समाज परिवर्तन आपनसे सुरुवात कैना जरुरी : मन्त्री सुवेदी
धनगढी, १७ बैशाख । सुदूरपश्चिम प्रदेशके सामाजिक विकास मन्त्री कृष्ण प्रसाद सुवेदी सामाज परिवर्तन आपनसे सुरुवात करे पर्ना बटैले बाटै ।
सामाजमे व्याप्त रहल कुरिती कुसंस्कार, अन्धविश्वास, रुढीबादी परम्पराहे पूर्ण रुपमे हटाके सभ्य समाज निर्माणके लाग पहिले अपने परिर्वतन हुइ पर्ना मन्त्री सुवेदी जोड डेहल हुइट । मंगरके रोज धनगढीमे आयोजित महिला हक अधिकार संरक्षण सम्बन्धी ऐन, कानून, निती तथा योजना तर्जुमा सम्बन्धी स्थानीय जनप्रतिनीधीहुक्रनके प्रदेश स्तरीय सम्मेलनहे सम्बोधन करटी मन्त्री सुवेदी प्रदेश भित्तर रहल रुढीबादी परम्परा बोक्सी, छाउपडी, महिला हिंसा, जातीय छुवाछुट लगायतके कुरीति कुसंस्कार हटाइक लाग आपन सोच बद्लटी अपनेसे सरुवात करे पर्ना औंल्याइल रहिट ।
यिहे बिच मन्त्री सुवेदी कार्यक्रममे सहभागी जनप्रतिनीधीहुक्रनसे जनप्रतिनीधी हुइल पाछे विकास निर्माण, गरिव विपन्न, दलित समुदायके हकअधिकार, निती नियम, ऐन कानुन निर्माण तथा कार्यान्वयमे कत्राके भूमिका रहल बारे प्रश्न करल रहिट ।
कार्यक्रममे संघीय सांसद अनुगमन समितिके सभापति निरा जैरु दलित समुदायके समग्र विकासके लाग प्रदेश सरकारसे आवश्यक बजेट विनियोजन करे पर्ना बटाइल रही । कलेसे दलित समुदाय फेन आपन हक अधिकार तथा सरकारसे डेना सक्कु अवसर पाइक लाग चनाख हुइ पर्ना बटाइल रही ।
कार्यक्रममे सुदूरपश्चिम प्रदेशके मुख्य न्यायधिवक्ता कुलानन्द उपाध्याय समाज परिवर्तनके लाग अभियान चलाइ पर्ना औंल्याइल रहिट । यकरसाथे उहाँ आपनहे अपनहे परिर्वतन करे पर्ना फेन आवश्यक रहल बटाइल रहिट ।
ओस्टके प्रदेश सांसद टेक बहादुर रैका, दिल्लीराज पन्त, दिव्यश्वरी शाह फेन समाजमे व्याप्त रहल कुरिती कुसंस्कार, रुढीबादी परम्परा बोक्सी, छाउपडी प्रथा, जातीय छुवाछुट हटाइक लाग पुरान संस्कारहे परिवर्तन करे पर्नामे जोड डेहल रहिट । यकरसाथे उहाँहुक्रे पाइल अधिकारहे सदुपयोग करटी आवश्यक अधिकारके सक्कु जाने जागरुक हुइ पर्ना औंल्याइल रहिट ।
कार्यक्रममे दलित महिला संघके संस्थापक अध्यक्ष दुर्गा सोव दलित महिलाहुक्रनहे आर्थिक, सामाजिक, राजनीतिक, शिक्षा, स्वास्थ्य लगायतके क्षेत्रमे अधिकार सुनिश्चित हुइ पर्ना जोड डेहल रही ।
ओस्टके त्रिवेणी नगरपालिका बाजुराके उपाध्यक्ष राधिका सुनार फेन दलित महिलाहुक्रे आपन हक अधिकारके लाग एकजुट हुइ पर्ना बटाइल रही ।
दुई दिने प्रदेश स्तरीय सम्मेल कार्यक्रम दलित महिला संघके आयोजना तथा सामाजिक विकास मन्त्रालय ओ धनगढी उपमहानगरपालिकाके सहयोगमे हुइटी रहल बा ।
