विद्यालय समायोजनमे जटिलता
धनगढी, २४ असार । कैलालीके घोडाघोडी नगरपालिका गैल बरस विद्यालय तथा तह समायोजन प्रक्रिया आघे बह्राइल । नगरपालिका आधारभूत तथा माध्यमिक शिक्षा कार्यविधि, २०७४ बनाके विद्यालय समायोजन तथा तह समायोजन के काम आघे बह्राइल रहे ।
नेपालके संविधान, २०७२ के अनुसूची ८, स्थानीय सरकार संचालन ऐन २०७४ के दफा ११ ९ज० से डेहल अधिकार कार्यान्वयन करेक लाग विद्यालयके गुणस्तर, भौतिक पुर्वाधार, शिक्षाके सिकाई, विद्यार्थीहुक्रनके सहभागिता लगायत टमान वर्गिकरणके आधारमे नगरपालिका छ विद्यालयके समायोजन ओ सात विद्यालयके तह मिलान करल नगर प्रमुख ममताप्रसाद चौधरी बटैठै ।
स्थानीय सरकार संचालन ऐन २०७४ दफा ११ मे आधारभुत तथा माध्यमिक शिक्षाहे गुणस्तर बनाइक लाग सामुदायिक, संस्थागत, गुठी ओ सरकारी विद्यालय स्थापना, अनुमति व्यवस्थापन तथा अनुगमन कैना उल्लेख बा । नगर प्रमुख ममता प्रसाद कहठै– यी ऐनहे टेक्के हम्रे विद्यालय समायोजन तथा आवश्यकता अनुसार कक्षातह घटैना काम आघे बह्राइल हुई । सामुदायिक विद्यालयके स्थलगत अनुगमन करलपाछे गैल बरसके असार ४ गते बैठल कार्यपालिकाके बैठकसे विद्यालय मर्जा तथा कक्षातह घटैना निर्णय करल उहाँ कहठै ।
ओस्टेक कैलारी गाउँपालिकाके सामुदायिक विद्यालयमे रहल नीति स्रोतके शिक्षक व्यवस्थापन हुइ नइसेकलपाछे विद्यालय समायोजन तथा कक्षातह घटुवा प्रक्रियामे पुगे नाइसेकल हो । शिक्षा शाखा प्रमुख गणेश प्रसाद मिश्रके अनुसार कैलारी गाउँपालिकामे रहल सामुदायिक विद्यालयहे मर्ज कैना आवश्यक विल्गाइल मने नीति स्रोतके शिक्षक व्यवस्थापन हुईनइसेकलपाछे जटिलता अइटी रहल बटैलै ।
विद्यालय मर्ज तथा कक्षा समायोजनके लाग गृहकार्य हुइटी रहल ओरसे आवश्यक छलफलपाछे प्रक्रियामे जैना उहाँ कहलै । यी गाउँपालिकाके एक ठो विद्यालय मर्ज हुइल मने औपाचारिक घोषणा बाँकी रहल बटैलै ।
कैलाली गाउँपालिकामे ४९ ठो सामुदायिक विद्यालय रहल मे कुछ विद्यालयमे आवश्यकतासे ढेर दरबन्दी बा, कुछ विद्यालयमे दुईरतीन ठो दरबन्दी बा, शाखा प्रमुख मिश्र कहलै । विद्यालयके शिक्षक समायोजन काम संघीय नीति बनसेकलपाछे सहजुल हुइना उहाँ कहलै ।
