थरुहटके राष्ट्रिय भेलासे साझा एजेण्डासहित सशक्त आन्दोलन कैर्ना घोषणा
बर्दिया, १७ चैत । थरुहट थारुवान पक्षधर नेताहुक्रे साझा एजेण्डा तय करके सशक्त आन्दोलन कर्ना घोषणा कर्ले बाटै ।
थारु कल्याणकारिणी सभाके जिल्ला सभापतिहुकनके संयुुक्त आयोजनामे बर्दियाके ठाकुरद्वारमे हुुइल थरुहट आन्दोलन ओ आबके डगर विषयक राष्ट्रिय भेलाके सहभागी नेताहुुक्रे साझा एजेण्डा बनाके राज्य विरुद्ध सशक्त आन्दोलन कर्ना बटैले बाटै ।
तराईके सक्कुु जिल्लामे आन्दोलनके कार्यक्रम कर्ना बटैटी उहाँहुक्रे प्रदेश सरकारके मुुख्यमन्त्री, जिल्लास्थित प्रमुख जिल्ला अधिकारीहुुकनमार्फत सरकारहे ज्ञापनपत्र बुझैना, सडक संघर्ष बटैले बाटै ।
राष्ट्रिय सभा सदस्य एंव थारु नेता हरि चौधरी (उत्सव पहिचान तथा थरुहट÷थारुवान पक्ष नेताहुुक्रे साझा एजेण्डामे केन्द्रीत होको आघे बह्रेक पर्नामा जोड डेलै । उहाँ कहलै–‘जातिय स्वाशासन ओ अग्रअधिकारवारे स्पष्ट गाइडलाइन बनाके आघे बह्रेक परी ।’
टीकापुर घटनाहे राजनीतिक घटनाके रुपमे बनाइक लाग सरकारहे दवाव डेना जरुरी रहल फेन उहाक्े कहाईभ रहे ।
भेलामे नेपाली काँग्रेसके नेता एंव थरुहट नेता गोपाल दहित फेन आब थरुहट आन्दोलनके निकासके लाग साझा एजेण्डा बनाके आघे बह्रनाके विकल्प नैरहल बटैलै ।
‘लौव संविधानसे पहिचान स्वीकार करसेकल ओरसे आब पहिचानके लाग नाई अधिकारके लाग लड्न जरुरी बा । मने २÷३ बरसमे अधिकार स्थापित हुुई कना दिवास्वप्न किल हुुई । हमार लडाई एक्के जातिके लाग लडाई नैहोके सक्कुहनके लाग हुुइलओर सक्कुु पक्ष संयुुक्त रुपमे आघे बह्रेक पर्ना बा ।’
भेलामे थहरुट नेता लक्ष्मण थारु ३ वर्षे जेल बसाई अनुुभव सुुनैटी स्पष्ट राजनीतिक दृष्टिकोणके साथ जेलसे बाहेर आइल बटैलै । टीकापुर घटनावारे कानूूनी लडाईके साथे सडक संघर्षके आन्दोलन तत्काल आघे बह्रैना बटैटी उहाँ ३ से ६ महिनाभिट्टर टीकापुर घटना मुद्धा उच्च अदालतमे पुुनरावेदन कर्ना संगे संविधान संशोधन करके माग पूरा कराइक लाग राज्यहे आन्दोलनके माध्यमसे सशक्त दवाव डेना विचार व्यक्त कर्लै ।
नयाँ शक्ति नेपालके सुदूरपश्चिम संयोजक कृष्ण कुमार चौधरी (कुन्दन) अइना आन्दोलन करो या मरोके अवस्थामे रहल बटैलै । उहाँ कहलै–‘हम्रे हाल डुु एण्ड डाइ के अवस्थामे बाटी । या टे हम्रे शासक वर्गके दासत्व स्वीकार करेक परी, नै हो कलेसे अधिकारके लाग सशक्त होके लर्नाके विकल्पे नैहो ।’
भेलामे सहभागी नेताहुक्रे तमान राजनीतिक दलमे आवद्ध थरुहट नेताहुुक्रे आपने पार्टीभिट्टर फेन अधिकारके लाग बहस पैरवी करेक पर्ना आवश्यकता रहल बटैलै । पार्टीसे उप्पर उठके अधिकारके लडाईहे सशक्त बनाइक पर्नामे जोड डेलै ।
कार्यक्रममे नेपाल लोकतान्त्रिक पार्टीके अध्यक्ष भानुराम थारु, काँग्रेस नेता योगेन्द्र चौधरी, संघीय समाजवादी फोरमके नेता होरीलाल चौधरी, थारु बुद्धिजीवी सुुरेन्द्र चौधरी, कैलालके कैलारी गाउँपालिकाके अध्यक्ष लाजुराम चौधरीलगायतके नेताहुक्रे बोलल रहिट ।कार्यक्रममे थरुहट आन्दोलन ओ अइना डगर विषयक् कार्यपत्र थाकस केन्द्रीय सदस्य इन्दुु थारु प्रस्तुुत करल रहि ।
