प्रचण्डहे दोहोरो चरित्र नैडेखाई लक्ष्मण थारुके चेतावनी

धनगढी, २४ भदौ । थारु नेता लक्ष्मण थारु नेकपाके अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’विरद्ध खनल बाटै । उहाँ प्रचण्डहे थारुहुक्रनके एजेण्डामे नाइ बोल्न फेन चेतावनी डेले बाटै ।

उहाँ कहले बाटै, ‘प्रचण्ड हमार एजेण्डा छोडसेक्लै, आब अइसीन अभिव्यक्ति डेना नाइ सुहाइठ् ।’ अँट्वारके थारु कल्याणकारिणी सभाके ज्ञापन बुझ्टी अध्यक्ष प्रचण्ड टीकापुर घटनाहे थारु विद्रोहके रुपमे चर्चा करल रहिट । उहाँ टीकापुर घटना राजनीतिक रहल बटैटी उक्त घटनाके राजनीतिक समाधान निकारे पर्ना बटाइल रहिट ।

‘०७२ भदौ ७ गते कैलालीके टीकापुर घटल घटना थारुहुक्रनसे करल राजनीतिक विद्रोह हो’, उहाँ कहलै, ‘निर्दोष थारुहुक्रनउपर मुद्दा लाग्न उचित नाइहो ।’ टीकापुर घटनाके राजनीतिक समाधान निकारे पर्र्ना अध्यक्ष प्रचण्डके कहाइ रहे ।

प्रचण्डके यी कहाई प्रति नेता थारु आपत्ति जनैटी दोहोरो चरित्र नाइ डेखैना चेतावनी डेहल हुइट । ‘निर्दोष थारुहुक्रनहे जेलमे थुनके रख्ना मने बाहर गोहनके आँश गिरैना प्रचण्डके दोहोरो चरित्र थारुहुक्रे बुझसेकल बाटै । आब भ्रममे नाइ रहलेसे हुइठ्’, थारु कहलै, ‘माननीय रेशम चौधरीसहित ११ जनहनहे जेलमुक्त करल खोइ ?’

टीकापुरमे ७ भदौ ०७२ मे एक नाबालक सहित आठ प्रहरीके हत्यासम्बन्धी घटनामे २६ जनहन विरुद्ध मुद्दा दायर हुइल रहे । जिल्ला दालत, कैलालीसे ०७५ फागुन २२ गते तीनजनहनहे निर्दोष सावित करल रहे । प्रतिनिधिसभाके सांसद रेशमलाल चौधरी सहित १२ जनहनहे अदालत जन्मकैदके फैसला सुनाइल रहे ।

तीन वर्ष कैद सजायँ सुनाइल १५ जने रिहा होसेकल बाटै । प्रचण्डसंगके भेटमे थरुहट÷थारुवान संयुक्त संघर्ष समितिसे राजनीतिक सहमति कैके थारु कल्याणकारिणी सभाके अध्यक्ष धनिराम थारु लगायतके थारु नेता, कार्यकर्ता उपर लगाइल मुद्दा फिर्ता लेना कहटी ६ बुँदे माग लेके पुगल रहिट ।

समितिसे राज्यके हरेक अंग, तह तप्कामे संवैधानिक व्यवस्था अनुसार समानुपातिक समावेशी प्रतिनिधित्वके कार्यन्वयन ओ हाल लोक सेवा आयोगसे प्रकाशित करल विज्ञापन खारेजी, तथ्य सत्य जाँचबुझ कैना गठन करल देवीराम शर्मा, सवोच्च अदालतके पुर्व न्यायाधिश गिरिशचन्द्र लाल दास, संसदीय समिति लगायतके टीकापुर घटनाके छानविनके लाग गठित समिति एवं सक्कु आयोगके प्रतिवदेन सार्वजनिक करे पर्र्ना लगायतके माग लेके उहाँहुक्रे पुगल रहिट ।

ओस्टके अन्य मागमे आदिवासी थारुहुक्रे माँग करटी आइल प्रादेशिक सिमांकन संशोधन सहित १३ बुँदे माग लगायत मधेसी, जनजाति, मुस्लीम, दलित पिछडावर्ग एवं सीमान्तकृत वर्गके माँग सम्बोधनके संविधान संसोधन करे पर्ना, थरुहट/थारुवान आन्दोलनके क्रममे शहादत प्राप्त करुइया शहिद परिवारहहुक्रनहे विगतके सम्झौता सहमति अनुसार शिक्षा, स्वास्थ्य ओ रोजगारीके व्यवस्थाके साथे शहादत प्राप्त करल शहिद परिवारहे सक्कु सुविधा उपलब्ध कराइ पर्ना माग रहल बा ।

ओस्टके थरुहट/थारुवान आन्दोलनके क्रममे प्रहरी प्रशासनके आडमे टीकापुर लगायत टमान ठाउँमे थारुहुक्रनके घर, एफ.एम तथा रिसोर्टमे हुइल लुटपाट, आगजनी, तोडफोड, दुरव्यवहार करुइया व्यक्तिहे कानुनी कारवाही कैना माग लेके समितिके पदाधिकारी नेकपा अध्यक्ष प्रचण्डसे भेट कैना अँट्वारके खुमलटार पुगल रहिट ।