जोशीपुर गाउँपालिकाके शिक्षा शाखा प्रमुख योगेश जोशी विद्यालयके नक्सांकनके तयारीेमे रहल बटैलै । विद्यालय नक्सांकन हुसेकलपाछे केल विद्यालय मर्ज प्रक्रिया आघे बह्री, शाखा प्रमुख जोशी कहलै– ‘अब्बे विद्यालयमे कक्षा बढुवा घटुवाके काम नइहो, नक्साङकनपाछे सक्कु काम आघे बह्री । २३ ठो सामुदायिक विद्यालय रहलमे ४ ठो विद्यालयमे नमूना विद्यालयके रुपमे आघे बह्राइल प्रमुख जोशी कहलै । ओस्टेक, कैलाली जिल्लामे १३ स्थानीय तहमध्ये १ स्थानीय तह बाहेक विद्यालय समायोजन, कक्षा समायोजन प्रक्रियामे जइ नैसेकल हुइटै । पहाडी क्षेत्रमे रहल स्थानीय तहके विद्यालयमे विद्यार्थी संख्या न्यून रलेसे फेन भौगोलिक विकटताके कारण समायोजन कैना झन अप्ठ्यारो डेखल बा ।
घोडाघोडीके १३ ठो विद्यालयके समायोजन
कैलालीके घोडाघोडी नगरपालिकाके १३ ठो विद्यालय समायोजन तथा तह समायोजन करल बा । आधारभुत तथा माध्यमिक शिक्षा कार्यबिधि २०७४ बनाके ६ ठो विद्यालय समायोजन तथा ७ ठो तह समायोजनके काम आघे बह्राइल नगरपालिका जनैले बा ।
कार्यपालिकाके निर्णय अनुसार विद्यालय समायोजना प्रक्रिया आघे बह्रैटी घोडाघोडी नगरपालिका–२ चितलपुरमे रहल मसानी आधारभुत विद्यालयहे दशरथ मावि साडेपानीमे समायोजन कैगिल रहे । वडा नम्बर ४ जनकपुरके मेलघट्टी मा।वि के ९ ओ १० कक्षा तह घटाके गणेशपुरमे अवस्थित सीताकुण्ड माविमे व्यवस्थापन करल बा ।
वडा नम्बर ४ माघीमे रहल नव प्रभात प्रावि ओ राष्ट्रिय लालीगुँरास प्रावि गैडाखेडाहे राष्ट्रिय लालीगुँरास प्राविमे कक्षा ५ सम संचालन करल रहे । वडा नम्बर ४ शितलपुरमे रहल कालिका आधारभुत विद्यालयके कक्षा ६,७ ओ ८ तह घटाके वडा नम्बर १० पहलमानपुरमे अवस्थि कान्तिराज्य लक्ष्मी माविमे व्यवस्थापन कैगिल बा । वडा नम्बर ८ तिलकनगरमे रहल मोहनी आधारभूत विद्यालयके कक्षा ६,७ ओ ८ तह घटाके तारानगरमे अवस्थित राष्ट्रिय मावि मे व्यवस्थापन कैगिल बा ।
वडा नम्बर ८ आम्फाँटामे रहल अनग्रह प्रा।वि कक्षा ४ ओ ५ तह घटाके राष्ट्रिय मा।वि तारानगरमे व्यवस्थापन करल बा । वडा नम्बर ६ कल्जुकी मे रहल दीपज्योति प्रा।विहे राष्ट्रिय मावि मे व्यवस्थापन करल बा । वडा नम्बर १ डुडापारीमे रहल जनप्रगतिशिल आधारभूत विद्यालयके ६, ७ ओ ८ कक्षा तह घटाके वडा नम्बर ८ दिपनगरमे अवस्थित मेलघट्टी मावि मे व्यवस्थापन करल बा ।
वडा नम्बर ९ गोदनीमे रहल मोहन्याल आधारभुत विद्यालयके कक्षा,६,७ ओ ८ हे तह घटाके कालिका मावि खल्लाखेतमे व्यवस्थापन करल बा । वडा नम्बर ९ रतिपुरमे रहल शान्ति आधारभुत विद्यालयहे वडा नम्बर ४ गणेशापुरमे अवस्थित सीताकुण्ड माविमे व्यवस्थापन कैना हुइल बा । वडा नम्बर १० सिसैयामे रहल दशरथ प्रावि हे अमर शहिद स्मृति आधारभुत विद्यालय लठैयामे समायोजन करल रहे ।
