दशकौं नाइ हुइल विकास दुइ बरसमे फड्को मारल : लेखराज भट्ट
कैलाली, १६ कुवाँर । पूर्वमन्त्री एवं प्रतिनिधि सभा सदस्य लेखराज भट्ट छ दशकसे नाइ हुइल विकास वर्तमान सरकारके पालामे फड्को मारल बटैले बाटै ।
गौरीगंगा नगरपालिकामे डश्या, डेवारी तथा छठ पर्वके शुभकामना आदान प्रदान ओ जेष्ठ नागरिक सम्मान कार्यक्रमहे सम्बोधन करटी पूर्वमन्त्री भट्ट २००७ सालसे २०७२ सालसमके अवधिमे नाइ हुइल विकास वर्तमान सरकारके पालामे हुइल बटाइल हुइट ।
जन प्रतिनिधिहुक्रे निर्वाचित होके २ बरसमे भित्रे विकास फड्को मारल उल्लेख करलै । कार्यक्रमके बर्का पहुना समेत रहल पूर्वमन्त्री भट्ट डश्या, डेवारी ओ छठ टिहुवारसे बरस दिनसम करल परिश्रम दःख कष्ट भुलके लौव बाली भित्र्याइना टिहुवारके रुपमे लेहल बटैलै ।
उहाँ टरटिहुवारके अबसरमे अब्बे टमान विकृति विसंगति स्थान लेहल बटैलै । मने डश्या डेवारीके अवसरसमे नगरपालिकासे जेष्ठ नागरिकहुक्रनहे सम्मान कैके अनुकरणीय काम करल कहटी नगरपालिकाके प्रशंसा करल रहिट ।
पूर्वमन्त्री भट्ट कृषि क्षेत्रमे प्रचुर सम्भाबना रहल कहटी प्रदेशहे समृद्ध बनाइक लाग भुवनोटके आधारमे सम्भावनाके खोजीके लाग विज्ञहुक्रनसे छलफल कैके सेकल कहटी विकास ओ रोजगारीके अबसर कृषिमे कैना कहटी निति तथा योजनाके तयारी करल जानकारी डेलै ।
ओस्टके कलेसे वन जंगलके सुन्दरतासे सुन्दर सुदुर पश्चिमके पहिचान बनल यी क्षेत्र वैज्ञानिक वनके नाउँमे विनास हुइटी रहल ओरसे उहाँ चिन्ता व्यक्त करल रहिट ।
नगरपालिकासे डश्या, डेवारी तथा छठ पर्वके शुभकामना आदान प्रदान ओ ५५ जेष्ठ नागरिकहे सम्मान सहिट टमान क्षेत्रमे योग्दान पुगैना व्यक्तित्वहुक्रनहे समेत सम्मान करले रहे । नगरपालिकासे उत्कृष्ट वडा, कृषक, पशुपालक किसान, शिक्षक, स्वास्थ्य कर्मी, महिला स्वास्थय स्वयम सेविका लगायत नगरकापालिकाके कर्मचारी कार्यालय सहयोगी सहित टमान विधाके उत्कृष्ट व्यक्तित्वहुक्रनहे सम्मान समेत करल रहे ।
शुभकामना आदान प्रदान कार्यक्रमहे पुर्व कृषि मन्त्री एवंम प्रतिनिधि सभा सदस्य गौरीशंकर चौधरी, नेकपा सुदुर पश्चिम अध्यक्ष कर्ण थापा, प्रदेश सभा सदस्य चुन कुमारी चौधरी, गोदावरी नगरपालिकाके उपमेयर रत्ना कठायत, नेपाली कांग्रेसके नेता दिनेश राज जोशी लगायत सम्बोधन करल रहिट ।
नगरपालिकाके समग्र विकास सम्भावना ओ चुनौतीके बारेम प्रमुख प्रसासकीय अधिकृत भक्तराज जोशी प्रस्तुत करल रहिट कलेसे कार्यक्रममे उपप्रमुख अञ्चला चौधरी स्वागत करल रही । कार्यक्रम नगर प्रमुख भिम बहादुर देउवाके घरगोसियाइमे हुइल रहे ।
