१ लाखके अक्षय कोष, पत्रकार महासंघहे सहयोग

धनगढी, २७ सावन । नेपाल आदिवासी जनजाति पत्रकार महासंघ (फोनिज) कैलाली शाखा १ लाख धनराशीके अक्षयकोष स्थापना कर्ना घोषणा कर्ले बा ।

फोनिजके २० औं स्थापना दिवसके अवसरमे कैलाली शाखा सोम्मारके रोज धनगढीमे आयोजित एक कार्यक्रमके बीच अक्षयकोष स्थापना कर्ना घोषणा करल हो । अक्षयकोष अन्तरगत बैंक मुद्दती खातासे वार्षिक रुपमे अइना ब्याज रकमसे आदिवासी जनजाति पत्रकारहुकनके क्षमता विकास, आपतकालीन सहयोगमे खर्च कर्ना कर्ना फोनिज कैलाली अध्यक्ष लखन चौधरी जानकारी डेलै ।

उ अवसरमे उ शाखासे नेपाल पत्रकार महासंघ कैलाली शाखाहे १ दर्जन प्लाष्टिक कुर्सी सहयोग कर्ले बा । महासंघके कार्यालय व्यवस्थापनमे सहयोग पुगे कना उदेश्यके साथ कुर्सी सहयोग करल हो । फोनिज अध्यक्ष चौधरी महासंघ कैलाली अध्यक्ष जगत साउँदहे कुर्सी हस्तान्तरण करल रहिट ।

फोनिज कैलाली अध्यक्ष चौधरी कहलै–‘हम्रे गैल आर्थिक बरसमे कैलालीके कैलारी गाउँपालिकासहित कुछ स्थानीय तह संग सहकार्य करके कार्यक्रम करल रहि । कार्यक्रमके खाजा खर्चहे कटौती करके अक्षय कोष ओ महासंघहे छोटमोट सहयोग कर्र्ना प्रयास कर्ले बाटी ।’

सञ्चारमे समावेशिता जरुरी

‘सञ्चारमे समावेशिता कानूनमे चाहल, व्यवहारमे फेन’ कना मूल नाराके साथ शाखा अध्यक्ष लखन चौधरीके घरगोसियाईमे हुुइल कार्यक्रमके बरका पहुना नेपाल पत्रकार महासंघ सुदूरपश्चिम अध्यक्ष अर्जुन शाह रहल रहिट ।

कार्यक्रममे बोल्टी अध्यक्ष शाह प्रदेश सरकारके सञ्चार नीति समावेशिताके सिद्धान्त अनुरुप नानेक् पर्नामे पत्रकार महासंघ सम्बन्धित पक्षहे दवाव सिर्जना करटी आइल बटैलै । सञ्चार नीति आइलपाछे ओहे अनुसार सञ्चारगृहभिट्टर फेन समावेशिता लागुु हुइना ओ सक्कु पक्षके सवाल समेटजिना उहाँके जोड रहे ।

फोनिजके केन्द्रीय सल्लाहकार गणेश चौधरी सञ्चारगृहभिट्टर समावेशिता नैहुुइलओरसे जनजातिहुकनके भाषा, संस्कृति, परम्परावारे पूर्ण जानकारीके कमीसे स्वयम सञ्चारगृहहे अप्ठेरो हुइटी आइल बटैलै । साथे गलत सूचना सम्प्रेषण फेन हुुइटी रहलओरसे सञ्चारके विकासको लाग सञ्चारगृह समावेशी हुइना जरुरी रहल केन्द्रीय सल्लाहकार चौधरीके कहाइ बा ।

नेपाल आदिवासी जनजाति महासंघ सुुदूरपश्चिम अध्यक्ष दलबहादुर घर्तिमगर राज्यके अंगके साथे सञ्चारगृह समेत समावेशी नैहुइलओरसे आदिवासी जनजातिलगायत सीमान्तकृत समुदायके मुद्धा तथा सवाल ओझेलमे परटी गैल बटैलै । मुलुकके सन्तुलित विकासके लाग फेन हरेक अंगमे समावेशी हुुइर्ना जरुरी रहल अध्यक्ष घर्तिमगरके जोड रहे ।

कार्यक्रममे सहभागी पत्रकारहुक्रे सुदूरपश्चिमस्थित सञ्चारगृह समावेशी बनाइक लाग जनजाति पत्रकारहुकनके सख्यात्मक बृद्धि संगे क्षमता विकास जरुरी रहल औल्याइलै । जेकर लाग फोनिजसहित सम्बन्धित पक्ष ध्यान डेहक पर्नामे जोड डेलै ।

कार्यक्रममे नेपाल पत्रकार महासंघ कैलाली शाखा अध्यक्ष जगत साउँद, महासंघके पूर्वकेन्द्रीय उपाध्यक्ष उमिद बागचन, महासंघके पूर्व सुदूरपश्चिम संयोजक मनमोहन स्वाँर, दिलबहादुर छत्याल, कर्ण शाह, थारु नागरिक समाज कैलाली संयोजक दिलबहादुर चौधरी, थारु कल्याणकारिणी सभा कैलालीके कार्य बाहक सभापति माधव चौधरी, पत्रकार शिवराज भट्ट, फोनिज पूर्व जिल्ला अध्यक्ष अनत चौधरी, हेमन्त पौडेललगायत शुभकामना मन्तव्य व्यक्त करल रहिट । फोनिज जिल्ला सदस्य प्रेमलाल चौधरीसे स्वागत मन्तव्य व्यक्त करल कार्यक्रमके सञ्चालन जिल्ला सचिव राम दहितसे हुुइल रहे ।

कैलाली जिल्लामे ४४ जाने आदिवासी जनजाति तथा थारु पत्रकार टमान सञ्चार माध्यममे कार्यरत रहल बाटै । जौनमध्ये २९ जाने नेपाल पत्रकार महासंघके सदस्यता लेले बाटै ।