ओस्टेक वडा नम्बर १२ मे खोपामे रहल वाल प्रावि के कक्षा ४ ओ ५ तह घटाके नकफोडुवा अवस्थित राष्ट्रिय माविमे व्यवस्थापन करल रहे । वडा नम्बर १२ शिवपुरमे रहल राजाराम प्रावि हे वाल प्रावि खोपामे समायोजन करल बा । वडा नम्बर १२ वनबर्षामे अवस्थित शिव प्रावि हे राष्ट्रिय मा।वि नकफोडुवामे समायोजन करल बा । ओ वडा नम्बर १० शिखरझाला रहल सरस्वती मा।विके ६,७ ओ ८ कक्षा तह घटाके वडा नम्बर ९ खल्लाखेतमे अवस्थित कालिका माविमे व्यवस्थापन करल बा ।
यहोर विद्यालय मिलान करेबेर ढेर विद्यार्थी ओ नीजि शिक्षक मर्कामे परल कहटी सामुदायिक विद्यालयमे कार्यरत शिक्षक शिक्षिका आन्दोलनमे उत्रल रहिट ।
घोडाघोडी नगरपालिका–१०, लठैया गाउँमे रहल अमर शहिद आधारभूत विद्यालय जहाँ दशरथ प्रावि सिसैया समायोजन हुके आइल रहे ।
नगरपालिकासे आघे सारल विद्यालय तह मिलान तथा विद्यालय मिलान प्रक्रिया खारेज, निजी स्रोत शिक्षकहुक्रनहे नगर शिक्षक घोषणा कैके सेवा सुविधा ओ पेशाके ग्यारेन्टी करे पर्ना मागके साथे आन्दोलन सुरु करल करल रहिट ।
मने सामुदायिक विद्यालयके शिक्षाहे वैज्ञानिक ओ गुणस्तरीय बनाइक लाग विद्यालय मर्ज करे परल घोडाघोडी नगर प्रमुख ममता प्रसाद बटैठै । निजी श्रोतके शिक्षक, शिक्षिकाहुक्रनके व्यवस्थापनके लाग फेन पहल हुइटी रहल उहाँके कहाइ बा । विद्यालय मिलान ओ तह मिलान हुइबेर कार्यरत विद्यालयके शिक्षक ओ शिक्षिकाहे छुट्टे व्यववस्था करे लागल ओरसे नाइ अँट्याइना उहाँ आग्रह करलै ।
ओहोर विद्यालय समायोजन तथा तह घटुवा प्रक्रिया आघे बह्र्रैलेसेफे उच्च अदालत दिपायलसे कैलालीके घोडाघोडी नगरपालिकासे करल विद्यालय समायोजन ओ तह घटुवाके निर्णय कार्यान्वयन नइकरैना अन्तरिम आदेश जारी करले बा ।
विद्यालय समायोजना नइकैना उच्च अदालतके अन्तरिम आदेश
कैलालीके घोडाघोडी नगरपालिकासे करल विद्यालय समायोजन तथा तह समायोजनके निर्णय कार्यान्वयन नइकरैना उच्च अदालत दिपायल आन्तरिम आदेश जारी करल बा ।
घोडाघोडी नगरपालिका असार ४ गते नगरपालिकाअन्र्तगतके ७ ठो विद्यालयके समायोजन ओ ९ ठो विद्यालयके तह घटुवा कैना निर्णय करल रहे । मने समायोजन ओ तह घटुवा विरुद्ध विद्यालय व्यवस्थापन समितिसे दारल रिट निवेदन उप्पर २०७५ साल भदौ २१ गते विफेक रोज अदालतसे सुनुवाई करटी आन्तरिम आदेश जारी करल रहे ।
