बाढ पीडित जुटलै बृक्षारोपणमे
धनगढी, ८ सावन । कैलालीके कैलारी गाउँपालिका वडा ५ के बाढ पीडित बैजपुर बृक्षारोपणमे जुटल बाटै । बाढके कारण विस्थापित हुइल गाउँबासी लौव बस्तीक पुरुवओर रहल बनुवाके खाली रहल फँटवा छुटकी ठेप्रिन्हया लगायत ५ विगहा क्षेत्रफलमे ४ हजार टमान जातके टेलुवा लगाइल बैजपुरके पुरान भन्मन्सा प्रकास बौखाही जानकारी डेलै ।
आवश्यक टेलुवा पवेरा सामुदायिक वन उपभोक्ता समूहके सिफारिसमे लौव गाउँबासीहुकनहे बसन्ता रेन्जपोष्ट उपलब्ध कराइल उहाँ जनैलै । खेतीपाती सेकलपाछे फुरसदके समय सदुपयोग करलेक लाग गाउँभरिक महिला, पुरुष टेलुवा लगैनामे जुटल ओ ओकर संरक्षणके लाग अपने लगानीमे तारजालीफे करल भल्मन्सा बौखाही कहलै ।
उहाँ लिप्टीस, औरा, सेमरा, गुलमोहर, बबुर, बाँँस सिसुवा जातके टेलुवा लगागिल बा । ओस्टेक गाउँबासी अपन गाउँघर हरियाली बनाइक लाग प्रत्येक घरेम मनै पाँच–पाँच ठो टेलुवा लगैना सहमति करले बाटै । बबईमे काठी निकारे गैल एक बेपत्ता, एकके उद्धार वर्षासे बर्दियामे ४० घर डुबान, बबईमे बाढके खतरा बर्दिया, ८ सावन । बबई लडियामे बाढके भेलमे काठी निकारे गैल बर्दिया बारबर्दिया नगरपालिका—११ खुन्तीपुरके ३५ वर्षीय बलिराम चौधरी बेपत्ता हुइल बाटै । जब्दीघाटस्थित बबई लडियामे काठुवा संकलन करे गैल उहाँहे बाढ पुहाइलहो ।
उहे ठाँउक ३८ वर्षीय रामभरोस चौधरीहे उद्धार करल प्रहरी उपरीक्षक राजेशनाथ बाँस्तोला बटैलै । उहाँहे बालापुरसे उद्धार करके उपचारके लाग जिल्ला अस्पताल नानल प्रहरी उपरीक्षक बाँस्तोला बटैलै । बेपत्ता रहल चौधरीके खोजी हुइटी रहल बा । बबईमे जलस्तर बह्रनाके साथे काठुवा, काठी संकलन कैना सक्रिय हुइना करल बाटै । यिहे क्रममे चौधरीहे बाढके भुमरी पुहाइल हो । मंगरसे परल अविरल वर्षासे बासगढी नगरपालिका—३ खल्ला बस्तीके ४० घर डुबानमे परल बा ।
डुबानसे मानवीय क्षति नइहुइल जिल्ला प्रशासन कार्यालय जारी करल विज्ञप्तिमे जनाइल बा । वर्षाके कारण बर्दियासे बहना बबई लडियामे जलस्तर बह्रटी गैल बा । जलस्तर बह्रटी जाके तटीय क्षेत्रके बासिन्दा बाढके जोखिममे परल बाटै । बबईके जलस्तर बुधके सकारे ७ बजेसम ५ दशमलव १४ पुगल बा । बबईमे जलस्तर ६ पुग्लेसे बाढ अइना करठ । जल तथा मौसम पूर्वानुमान महाशाखा बिफेसम भारी वर्षा हुइना चेतावनी डेहल बा । स्थानीय प्रशासन बबई लडिया तटीय क्षेत्रके बासिन्दाहे उच्च सर्तकता अपनैना आव्हान करले बा ।
दाङमे पानी नइरोकल ओरसे बबईमे जलस्तर बहैटी जैना खतरा हुइल प्रमुख जिल्ला अधिकारी रामबहादुर कुरुम्बाङ जनैलै । ‘तटीय क्षेत्रके बासिन्दाहे सुरक्षित रहन सर्तक करैले बाटी,’ उहाँ कहलै, ‘कुछ बेरमे तटीय क्षेत्रके बासिन्दाहे सर्तकता अपनैना साइरन बजैना तयारीमे लागल बाटी ।’
बबई लडिया दाङ हुइटी बर्दियासे भारतीय सीमा पुग्न करल बा । दाङमे भारी वर्षा हुइबेर बर्दियामे बाढ अइना करठ । बबईमे जलस्तर बढ्न क्रममे हुइलेसेफे कर्णाली लडियामे जलस्तर स्थिर रहल जिल्ला आपतकालीन सूचना व्यवस्थापन कार्य सञ्चालन केन्द्रके अधिकृत रुपन ज्ञवाली बटैलै । दाङ लगायत पहाडी जिल्लामे वर्षा हुइटी रहल ओरसे बबई लडियामे जलस्तर बह्रना खतरा बह्रल हो । बाढके जोखिम आकलन करटी सेना, प्रहरी लगायत सुरक्षा निकायहे तयारी अवस्थामे बैठना स्थानीय प्रशासन निर्देशन डेले बा ।
