुइल उहाँ कहलै ।
लोपोन्मुख अवस्थामे रहल थारु भेषभुषा, गरगहना, नाचकोर, खानपान, पहुना सम्मानके संस्कार ओ मौलिक चाल चालन, रहनसहन भादामे आभिन परली बा, जेम्ने यहाँ आइल पर्यटकन रमैना बाहना बनठ कोषाध्यक्ष पदम कहठै ।
पर्यटकहुकन मनोरन्जन प्रदान करेक सखिया, झुम्रा, मघौटा, लठ्ठी, बैठक्की नाँच डेखाजैना ओ थारु परिकार ढिक्री, खरिया, फुलौरी, अण्डीक भात, खुर्मा, पनझझरा, कचरीक बरिया, घोंघी, गेङटा, सुटही, मुसक पकुवा, सिध्रा, महुँवक दारु, चौरक दारु, निघार लगायत माग अनुसार खानाके व्यवस्था रहल उहाँ कहलै ।
धनगढीसे करिब १४ किलो मिटर पुरुव पर्ना भादा गाउँमे थारूनके केल बस्ती रहल गाउँ हो । जहाँ १६० से ढेर परिवारके बसोबास बा । पहुराबाट
