हौसलपुरमे यिहे आर्थिक मसान्तभित्रे बिजुली बरना

धनगढी, २८ कार्तिक । कैलाली जिल्लाके कैलारी गाउँपालिका वडा नम्बर ७ हौसलपुर गाउँमे यिहे आर्थिक मसान्तभिटर बत्ती बरना योजना रहल सुदूरपश्चिम प्रदेशसभा सदस्य विरमान चौधरी बटैले बाटै ।

युनिक नेपालके सुन्दर शान्त नेपाल परियोजना अन्र्तगत गठन हुइल कैलारी संवाद समूहके आयोजनामे बुधके रोज हौसलपुर गाउँमे हुइल ‘गाउँपालिका स्तरीय अन्तर विषयक सिकाई आदान–प्रदान तथा स्थलगत छलफल’ कार्यक्रममे उहाँ यिहे आर्थिक बर्ष २०७६÷०७७ सालके चैत्र–बैशाख महिनाभिटर बत्ती बरना योजना रहल बटैलै ।

‘कैलारी गाउँपालिका अन्र्तगत बत्ती नइरहल ठाउँमे विस्तारके लाग प्रक्रिया आघे बह्रल बा,’ प्रदेशसभा सदस्य विरमान कहलै–‘ हौसलपुर, मिलनपुर ओ विपतपुरमे बत्ती बारेक लाग नेपाल विद्युत प्राधिकारण ओ प्रदेश सरकारसे बजेट विनियोजन कैना काम हुइटी बा, विद्युतके काम करेक लाग टेन्डरफे खोलसेकल ओरसे स्वीकृत हुइटीकी हाली काम आघे बह्री ।’ बर्खाक बेला यी ठाउँमे काम कैना कर्रा हुइना ओरसे चैत–बैशाखमहिना भिटर काम ओरुवा डर्ना कहिके प्राधिकरणसे छलफल हुइल ओ विद्युत विस्तारके लाग ८० लाख रुप्या लग्ना उहाँ कहलै ।

बर्खाके समयमे जबफे सम्बन्ध विच्छेद जैसिन हुई पर्ना अवस्था आइल ओरसे झोलुङे पुलके लाग सर्वे हुसेकल औरसे अइना सालसे काम आघे बह्रना उहाँ बटैलै । हौसलपुरके स्थानीयसे उपभोग करटी आइल जग्गाके लालपुर्जा केन्द्र सरकार निर्णय करलेसे केल डेहे सेक्ना प्रदेशसभा सदस्य चौधरी कहलै ।

कैलारी गाउँपालिका अध्यक्ष लाजुराम चौधरी हौसलपुर, शिवरात्नपुर ओ मोहनपुरके लाग विशेष अनुदान नानल बटैलै । मोहनापर रहल भारतके सीमानासंग जोरल तीन गाउँक लाग टमान मेरिक तालिम, स्वास्थ्य, शिक्षा लगायतके लाग विशेष अनुदान नानल अध्यक्ष बटैलै ।
‘उ गाउँक स्वास्थ्य, शिक्षा, सीपमुलक आयमुलक तालिमके लाग अशौक साल बजेट विनियोजन करके काम आघे बह्रैना कहले बाटी,’ अध्यक्ष कहलै– ‘नेपाली रहटी–रहटी राज्यसे पाई पर्ना सेवा सुविधासे बन्चित हृुइटी रहल ओरसे ओइनके लाग विशेष अनुदान नानल हो, अपुग हुइलेसे फेरसे थपेसेक्जाई ।’

हौसलपुरके लाग ६ लाख, शिवरत्नपुर ओ मोहनपुरके लाग ९÷९ लाख बजेट विनियोजना करल उहाँ बटैलै । हौसलपुरमे सुरक्षित भवन विस्तार कैना, यिहे साल खोप केन्द्र स्थापना कैना, बाल विकास केन्द्र ओ महिला स्वयं सेविकाके व्यवस्था कैना अध्यक्ष बटैलै । हौसलपुरबासीके माग अनुसार ग्राभेल ओ नल्का उपलब्ध करैनाफे उहाँ प्रतिबद्धता जनैलै ।

