विबेकशील पार्टीसे खक्रौला घाट भारतके सिमासम जलयात्रा कैना
धनगढी, १४ चैत । शान्ति ओ समृद्घिके लाग विवेकशील साझा पार्टी डोटीके वाल्डुरसैनासे कैलालीके खक्रौला घाट भारतके सिमासम जलयात्रा कैना जनैले बा ।
बुधके रोज धनगढीमे पत्रकार सम्मेलनके आयोजना करके यिहे चैत १७ गतेसे २१ गते सम ३ सय ५० किलोमिटर जलयात्रा कैना रेफटिङ संयोजक विनोद मल्ल (विप्लभ) जानकारी डेलै ।
“समृद्घिके लाग शान्ति“ कना खास नाराके साथ नेपाल भ्रमण वर्ष २०२० सफल पारी, हिसां, बन्द ओ प्रतिवन्द कबु नाकरी कहटी जलयात्रा करे जैटी रहल उहाँ कहलै । जलयात्रामे विवेकशील साझा पार्टीके सदस्य बिनोद मल्ल (विप्लभ) विवेकशील साझा पार्टीके युवा संगठनके गोदावरी न पा संयोजक सुखदेब सिहं, विवेकशील साझा पार्टीके गोदावरी न पा नगर सदस्य रमेश बोगटी ओ विवेकशील साझा पार्टी गौरीगंगा नगरपालिका सह–संयोजक तारा सिहंके सहभागिता रहना पत्रकार सम्मेलनमे जानकारी डेहल बा ।
ओस्टेक करके रेफटिङ गाईडमे कर्णाली रेफटिङ एण्ड एडभेन्चर प्रालिके अध्यक्ष विष्णु प्रसाद जैशी, फिसिङ गााईड बल बहादुर राजी ओ कालुराम चौधरी रहना संयोजक मल्ल बटैलै । चार दिन सम चल्न रेफटिङमे सरकारसे विप्लबहे लगाईल प्रतिबन्ध खुला करके वार्ताके माध्यामसे देशमे शान्ति स्थापनाके लाग अभिभाबकके भूमिका निर्वाह कैना अनुरोध कैना जनागिल बा । ओस्टेक नेकपा विप्लवहेफे बन्द हडताल नइकरके देशहे समृद्घिके डगर डोर्यइना वार्ता करके शान्ति सिर्जना कैना यी रेफटिङ कार्यक्रम मार्फत आग्रह कैना संयोजक बटैलै ।
विवेकशील साझा पार्टीके सुदूरपश्चिम संयोजक गोपाल हमाल जलयात्रा पर्यटन विकासमे टेवा पुग्ना बटैलै । उहाँ जत्रयात्राके सम्भावानाबारे प्रचारप्रसार करे सेक्लेसे रोजगारी सृजना करे सेक्ना बटैलै । जलयात्रा टोली चैत १७ गते सकारे ७ बजेसे यात्रा सुरु करलपाछे नाकाडाँडा, धनरास, रानामलेखा ओ सोल्टामे बास बैठना जनागिल बा ।