नगरपालिकाके निर्णयविरुद्धमे सरस्वती मावि सिखरझाला, मेलकट्टी मावि जोनापुर, शिव प्रावि बनवर्षा, वाल प्रावि खोया, दशरथ प्रावि शिसैया, शान्ति निमावि रतिपुर ओ मसाने निमावि के विद्यालय व्यवस्थापन समिति तथा अभिभावकहुक्रे उच्च अदालतमे रिट दर्ता करैले रहिट ।
घोडाघोडी नगरपालिकाके प्रमुख ममताप्रसाद न्यून विद्यार्थी संख्या, आसपास अन्य सामुदायिक विद्यालय रहल ओ भौतिक पूर्वाधार तथा शिक्षकके आवश्यकता लगायत तमान पक्ष अध्ययन करके ८ विद्यालय समायोजन ओ ९ विद्यालयके तह घटुवा कैना कैना सर्वपक्षिय सहमतिमे करल दाबी करलै ।
विद्यालयके स्रोत, पूर्वाधार ओ शैक्षिक गुणस्तरमे सुधार करे सेक्ना उद्देश्यसे विद्यालय समायोजन आवश्यक रहल ओरसे कक्षा तह रख्ना निर्णय हुइल नगरप्रमुख बटैठै । लग्गेक पूर्वाधार सम्पन्न दुसर विद्यालयमे विद्यार्थी संख्या कम हुइल ओरसे समायोजन करल हो ।’ उहाँ कहलै– माध्यमिक तहके एक ठो कक्षामे ४/५ ठो विद्यार्थी हुइना, विषयगत शिक्षक ओ पूर्वाधार फे नइरहल स्कूलके तह घटाइल हो ।’ समायोजन प्रक्रियासे विद्यार्थी ओ शिक्षक अभाव हटके गाउँमे एक ठो सुविधा सम्पन्न गुणस्तरीय विद्यालय संचालन हुइना नगर प्रमुख ममता प्रसाद बर्टैठै । नगरपालिकाके उद्देश्य सामुदायिक विद्यालयके स्तरसुधार कार्यक्रम अन्र्तगत बन्द हुइना अवस्थामे पुगल विद्यालय खारेजी भर नइकरल उहाँ बटैठै ।
गुणस्तर बृद्धि, विद्यालय लगानीमे सुनिश्चित ओ व्यवस्थापनमे सुधार हुइना प्रमुख ममता प्रसाद के दाबी बा । उहाँ राष्ट्रिय मावि ओ राजराम प्राविमे विद्यार्थी नइहुके अपनही बन्द हुइल बटैलै । ओकर संरचना बेबारिसे हुइल रहे । दरबन्दीके शिक्षक तलब खैटी रहिट । यिहीहे गाँभेबेर मजा नइहुइल टे रु उहाँ कहलै, और फे यिहे हालतमे पुग्टी रहिट । ओसिनहे गाँभल हो ।’ विरोध करुइया अपन निहित स्वार्थके कारण लागि परल उहाँक दाबी बा ।
नगरप्रमुख चौधरी अदालतसे हुइल अन्तरिम आदेशके सम्मान करटी करटीफे विद्यालय समायोजन हुसेकल अवस्था रहल बटैलै ।
गाँभल विद्यालय पुराने भवनमे लौटे सेक्ना अवस्था नइहो उहाँ कहलै, विद्यार्थीहुक्रे भर्ना हुके मिलान करसेकल बाटी ।’ उहाँ भौतिक संरचनाके केल समायोजन कैना बाँकी रहल बेला आइल अन्तरिक आदेशके सम्मानसम केल करे सेक्ना बटैलै ।
अदालतके आदेश पाछे विद्यालय लौटल मने शिक्षक ओ विद्यार्थी नइलौटलै
घोडाघोडी नगरपालिकासे करल विद्यालय समायोजन तथा तह समायोजनके निर्णय कार्यान्वयन नइकैना उच्च अदालत दिपायलसे अन्तरिम आदेश जारी करलपाछे दशरथ प्रावि शिसैया कुवाँर २ गतेसे अपने भवनमे पह्राई सुरु कैना तम तयार हुइल ।