कैलारी गाउँपालिका वडा नम्बर ७ के अध्यक्ष कमल प्रसाद चौधरी नेपालके भुगोल बचैनामे हौसलपुरबासीके भारी योगदान रहल बटैलै । भारतसे नेपालके ढेर भूमि अतिक्रमण करटी रहल मने यहाँक बासी नेपाली भूमिहे बचाइल उहाँ कहलै ।

‘संघीयता लागु हुके गाउँपालिकाके निर्वाचनपाछे हौसलपुरमे डुङगा, होमपाइप, सोलरपावर वितरण कैना लक्ष्य रहे उ पुरा हुइल वडा अध्यक्ष कहलै । अगहन ५ गते हुइना बैठकसे एक जाने स्वयं सेविका नियूक्त कैना, बाल विकास केन्द्र स्थापना ओ अलगे खोप केन्द्र स्थापना उहाँ बटैलै ।

कार्यक्रममे हौसलपुरबासी खानेपानी, यातायात, विद्युत, खोप केन्द्र नइरहल समस्या भोग्टी आइल बटैले बाटै । हौसलपुरके गोमा चौधरी कहली,–‘गाउँमे ग्राभेल नइहो, अब्बे धुर उरठ, बर्खाक बेला हिलाकिच्चासे नेंग्ना कर्रा रहठ, भूमि नेपालके रहलेसेफे बर्खाक बेला नेपालसे पूर्णरुपसे सम्बन्ध विच्छेदके अवस्था रहठ ।’ बस्ती मोहना लडियक पार रहल ओ खेतुवा भर दुसर पार रहल हुके खेतीपाती कैना समेट समस्या परल उहाँ कहली ।

उहे गाउँक रामकुमार चौधरी गाउँ बोर्डर किनारमे रहल ओरसे भारतियहुकनहे ढेर समस्या भोगे परल बटैलै । गाउँपालिकासे डेहल लाउ चलैनाफे एसएसबी से रोक लगाइल उहाँ बटैलै । झोलुङगे पुलके सर्वे हुइल मने काम हाली सुरुवाट हुइलेसे समस्यासे दुर हुइना उहाँ कहलै ।

हौसलपुरके प्रतिभा चौधरी अपनेहुक्रे नेपालीहुकेफे कबु आयमुलक, सीपमुलक ओ कृषि तालिम नइपाइल गुनासो करली । ‘प्रौढ शिक्षा समेट नइपाइल कारण हस्ताक्षर करेफे नइजन्ठी,’उहाँ कहली–‘अपन गाउँमे विद्यालयमे नइहो लर्का सब भारतिय विद्यालयमे पह्रठै ओ हिन्दी भाषा बोल्ठै ।’ अब्बेक पिढीके लर्का अपन मात्रृ भाषा विस्रैना समेट चिन्ता रहल उहाँ कहली ।

कार्यक्रममे सहजीकरण इन्टरनेशनल एलार्टके परियोजना संयोजक शोभाराम चौधरी करले रहिट । छलफल कार्यक्रम कैलारी संवाद समूहके अध्यक्ष सीताराम चौधरीके अध्यक्षतामे हुइल रहे । संचालन समूहके सदस्य कृष्ण चौधरी करले रहिट । कार्यक्रममे टमान वडाके वडा अध्यक्ष, कैलारी गाउँपालिकाके कार्य समिति सदस्यहुकनके सहभागीता रहे । मोहनापर रहल हौसलपुर, शिवरत्नापुर, मोहनपुर गाउँक स्थानीय विगतसे राज्यसे पैना सेवा सुविधासे बन्चित हुइटी आइल बाटै । पहुरा दैनिकसे