देउसी भैलोके पैसासे मन्दिरहे डस्तविन सहयोग

धनगढी, १४ अगहन । कैलारी गाउँपालिका वडा नम्बर १ हसुलियामे रहल स्कूल ब्राइट स्टरके विद्यार्थीहुक्रे डेउसी भैलो खेलके उठल रकमसे वनदेवी मन्दिरहे डस्तविन सहयोग ओ मन्दिर परिसर सरसफाई करले बटै ।

कैलारी गाउँपालिका वडा नम्बर १ मे रहल धार्मिक तथा पर्यटकीय मन्दिरहे सफासुग्घर बनैना उद्देश्यसे डेउसी भैलो खेलके उठल १४ रुप्या बराबरके प्लाष्टिक डस्ताविन ओ झारु सहयोग करल डेउसी भैलो टिमके संयोजक विमा चौधरी बटैली । धार्मिक तथा पर्यटकीय दुष्टिकोणसे वनदेवी मन्दिर गाउँपालिका सबसे रमणीय रहल ओ यहाँ दैनिक सयौं दर्शनर्थी ओ पिकनिक खउइयनके भिरभाड रहठ ।

‘समाजहे परिवर्तन कैनामे यूवाहुकनकेफे ढेर भूमिका रहठ,’ संयोजक विमा कहली–‘देउसी भैलो खेल्के ढेर जैसिन मनै उ रुप्यासे पिकनिक खैना, घुमघाम करठै रहरङगी करके ओरुवइठै, मने हम्रे ठोरचे हुइलेसेफे वनदेवी मन्दिरहे सहयोग करली ।’ मागल चिज पुरा हुइठ कहिके उ मन्दिरमे दर्शनार्थी अइठै, रमाइलो करेक लाग पिकनिक खउइयाफे अइठै, ओइनथेनसे निकरल फोहर एक ठाउँमे फेकिट कहिके हम्रे डस्ताविन ओ झारु सहयोग करल बटैली।

डेउसी भैलो खेलके उठल रकम मन्से १४ हजार बराबर डस्ताविन ओ झारु खरिदके वनदेवी मन्दिर व्यवस्थापन समितिके अध्यक्ष पहरीदेवी चौधरीहे हस्तान्तरण कैगिल स्कूल ब्राइट स्टरके प्रिन्सिपल अजय महतों जानकारी डेलै । विद्यार्थीहुक्रे मन्दिरबारे जानकारी डेना सूचना पार्टी समेट रख्ले बाटै । डस्ताविन हस्तान्तरण ओ मन्दिर परिसर सरसफाई कार्यक्रममे विद्यालयके शिक्षक दयाराम बुढाथोकी, सन्जिव चौधरी, विद्यालयके विद्यार्थी, मन्दिर व्यवस्थापन समितिके सदस्यहुकनके सहभागिता रहे ।