कृषकहुक्रे बैंकसे लेना कर्जाके व्याजदर घटाई पर्ना माग
धनगढी, २४ भदौ । कैलाली उद्योग वाणिज्य संघ मंगरके रोज नेपाल राष्ट्र बैंकके डेपुटी गर्भनर चिन्तामणी शिवाकोटीहे धनगढीमे स्वागत तथा भेटघाट कार्यक्रम करले बा ।
संघके अध्यक्ष पुष्पराज कुवँर डेपुटी गर्भनर शिवाकोटीहे खादा ओरहाके स्वागत करल रहिट । व्यवसायी, टमान बैकके शाखा प्रबन्धक, बैंकके प्रदेश संयोजक, कृषकहुकनके उपस्थितिमे हुइल कार्यक्रममे व्यवसायी तथा कृषकहुक्रे बैंकसे लेना कर्जाके व्याजदर घटाई पर्ना माग रख्ले रहिट ।
कार्यक्रमके वडका पहुना रहल नेपाल राष्ट्र बैंकके डेपुटी गर्भनर चिन्तामणी शिवाकोटी नेपाल राष्ट्र बैकसे व्यवसायिक कर्जा होए वा कृषि प्रयोजनके लाग लेहल कर्जा होए ओकर व्याज घटैना निरन्तर लागल बटैलै । नेपाल राष्ट्र बैंक सहुलित कर्जा डेटी रहल बटैटी कोई व्यवसायी वा कृषक ठगुवा पैलेसे उप्पर आके कम्पेन डेलेसे ठगुवा पउइया हे पुरस्कार डेना ओ ठगुइयाहे कार्वाही कैना बटैलै ।
डेपुटी गर्भनर शिवाकोटी बैकहुकनहे कार्यविधि बनाके खर्च कैना आग्रहफे करलै । कार्यक्रममे धनगढी बैक अफ क्लवके अध्यक्ष धर्मराज विष्ट कृषि लोनमे समस्या हुइल बटैलै ।
कृषि प्रयोजनके लाग लेहल लोन औरे ओर डाईभर्ट कैना करल बटैलै । कार्यक्रममे नाटा सुदूरपश्चिमके अध्यक्ष माया प्रकाश भट्ट यी क्षेत्र पर्यटन विकासके भर्जिन रहल ओरसे लगानी ओ प्रचारप्रसारके कमी रहल बटैलै । कार्यक्रमके संचालन संघके कार्यकारी निर्देशक गोमा अधिकारी करले रहिट ।