८५ जने विद्यार्थी रहल उ विद्यालयमे पहिल दिन १८ जाने विद्यार्थी विद्यालयमे उपस्थित हुइल विद्यालय व्यवस्थापन समितिके अध्यक्ष रजिनादेवी चौधरी बटैली । घोडाघोडी नगरपालिका भित्तरके विद्यालयहे समायोजना कैना कहलपाछे उ विद्यालय गैल भदौ २ गतेसे बन्द हुइल रहे । दशरथ प्राविहे अमर शहिद माविहे समायोजना करलपाछे विद्यार्थीनहे अमर शहिदमे पह्रे जैना अप्थ्यारो परटी रहे विद्यालय व्यवस्थापन समितिके अध्यक्ष रजिना बटैली ।
घोडाघोडी नपा–११ स्थित दशरथ प्रावि
विद्यालय समायोजना हुइलपाछे भलहुवा टोलके विद्यार्थीनहे अमर शहिदमे पह््रैना समस्या परल उहाँ बटैली । उ विद्यालय जाईक लाग विचमे भडेनी कुलुवा परल ओ थोरा दुर हुइल कारण दर्जनौ विद्यार्थीनहे पह्राई समेट प्रभावित हुइल अध्यक्ष रजिना बटैली ।
उच्च अदालत दिपायल डोटीसे घोडाघोडी नगरपालिका–११ स्थित अमरशहिद आधारभूत विद्यालय, लठैया कैलालीके नाउँमे २०७५ भदौ २२ गते सूचना पठाके नगरपालिकाके निर्णय कार्यान्वयन नइकरैना कहिके पत्र आइल विद्यालयके प्रअ खुशीराम चौधरी बटैलै ।
अदालतसे विद्यालयहे प्राप्त सूचनामे उप्रान्त रिट निवेदक विद्यालय व्यवस्थापन समितिके अध्यक्ष रजिनादेवी चौधरी विपक्षी सामाजिक विकास मन्त्रालय प्रदेश नं। ७ समेत रहल उत्पे्रषण परमादेश समेट रिट निवेदन मिति २०७५ भदौ २१ गते इजलास समक्ष पेश हुके प्रस्तुत निवेदनके टुङ्गो नइलागतसम मिति २०७५ असार ४ गते हुइल निर्णय कार्यान्वयन नइकरैना कहिके विपक्षीहुकनके नाउँमे अन्तरिम आदेश जारी हुइल विद्यालयके प्रअ खुशीराम बटैलै ।
दशरथ प्राविहे अमरशहिद आधारभूत विद्यालयमे समायोजनासंगे दशरथके ८५ विद्यार्थी ओ तीन राहत दरबन्दी शिक्षकहे अमर शहिदमे जैना कहिगिल रहे । नगरपालिकाके निर्णय कार्यान्वयन नइकरैना उच्च अदालतके अन्तरिम आदेश जारीपाछे दशरथ अपने विद्यालयमे सुरु कैना कहल मने विद्यार्थी ओ शिक्षक नइलौटलै । विद्यार्थी नइलौटलपाछे लौव शैक्षिक शत्रमेफे दशरथमे १३ जाने विद्यार्थी रहल बाल कक्षाकेल संचालन हुइटी रहल बा ।
अमर शहिद आधारभूत विद्यालयके प्रअ खुशीराम अब्बे दशरथ प्राविमे संचालन हुइटी आइल बाल विकासके शिक्षकहे अपन विद्यालयसे तबल खबैटी आइल बटैलै । प्रअ चौधरी कहलै–‘दशरथ प्राविके तीन राहात शिक्षकहे अमर शहिदमे काज सरुवा करल बा ओइने यिहे पह्रैठै ।’
ओस्टेक घोडाघोडी नगरपालिका–१० शिखरझालामे रहल सरस्वती मा।विके कक्षा तह समायोजन वडा–९ खल्लाखेतमे अवस्थित कालिका माविमे व्यवस्थापन करल मने अदालतके आदेशपाछे अपने विद्यालयमे १० कक्षासम पठनपाठन करटी रहल विद्यालयके प्रअ अमर रावत बटैठै ।
