कैलाली उद्योग बाणिज्यसंगसे सीमा नाकामे पर्यटकहुकनहे स्वागत
धनगढी, १० कुवाँर । ४०औं विश्व पर्यटन दिवसके अवसरमे शुकके रोज सीमा नाका गौरीफन्टामे पर्यटकहुकनके फुलमाला सहिट स्वागत करल बा ।
कैलाली उद्योग वाणिज्य संघ ओ होटल व्यवसायी संघ सीमा नाकामे सकारे प्रवेश करल भारतीय पर्यटकहुकनहे फुलमाला ओ खादा सहिट स्वागत कैगिल हो । शुकके सकारे नेपाल आइल भारतसे पलिया व्यापार मण्डलके अध्यक्ष अनुप मिश्र लगायतके टोलीहे कैलाली उद्योग वाणिज्य संघके वरिष्ठ उपाध्यक्ष पुष्कर ओझा ओ होटल व्यवसायी संघ अध्यक्ष कलम बम लगायतसे फुलमाला सहिट स्वागत करल रहे । उहे लगत्ते धनगढी उपमहानगरपालिका ओ कैलाली उद्योग वाणिज्य संघके संयुक्त आयोजनामे धनगढीमे विश्व पर्यटन दिवसके अवसरमे पर्यटन प्रवद्र्धन सम्बन्धी सरोकारवाला निकाय विच अन्तरक्रिया कार्यक्रमफे हुइल बा ।
कार्यक्रमके वडका पहुना तथा धनगढी उपमहानगरपालिकाके प्रमुख प्रशासकीय अधिकृत नारायण प्रसाद सापकोट उपमहानगरपालिकासे पर्यटन प्रवद्र्धनके लाग टमान गतिविधि करटी रहल बटैलै । उहाँ धनगढीमे रहल शिवालिङ, जखोर ताल, बेहडा बाबा मन्दिर लगागत क्षेत्रमे पर्यटक भित्रयाइक लाग बजेट विनियोजन करके भौतिक पूर्वाधार निर्माण करटी रहल बटैलै ।
कैलाली उद्योग वाणिज्य संघके पूर्व अध्यक्ष दिनेशराज भण्डारी पर्यटक भित्रयाइक लाग डगरघाटके विकास कैना आवश्यक रहल बटैलै । गाडी लेके घुमघाममे नेपाल आइल पर्यटकहे प्रशासनिक कठिनाई हुइल उहाँ बटैलै । भारतके पलिया व्यापार मण्डलके अध्यक्ष अनुप मिश्र भारतिय पर्यटकहे नेपालमे अइलेसे भन्सारमे दैनिक परमिट लेहे, ट्राफिक प्रहरीसे ठाउँ ठाउँमे चेक जाँच हुइल कारण झन्झट मन्टी रहल बटैलै । भारतसे आइल पर्यटक खानीडाँडा, डडेल्धुरा, चिसापानी लगायत ठाउँमे रमाई चाहल मने प्रशासनिक जटिल रहल उहाँ कहलै ।
टिडिएसके अध्यक्ष प्रमोद पाठक नेपालसे जोरल भारतिया नाका ओ चीन नाकाके डगर मजा बनैले पर्यटक अपनही बह्रना बटैलै । नसरोवर यहाँसे २४० किलोमिटर केल दुर रहल ओरसे उहाँसम पुग्ना डगर बनाइसेक्लेसे ढेर धार्मिक पर्यटन नाने सेक्ना बटैलै ।
नाटा सुदूरपश्चिम प्रदेश अध्यक्ष माया प्रकाश भट्ट यी प्रदेश पर्यटन विकासके लाग भर्जिन क्षेत्र रहल ओरसे सेवा सुविधा बह्राई सेक्लेसे आन्तरिक ओ बाह्य पर्यटक भित्राई सेक्ना बटैलै । होटल व्यवसायी संघके अध्यक्ष कलम बम पयर्टन प्रवद्र्धनके लाग तीन तहके सरकार विच सहकार्य आवश्यक रहल बटैलै । सुदूरपश्चिम प्रदेशमे सोचल जैसिन पर्यटन नइअइना कहल चिन्ताके विषय रहल उहाँ कहलै ।
नेपाल पत्रकार महासंघ कैलालीके सभापति जगत साउद पर्यटक भित्रैना यहाँके डगरघाटमे सुधार, सफाई, होटल व्यवसायी लगायत यहाँक नेपालीके बानीमे सुधार ओ बाह्य पर्यटकहे होटल बासमे विशेष छुट डेहे पर्ना आवश्यक रहल बटैलै । कार्यक्रमके अध्यक्ष तथा कैलाली उद्योग वाणिज्य संघके वरिष्ठ उपाध्यक्ष पुष्कर ओझा ६० प्रतिशत रोजगार पर्यटनसे जोरल बटैलै । सुदूरपश्चिममे बाह्य पर्यटक भित्रैना पूर्वाधार आवश्यक रहल कहलै ।
सुदूरपश्चिम प्रदेश कैलालीमे कर्णाली पुल, कर्णाली ¥याफटिङ, त्रिवेणी धाम, राजकाँडा, मालिका मन्दिर, टिकापुर पार्क, यहाँक डल्फिन, प्रकाशेश्वर महादेव मन्दिर, बर्दगोरिया मन्दिर, घोडीघोडा ताल, घोडीघोडा मन्दिर, खैराला दरबार, कोइलही टलुवा, जोगिनिया टलुवा, भादा होमस्टे, यहाँक झुम्रा, मघौटा, सखिया, मुंग्रहवा, होरी नाँच, छलिया, पुत्ला नाँच, पञ्चे बाजा, महादेव टलुवा, बेहडा बाबा, जाखोर टलुवा, नवदुर्गा मन्दिर, नैनादेवी मन्दिर, बनदेवी मन्दिर, रामजानकी मन्दिर, शिवपुरी धाम, गोदवरी धाम, कम्पासेधुरा डाँडा, खानी डाँडा लगायतके प्रचारप्रसार कैना आवश्यक रहल उपाध्यक्ष ओझा कहलै । कार्यक्रमके संचालन धनगढी उपमहानगरपालिकाके योगेन्द्र चन्द करले रहिट ।
