लिपुलेक ओ लिम्पियाधुराहेबारे मुख्यमन्त्रीहे १२ बुँदे साझा धारणा बुझागिल
धनगढी, २ अगहन । नेपाल नगरपालिका संघ ओ गाउँपालिका राष्ट्रिय महासंघ सुदूरपश्चिम प्रदेश १२ बुँदे साझा धारणा सुदूरपश्चिम प्रदेशके मुख्यमन्त्री त्रिलोचन भट्टहे बुझागिल बा ।
नेपाल नगरपालिका संघ ओ गाउँपालिका राष्ट्रिय महासंघके शुकके बैठल संयूक्त बैठकसे नेपालके भू–भाग कालापानी, लिपुलेक ओ लिम्पियाधुराहे भारतसे अपनमे डेखाइलप्रति गम्भिर ध्यानाकर्षण हुइल लगायत १२ बुदेँ साझा धारणा सार्वजनिक करले रहे ।
गाउँपालिका राष्ट्रिय महासंघ ओ नेपाल नगरपालिका महासंघके शुकके संयूक्त बैठकसे दार्चुलाके टिंकर सडक, दुमलिङसे छाङरुङसमके अवरुद्ध गोरेटो डगर निर्माण करे लाग प्रदेश ओ संघीय सरकारसंग माग करले रहे ।
बैठकसे आइल साझा धारणामे स्थानीय तह प्रदेश सरकार ढेर जिम्मेवार हुई पर्ना औल्याइल बा । स्थानीय सरकारहे अपन आवधिक तथा वार्षिक योजना कार्यान्वयन कैना सन्दर्भमे अपनहे आवश्यक पर्ना न्यूनतम पुर्वाधार निर्माण कैना व्यक्ति सरह जग्गा खरिद करे नाइसेक्ना संघीय सरकारके कानूनी प्रावधानहे संशोधन करे पर्ना, स्थानीय आवश्यकता, माग ओ भौगोलिक अवस्थाके आधारमे स्थानीय सरकारसे प्रशासनिक भवन निर्माण करे पाई पर्ना, प्रदेशस्तरके योजना तर्जुमा प्रक्रिया ओ मापदण्ड निर्धारण करके उहे बमोजिम आघे बह्रना प्रदेश सरकारहे अनुरोध कैना उल्लेख बा ।
ओस्टेक, प्रदेश सरकारसेफे आवधिक योजना बनाके योजनाबद्ध विकासमे आघे बह्राई पर्ना, वित्तीय संघीयताके कार्यान्वयन कैना प्रदेश सरकारसे ध्यान डेहे पर्ना, संघीय सरकारसे अइना वर्षसे समानीकरण अनुदानमे बृद्धि करे पर्ना, स्थानीय तहहे प्रदान कैना अनुदान रकम वैज्ञानिक आधारमे वितरण करे पर्ना, स्थानीय सरकारके मागके आधारमे कर्मचारी वयवस्थापन कैना संघ तथा प्रदेश सरकारसंग अनुरोध कैना उल्लेख बा ।
प्रदेश समन्वय परिषदके कार्यविधी तय करके ओकर भूमिकाहे थप प्रभावकारी बनाई पर्ना, नगरपालिका संघ ओ गाउँपालिका राष्ट्रिय महासंघके संस्थागत सुदृढीकरणके लाग क्षमता विकासके गतिविधी सञ्चालन करेक लाग वार्षिक रुपमे प्रदेश सरकारसे बजेट विनियोजन करे पर्ना साझा धारणामे उल्लेख बा ।
गाउँपालिका राष्ट्रिय महासंघके अध्यक्ष दुर्गादत्त ओझा, नेपाल नगरपालिका संघ प्रदेशके संयोजक केशवबहादुर चन्द लगायतसे १२ बुँदे साझा धारणा मुख्यमन्त्री भट्टहे बुझैले बाटै ।