घोडाघोडीके सक्कु विद्यालयहे नमूना बनैना योजना
घोडाघोडी नगरपालिकाके प्रमुख ममताप्रसाद चौधरी नगरपालिकाभिटर रहल सक्कु विद्यालयहे नमूना विद्यालय बनैना योजना बनाके आघे बह्रल बटैले बाटै । विद्यालय समायोजन ओ तह समयोजनके काम सक्कु होसेकल ओरसे आब नगरभिटरके सक्कु विद्यालयमे नमूना बनैना योजना अनुसार आघे बह्रल उहाँ कहठै । नगरपालिका शिक्षाहे भारी प्राथमिकतामे धारके यी वर्ष साढे ४ करोड निशर्त बजेट विनियोजन ओ
शसर्त ओर २० करोड बजेट छुटयाके विद्यालयहे नमूना बनैना काम आघे बह्रल नगरप्रमुख ममता प्रसाद कहठै । विद्यालय संचालन, व्यवस्थापन अनुदान डेना नीजि स्रोतमे रहल शिक्षकहुकनके लाग सहयोग पुगे अनुदान डेना तयारीमे रहल रहल उहाँ जनैलै ।
शिक्षाहे कडा ढंगसे सुधार कैनामे लागल बाटी नगरप्रमुख कहलै– ‘नगरमे रहल सक्कु विद्यालय नमूनाके रुपमे विकास कैना चाहठी ओ नमूना बनाइक लाग सहयोग कार्यक्रम संचालनफे हुइल करठी ।’ शिक्षण सिकाईके लाग थप प्रोत्साहन पुगे कहिके एक वडामे एक आधारभूत विद्यालयमे पाँच लाखके दरसे ओ ४ ठो विद्यालय माविहे १०र१० लाख रुप्याके दरसे बजेट विनियोजन करल नगरप्रमुख ममता प्रसाद कहलै ।
दशरथ मावि साडेपानी केन्द्रीय नमूना विद्यालयमे परल बा, उहाँ कहलै– ‘नमूना विद्यालयके प्रोफरमेन्सके आधारमे मुल्याङकन करके सहयोग उपलब्ध करैबी ।
स्थानीय सरकारके हैसियतसे बालमैत्री अपाङमैत्री विद्यालयके लाग नगरपालिका आघे बह्रल उहाँ कहलै । नगरपालिकास्थित राष्ट्रिय मावि सुखडमे सात नम्बर प्रदेशके एक ठो बहुआपाङमैत्री आवसिय विद्यालय केन्द्रीय कार्यक्रममे परके यिहे १४ गते शिक्षा विज्ञान तथा प्रविधि मन्त्री गिरिराजमणी पोखरेलसे शिलान्यासफे हुसेकल बा । यी आवसीय विद्यालय बनसेकलपाछे यी प्रदेशके जटराफे अपाङता रहल विद्यार्थी पह्रे सेक्ना ओ स्याहार सम्भार समेट हुइना नगरप्रमुख चौधरी बठैठै ।
कैलारीके एक वडामे एक नमूना विद्यालय
कैलारी गाउँपालिकामे रहल सामुदायिक विद्यालयके गुणस्तरीय शिक्षामे ध्यान डेटी एक वडामे एक ठो नमूना विद्यालय बनाइल शिक्षा शाखा प्रमुख गणेश प्रसाद मिश्र बटैलै । वडा नम्बर १ रानामुडामे रहल जनसेवा प्रावि, वडा–२ कैलारीमे रहल कैलाली जनकल्याण आधारभुत विद्यालय, वडा–३ मे रहल टिसिएनमे रहल कालिका प्रावि, वडा–४ मे रहल भित्तरियामे रहल कालीमाईं आधारभूत, वडा–५ मनिकापुरमे रहल मनकामना प्रावि, वडा–६ बेनौलीमे रहल अपरम्पार आधारभूत विद्यालय, वडा–७ रामपुरमे रहल जनता आधारभूत विद्यालय, वडा–८ मे उत्तरकटैनीमे रहल जनता आधारभूत विद्यालय ओ वडा–९ बनकट्टामे रहल शिव शक्ति आधारभूत विद्यालयमे नमूना विद्यालय बनाइल बा ।
