‘ढेर स्थानीय तहमे कामकाजी मातृभाषा बनेसेकी’

धनगढी, १० फागुन । धनगढी उप–महानगरपालिकाके नगरप्रमुख नृप बहादुर वड सुदूरपश्चिम प्रदेशके ८८ स्थानीय तह मन्से ढेर तहमे कामकाजी मातृभाषा बनाई सेक्ना बटैले बाटै ।

विफेक रोज धनगढीमे हुइल सुदूर चिनारीके आठौं वार्षिकोत्सव तथा अन्तर्राष्ट्रिय मातृभाषा दिवस कार्यक्रमके उदघाटन करटी जातजाती, भाषाभाषीके बसोबासके आधारमे टमान स्थानीय तहमे मातृभाषाहे कामकाजी बनाई सेक्ना बटैलै । अन्तर्राष्ट्रिय मातृ भाषा दिवसके अवसरमे बोल्टी उहाँ ढेर जातजाती, समुदाय अपन भाषा, कला, संस्कृतिफे विस्रैटी गैल ओरसे ओकर संरक्षण करेक लाग हुइलेसेफे जनसंख्याके आधारमे नगरपालिका, गाउँपालिका या वडा कार्यालयमे हुइलेसेफे मातृभाषाहे कामकाजी बनाई सेक्ना कहलै । उहाँ स्थानीय तहहे यकर लाग समिति बनाके जैना आग्रहफे करलै । उहाँ धनगढीके टमान वडामे एक जातीके बसोबास रहल ओरसे यहाँफे बनाई सेक्ना अवस्था करल कहलै ।

कार्यक्रममे डा. बद्री शर्मा विनाडी सुदूरपश्चिम प्रदेशमे टमान जातजातीके बसोबास रहल ओरसे ओइनके मातृ भाषा जोगाइकल लाग व्याकरण ओ शब्दकोष हुई पर्ना जरुरी रहल कहलै ।

समाजसेवी तथा साहित्यकार पदमराज जोशी मातृभाषा जोगाइक लाग घरसे सुरुवाट कैना बटैलै । उहाँ कहलै हम्रे अपन घर अपन मातृभाषा प्रयोग नाइकरल कारण लौव यूवा पुस्ताफे ठेट भाषा बोले नाइजानल कहलै ।

कार्यक्रममे कैलाली बहुमुखी क्याम्पसके प्राध्यापक शिवराज फुलारा हम्रे अपन भाषा बोल्ना लाज लग्ना कारण अपने मातृभाषाहे उपेक्षा करल कहलै । पहुरा दैनिकके सम्पादक प्रेम चौधरी मातृभाषामे प्रकाशित पत्रपत्रिकाहे प्रोत्साहन कैना जरुरी रहल बटैलै ।

उहे अवसरमे अन्तर्राष्ट्रिय मातृभाषा दिवस कार्यक्रम तथा सुदूर चिनारी दुई मासे पत्रिकाके आठौं वार्षिकोत्सव कार्यक्रममे मौलिक भाषा,कला,संस्कृतिके जर्गेना ओ थारु भाषाके विकासमे पुगाइल योगदानके कदर करटी पहुरा थारु दैनिक हे सम्मान कैगिल बा । ओस्टेक सुवाश चन्द्र भण्डारी, सुदूर चिनारीके सह सम्पादक लेखराज जोशी, फणिन्द्र साउँदहेफे दोसल्ला सहित सम्मान करल बा । सक्कु जनहनहे कार्यक्रममे वडका पहुना तथा नगरप्रमुख नृप बहादुर वड सम्मान करले रहिट ।

कार्यक्रममे संचारकर्मी तथा साहित्यकार डिल्लीराज ओझा ‘समर्पण’ , साहित्यकार सागर कुश्मी, छत्र रावल, पुष्पा जोशी लगायतसे डोटेली भाषा, थारु भाषामे साहित्य बाचन करले रहिट । सुदूर चिनारीके सम्पादक यज्ञराज यात्रीके घरगोस्यमे हुइल कार्यक्रममे सहजीकरण पत्रिकाके प्रकाशक/सम्पादक नन्दकृष्ण (एन. के. जोशी करले रहिट । कार्यक्रमके संचालन पत्रिकाके सह–सम्पादक तीर्थराज भट्ट करले रहिट ।