कैलारी गापा ८ तमान शीर्षकमे दुई लाख ९३ हजार रुपैयाँ राजस्व संकलन
उदासीपुर, २० बैशाख । कैलारी गाउँपालिका वडा नम्बर ८ वडा कार्यालयके सार्वजनिक सुनुवाइमे तमान शीर्षकमे दुई लाख ९३ हजार रुपैयाँ राजस्व संकलन करल जानकारी देले बा । बिफेक रोज पृथ्वीपुरमे सम्पन्न हुइल सुनुवाईमे वडाके सचिब तुलसीराम चौधरी बटैले ।
कैलारी गाउँपालिकाके आयोजना ओ नेपाल आदिवासी जनजाती पत्रकार महासंघ (फोनिज) के सहजीकरणमे सार्वजनिक सुनुवाइ हुइल हो । वडा अध्यक्ष दुखीराम कठरियाके अध्यक्षतामे हुइल कार्यक्रममे वडा सचिव तुल्सीराम चौधरी चालु आर्थिक वर्षके बजेट, कार्यक्रम ओ योजनाबारे प्रस्तुति करल रहिट ।
चालु आर्थिक बरसमे वडा कार्यालयमे जम्मा २६ योजना रहलमे अधिकांश सञ्चालित अवस्थामे रहल उहाँ जनैलै । ओस्टके डगरा, बाटो ग्राभेल, तालिम लगायत आठ ठो योजना चैत मसान्तसममे सम्पन्न हुइल उहाँ जानकारी डेलै ।
तटबन्ध निर्माण, बाटो ग्राभेल, भवन, धर्मशाला निर्माण लगायतके योजना सञ्चालित अवस्थामे रहल जनाइल बा । ओस्टके, उ वडासे चालु आर्थिक बरसके चैत मसान्तसम मालपोत वाफत दुई लाख ५९ हजार रुपैयाँ ओ तमान शीर्षकमे दुई लाख ९३ हजार रुपैयाँ राजस्व संकलन करले बा । ओस्टके, व्यक्तिगत घटना दर्तामे जन्मदर्ता १५८, मृत्यु दर्ता १९, विवाह दर्ता ७१ ओ बसाइँ सराइँ दर्ता १६ ठो हुइल जनाइल बा ।
कार्यक्रममे वडा अध्यक्ष कठरिया सहभागीनसे पुछल प्रश्नके जवाफ डेटी योजना ओ बजेट जुनसुके पार्टीके व्यक्ति लन्लेसे वडा कार्यालय ओकर स्वागत कैना बटैलै । उहाँ विकास निर्माणमे तछाड मछाड कैनासे फेन सक्कुहुनके सहयोग, सल्लाहमे आघे बहैना आवश्यक रहल बटैलै ।
अध्यक्ष कठरिया वडामे विकास करक लाग सक्कु व्यक्ति मिलके आघे बह्रना आवश्यक रहल उल्लेख करटी जनप्रतिनिधिसे हुइल कमीकमजोरी औंल्याइना फेन आग्रह करलै । ‘कमी कमजोरी औंल्या डेलेसे सुधार कैके आघे बह्रना सहज हुइ’, उहाँ कहलै ।
ओस्टके कार्यक्रममे नेकपाके नेता जंगबहादुर चौधरी विकासके लाग जनप्रतिनिधिसे सक्कुहुनसे हातेमालो कैके आघे बह्रना आवश्यक रहल बटैलै । उहाँ कृषकहे दक्ष बनाइक लाग कृषक भ्रमणसहितके योजना बनैना जरुरी रहल औंल्याइलै ।
ओस्टके, प्रतिपक्षी दल नेपाली काङग्रेसके क्षेत्रीय सभापति खेमराज चौधरी विकास निर्माणके कार्य सक्कुहुनके साझा रहल बटैलै । उहाँ विकास निर्माणके कार्यमे कोइ फेन पूर्वाग्रही नाइ हुइना उल्लेख करलै ।
कार्यक्रममे अनिता चौधरी वडामे ढिउर बजेटके योजना अइलेसे गुपचुपमे उपभोक्ता समिति गठन हुइना करल कहटी खबरदारी करली । ‘दुई/तीन लाखके योजनाके भलमन्सामार्फत गाउँभरके मनैनहे बोलाके उपभोक्ता समिति गठन हुइठ्’, उहाँ आघे थप्ली–‘मने, बरा बरा योजना आइलपाछे कोठाभित्तर गुपचुपमे उपभोक्ता समिति बनैना कार्य हुइटी रहल बा । यी मजा नाइहो ।’
