गुरहीहे साझा टिहुवारके रुपमे मनाइ परल : नगरप्रमुख वड
धनगढी, २० सावन । थारु समुदायसे पुर्खौसे मनैटी आइल गुरही टिहुवारहे सक्कु समुदायके साझा टिहुवारके रुपमे मनाई पर्ना धनगढी उपमहानगरपालिकाके नगरप्रमुख नृपबहादुर वड बटैले बाटै ।
सोम्मारके रोज धनगढीके गुरही चौकमे आयोजित गुरही टिहुवार २०७६ सम्बोधन करटी नगर प्रमुख वड गुरहीहे सक्कु समुदाय आपन साझा टिहुवारके रुपमे लेटी सामूहिक मनाई पर्ना जोड डेहल रहिट । कार्यक्रमके बर्का पहुना समेत रहल नगरप्रमुख वड नेपालीहुक्रनसे मनाजैना डशै, डेवारी, गुरही लगायतके सक्कु टिहुवार सामुहिक मनाइ पर्ना औल्याइल रहिट ।
‘गुरही टिहुवार थारु समुदायके किल टिहुवार नाइहो,’ नगरप्रमुख वड कहलै–‘नेपालमे बैठुइया सक्कु समुदायके साझा टिहुवार हो ।’ टरटिहुवारसे भाइचारा, आपसी सदभाव लगायत समुदायके हरेक व्यक्ति एक औरेक टरटिहुवार बारे जानकारी पैना हुइल ओरसे उहाँ अइना दिनमे सामूहिक रुपमे मनैना आवश्यक रहल औंल्याइल रहिट ।
‘टरटिहुवारसे भाइचारा, आपसी सदभाव कायम करठ,’ नगर प्रमुख वड कहलै–‘सामूहिक रुपमे टरटिहुवार मनैलेसे एक औरेक टरटिहुवार बारे जानकारी कैना फेन टेवा पुगाइठ् ।’
कलेसे थारु समुदायसे मनाजैना सक्कु टिहुवार लगायत धनगढी उपमहानगरपालिका भिट्टर मनाजैना सक्कु टिहुवारके संरक्षण सम्बद्र्धन कैना नगरपालिका तत्पर रहल नगरप्रमुख वड उद्घोष करल रहिट ।
कार्यक्रमके खास पहुनी धनगढी उपमहानगरपालिकाके उपप्रमुख सुशिला मिश्र भट्ट टरटिहुवार आजके युवा पुस्ता मनैना आवश्यक रहल बटाइल रही । दिनप्रति दिन टरटिहुवार लोप हुइटी गैल ओरसे उपप्रमुख भट्ट टरटिहुवारहे युवा पुस्ताहे पुस्तान्तरण कैना फेन अत्यन्त आवश्यक रहल बटाइल रही ।
कार्यक्रममे थारु कल्याणकारिणी सभा कैलालीके उपाध्यक्ष माधव थारु गुरहीके टिहुवारके बारे जानकारी कराइल रहिट । कार्यक्रममे धनगढी उपमहानगरपालिका वडा नं. ८ के वडा अध्यक्ष नारायण बराल, वडा नं. १६ के लक्ष्मी नारायण चौधरी, थारु कल्याणकारिणी सभा कैलालीके पूर्व सभापति प्रभात चौधरी, नेपाल आदिवासी जनजाति महासंघके प्रदेश संयोजक दलबहादुर घर्तीमगर, थारु नागरिक समाजके बसन्ती चौधरी लगायतके पहुना रहल रहिट ।
कार्यक्रममे टमान सांस्कृतक कार्यक्रम फेन प्रस्तुत करगिल रहे । महालोक गायक मनिराम चौधरी, लोक गायक राजु चौधरी, नव गायिका सोनु कुश्मी लगायतके बेजोड प्रस्तुती रहल रहे । ओस्टके टमान डान्स सेन्टरके बेजार डान्स फेन डेखागिल रहे ।
कार्यक्रमके घरगोसिया गुरही असरईना मूल आयोजक समितिके संयोजक उन्नती चौधरी रहटि । कार्यक्रमके सञ्चालन चन्द्र चौधरी चाँद ओ सुनिता चौधरी करल रही । कार्यक्रममे टमान संघसंगठनके सहयोग रहल रहे । ओस्टके धनगढी गुरही चौक स्थित कुश्मी मोवाइल ग्यालरीसे निःशुल्क पानी तथा कार्यक्रमहे भब्यताके साथ सम्पन्न पारक लाग स्वयमसेवक लगायतके जिम्मेवारी बहन करल रहे ।
थारु समुदायके चाडके शुरुवातके रुपमे लेजैना गुरही टिहुवार विगत एक दशक यहोर थारु समुदाय आपन हकअधिकार तथा पहिचानके रुपमे मनैटी आइल बा । थारु समुदायके चाडके शुरुवातके रुपमे गुरहीपर्वहे लेना करजाइठ् । नागपञ्चमीके दिन यी पर्व मनैना हुइल ओरसे यी टिहुवारहे थारु समुदाय देशैभरके थारु समुदाय धुमधामके साथ मनैना करठै ।
थारु समुदायमे ‘गुरही’ मनैनाके अर्थ, नाग बाबाहे पुजा करेबर विषालु सर्प घरमे नाइ अइना, घरमे बाज नाइ मर्र्ना, आगलागी नाइ हुइना, दुःखके बज्रपात नाइ पर्ना, रोगव्याधी ओ महामारी घरमे प्रवेश नाइ कैना विश्वास करजाइठ् । नागबाबाहे घरके द्वारमे टाँसके पूजा कैनाके आशय दुःख, कष्ट ओ रोगव्याधीहे नागबाबासे घरमे प्रवेशसे रोकिट कना हो । यिहीहे नागपञ्चमीके रुपमे फेन मनाजाइठ् ।
थारु समाजमे ‘गुरही, गुर्या’ कहिके मनाजैना यी पर्नहे नेपाली समाज नागपञ्चमी कहिके मनैठै । नागपञ्चमीमे विशेष कैके नेपालीहुक्रे नागबाबाके पूजा–आजा करठै । कलेसे थारु समाजमे ‘गुरही’ पूजा हुइठ् । थारु समाजमे फेन ठाउँअनुसार ‘गुरही’ पर्व फरक फरक ढंगसे मनैना करठै ।