नमूना बनाइल विद्यालयके बाल विकाससे ३ कक्षासम आर्कषणके बनैना, विद्यार्थीके संख्या बह्राइक लाग ओ गुणस्तरीय शिक्षा डेहक लाग नियमित अभिभावकहुकनके उपस्थितिमे टमान मेरिक गतिविधि करटी आइल शाखा प्रमुख मिश्र बटैलै । नमूना विद्यालय बनाइक लाग गाउँपालिकासे पाँच लाख रुप्या बजेट छुटयाइलमे सिसि क्याम्रा, कम्यूटर लगायत सामन डेहल बा कलेसे नमूना बनाइक लाग चिल्ड्रेन पार्क, भौतिक पूर्वधारओर ध्यान डेहल उहाँ बटैलै ।
विद्यार्थी नइहुके विद्यालय बन्द
जिल्लाके कैलारी गाउँपालिका वडा नम्बर ८ लौसास्थित जनता प्राथमिक विद्यालयमे विद्यार्थी भर्ना नैहुइलपाछे बन्द हुइल हो ।
गैल बरसके चालु शैक्षिके सत्रमे कक्षा १ से ५ समक कौनो फेन तहमे विद्यार्थी भर्ना नैहुइलपाछे बन्द कराइ परल विद्यालय व्यवस्थापन समितिके अध्यक्ष जगतराम कठरिया बटैलै ।
विद्यालय सञ्चालन करेक लाग ढिउर कोसिस करल जिकिर कहटी उहाँ कहलै–अइना दिनमे आधुनिक गुणस्तरीय शिक्षाके लाग पहल हुइटी रहल ओरसे विद्यार्थी अइलेसेफेर फेर विद्यालय सञ्चालन करबी ।’
२०५० सालमे स्थापना हुइल विद्यालयमे कुछ बरस आघेसम २ सय जानेसम विद्यार्थी अध्ययनरत रहिट । शैक्षिक सत्र ०६९/०७० मे उ विद्यालयमे कक्षा ८ समके पठनपाठन हुइल रहे । मने पछिल्का समय उ विद्यालयमे विद्यार्थी संख्या घट्टी आइल रहे । विद्यार्थीके आभावमे एक से पाँच बन्द हुइलपाछे अब्बे उ विद्यालयमे बाल विकास केन्द्र किल सञ्चालनमे रहल बा । बाल विकास केन्द्रमे जम्मा १६ जाने किल विद्यार्थी रहल बाल विकास केन्द्रके शिक्षिका प्रेमकुमारी कठरिया बटैठी ।
विद्यार्थी भर्ना नैहुइलपाछे विद्यालयके शिक्षकहुक्रे औरे विद्यालयमे काज सरुवा हुइल बाटै । ३ जाने राहत दरबन्दी, २ जाने बाल विकास केन्द्र शिक्षक ओ १ जाने कार्यालय सहयोगी करके यीे विद्यालयमे ६ जाने शिक्षक कार्यरत बाटै ।
विद्यालय बन्द हुइलपाछे उ विद्यालयके प्रअ समेट रहल शिक्षक गोरख बहादुर नेपाली जनता आधारभूत टेढीमे, लक्ष्मीदेवी महतो अपरम्पर आधारभूत बेनौलीमे ओ गम्भीरा महतों दुधियाके बाल कल्याणमे काज सरुवा करल कैलारी गाउँपालिका शिक्षा शाखा प्रमुख गणेशप्रसाद मिश्र बटैलै ।
