राष्ट्रिय युवा नेतृत्व अध्ययन कार्यक्रमके दुसरा शैक्षिक सत्रके लाग ज्योति चौधरी छनोट

धनगढी,४ चैत । काठमाडौंस्थित लिडरशीप एकेडेमी ओ अमेरिकास्थित युनिभर्सिटी अफ सान डिग्रो, क्रक स्कूल एण्ड क्रक इन्स्टिच्युट फर पिस एण्ड जस्टिसके संयुक्त आयोजनामे सञ्चालित राष्ट्रिय युवा नेतृत्व अध्ययन कार्यक्रमके दुसरा शैक्षिक सत्रके लाग सुदूरपश्चिम प्रदेशके कैलालीसे ज्योति चौधरी छनौट हुइल हुइटी ।

यी कार्यक्रम भविष्यमे देशके नेतृत्व करना सेक्ना युवा तयार करना अपेक्षा राखगिल बा । देशके जटिल ओ चुनौतीपूर्ण समस्या समाधामे यी कार्यक्रम तयार करके विशेष समूहके अहम भूमिका रहठ । टबमारे, यी समूह स्थानीयसे राष्ट्रि सरकार ओ सरोकारवालाहुकनसँग सहकार्य करटी उदाहरणीय काम करना जनागिल बा ।

के हुइटी ज्योति

ज्योति चौधरी विद्यार्थी जीवनसे नेतृत्व अभियान, सामाजिक टमान कार्यमे ओ राजनीतिमे सक्रिय बटी । उहाँ स्थानीय स्तरमे युवा विद्यार्थी ओ टमान संघसंस्थासँग काम करटी आइल बटी । विगत ११ वरससे टमान सामाजिक कार्यक्रममे संलग्न रहिके युवा नेतृत्व विकास ओ समावेशिताके क्षेत्रमे अहम भूमिका निभैटी आइल बटी ।

युवा विद्यार्थीके शिक्षामे पहुँच पुगैना विषयहे लेके समाजके टमान स्थानीय तह ओ केन्द्रीय तहसंग टमान मेरके वकालत करटी राजनीतिक करटी आइल बटी । उहाँ विक्रम संवत २९७४ सालके स्थानीय चुनावमे राष्ट्रिय जनता पार्टी नेपालके ओरसे समानुपातिक उम्मेदवार समेत हुइटी ।

यिहे २२ फेब्रुरी २०१९ मे अट्रिआ भेन्नाके युएनमे आयोजित जिरो प्रोजेक्ट अवार्ड कन्फेरेन्स, २०१९ मे उहाँहे कम्युनिटी चेन्ज एजेण्ट स्वरूप इन्टरनेशनल अवार्डसे सम्मानित करगिल रहे । जहाँ टमान सामाजिक क्षेत्रमे काम करटी रहल ८० राष्ट्रके ६०० जहन सम्मान करगिल रहे ।
हाल उहाँ नेपाल ल क्याम्पस काठमाडौंमे अध्ययनरत बटी साथे शिक्षा संकायसे स्नातकोत्तर समेत कर सेकले बटी । उहाँ विगत ८ वरससे अपांगता हुइल व्यक्तिहुकनके सामाजिक समावेशिता ओ जीविकोपार्जन करैना काममे निरन्तर जुटल बटी ।

जेकर परिणाम स्वरूप अब्बे उहाँ छोट उमेरमे एकठो कैलाली जिल्लाके संघर्षशील समुदाय, थारू समुदायके महिला वर्गके लाग प्रेरणा ओ उदाहरणके रूपमे चिन्हजैटी बाटी । यी थारु समदायके लाग खुसी ओ गर्वके विषय बनल हो ।