सीता कुवाके पाँचौ साधारण सभा
उदासीपुर, ७ कुवाँर । सीता कुवा सामुदायिक वन उपभोक्ता समूहके पाँचौं वार्षिक साधारण सभा तथा सार्वजनिक सुनुवाई कार्यक्रम सम्पन्न हुइल बा ।
कैलारी गाउँपालिका वडा नं. ८ अन्र्तगत लोहरपुरके वन उपभोक्ता समूहके अध्यक्ष रमा चौधरीके अध्यक्षतामे हुइल कार्यक्रमके बर्का पहुना सव डिभिजन वन कार्यालय उदासीपुरके जीत बहादुर चौधरी रहल रहिट ।
ऋोस्टके खास पहुनामे थारु पत्रकार संघके केन्द्रिय उपाध्यक्ष उन्नती चौधरी रहल रही । कलेसे पहुनामे सीएफसीसीके कोषाध्यक्ष फूलराम चौधरी, प्रधानमन्त्री आधुनिकीकरण गहुँ सुपरजोनके अध्यक्ष रमेश चौधरी, नेपाली कांग्रेसके पतिनिधी अनिता चौधरी, पत्रकार राम दहित, पहुरा थारु दैनिक मसुरिया व्यूरो प्रमुख दिनेश दहित लगायत रहल रहिट ।
कार्यक्रममे उपभोक्ता समूहके कोषाध्यक्ष रेखा देवी चौधरी आर्थिक बरस २०७५÷०७६ के २ लाख ५१ हजार ५४२ रुप्या बराबरके आयव्यय प्रस्तुत करल रही ।
कार्यक्रममे बोलुइया अधिकांश वक्ताहुक्रे वनुवा संरक्षण कैना सबके दायित्व रहल बटाइल रहिट । वनुवा विनाससे वन्यजन्तु लोप हुइनाके साथे वातावणीय संन्तुलन बिग्रटी गैल ओरसे वनुवा संरक्षणके साथे वृक्षारोपण फेन कैना जरुरी रहल औंल्याइल रहिट ।
कार्यक्रममे उपभोक्ता समूहके सल्लाकार बुधराम चौधरी स्वागत करल कार्यक्रमके सञ्चालन सचिव सियाराम चौधरी करल रहिट । कार्यक्रममे वन उपभोक्ता समूहके पदाधिकारी, समाजसेवी, वुद्धिजिवी, वन उपभोक्ताहुक्रनके उपस्थिति रहल रहे ।
