जनयुद्ध दिवसमे जनवादी भोज

पहलमानपुर (वनबर्षा),१ फागुन । जनयुद्धके बेला लौउण्डा लौण्डी एक दुसरहे मन परैलेसे तत्कालिन नेकपा माओवादी पार्टी जनवादी भोज कराडेना चलन रहिन । २४ बर्षपाछे फेर बुधके रोज घोडाघोडी नगरपालिका–१२ वनबर्षामे आयोजित २४ औं जनयुद्ध दिवसके अवसरमे एक युगल जोडीके जनवादी भोज करागिल बा ।

जानकी गाउँपालिका–९ के झलक विक ओ टिकापुर नगरपालिका–१ के मिना चौधरी विच अन्तरजातीय जनवादी भोज करागिल हो । राष्ट्रिय थारु मुक्ती मोर्चाके आयोजनामे हुइल एक कार्यक्रमके विच ओइनके भोज हुइल रहे । डुल्हा नेपाल कम्यूनिष्ट पार्टी (विप्लव) के भातृ संगठन अखिल क्रान्तिकारीके केन्द्रीय सदस्य हुइट ।

भोजके सक्कु खर्चपर्चा वनबर्षा गाउँक स्थानीय जुटाडेहल रहिट । गाउँक स्थानीयसे बुनके नानल गेन्दा फुलक माला डुल्हा डुल्हानीय एक आपसमे घलाडेनै ओ डुल्हा लाल टिका लगाडेहलपाछे भोज सम्पन्न हुइल रहे । गाउँके स्थानीय कार्यक्रम ओ भोजमे सहभागिहुकनहे भोजक प्रसादके नाउँमे थारु परिकार ठिक्री, सिधरक चटनी ओ सिन्कीके आंचार खवाके स्वागत करले रहिट । भोजक साक्षीके रुपमे सहभागी सबजे लौव डुल्हाडुल्हीहे आार्शिबादफे डेहल रहिट ।

उहे विच जनयुद्ध दिवसके अवसरमे राष्ट्रिय थारु मुक्ती मोर्चाके जिल्ला सम्मेलन हुइल बा । उदघाटन कार्यक्रममे नेपाल कम्यूनिष्ट पार्टी (विप्लव) के थारुवान प्रदेश सभा संयोजक कालीचरण थारु व्यक्तिगत स्वार्थसेफे सामुदायके लाग योगदान डेटी रहल बटैलै । नेकपाके अध्यक्ष प्रचण्ड जातीय, वर्गिय उत्पीडनके समस्या डेखा जनतन फुलाइल मने अब्बे अपनही उ मुद्दा छोरके शहिदहुकाके बलिदानीहे विस्रैटी व्यक्तिगत स्वार्थमे लिप्ट हुइल आरोप लगैलै । नेपाल कम्यूनिष्ट पार्टी (विप्लव) भर असिन नाकरे कहटी वैज्ञानिक समाजवाद ओ स्वयत्त गणराज्य प्राप्तीके लाग थारुवान आन्दोलन, आत्मनिर्णयके आधिकार ओ जातीय स्वाशासनके लाग आघे बह्रटी रहल बटैलै ।

पार्टीके जिल्ला इन्चार्ज विवेक कुमाल साझा सवालमे सक्कु उत्पीडित जाती वर्ग, समुदाय गोलबद्ध हुके आवाज उठैना जरुरी रहल बटैलै । उहाँ सामाजिक हिट हुइना काममे जबफे हाथेमालाके कैके पार्टी आघे बह्रना प्रतिबद्ध रहल बटैलै ।

पूर्व सांसद तथा नयाँ शक्ति पार्टीके प्रदेश संयोजक कृष्णकुमार चौधरी ‘कुन्दन’ नेपाल कम्यूनिष्ट पार्टी (विप्लव) अब्बे कलोबजारी, भ्रष्टाचारी ओ दलालहुकन कार्वाही कैना मजा अभियान चलाइल बटैलै । उहाँ कहलै भनसुनके आधारमे कार्वाही कैनासेफे प्रमाण जुटाके वास्तविक कलोबजारी, भ्रष्टाचारी ओ दलालहुकनके पहिचान करके आघे बह्रलेसे अभियान सार्थक हुई ।

(विप्लव) माओवादी उत्पीडनमे परल वर्ग समुदायके पक्षमे आवाज उठैना कहठ कलेसे टीकापुर घटनाके बारेमे का धारणा बनैले बा कहटी प्रति प्रश्न करले रहिट ।

थारु कल्याणकारिणी सभा कैलालीके कार्यवाहक सभापति माधव चौधरी समग्र उत्पीडित थारु समुदायके पक्षमे ओकालट करुइया नेपाल कम्यूनिष्ट पार्टी (विप्लव)हे नैतिक सर्मथन कैना बटैलै । उहाँ विद्यामान जातीय वर्गिय, उत्पीडिनहे ओरुवाइना सघीयताके सुरुवाट हुइल ओरसे अब्बेक संघीयताके सिमांकन शासकमुखी, अवैज्ञानिक रहलप्रति नेपाल कम्यूनिष्ट पार्टी (विप्लव)के ध्यानजाई पर्ना कहलै । उहाँ टीकापुर घटनाहे राजनीतिक मुद्दाके रुपमे समाधान करुवइनामे यी पार्टीहे सर्मथन जनाडेहे परल कहटी आग्रह करलै ।

उहे विच राष्ट्रिय थारु मुक्ती मोर्चा सिताराम थारुके अध्यक्षतामे १५ सदस्यीय लौव कार्यसमिति गठन करले बा । जेकर उपाध्यक्षमे शेरा थारु, सचिवमे उन्नती थारु, सहसचिव कमल थारु, कोषाध्यक्षमे हरिराम थारु, सदस्यमे राधा थारु, केआइसी थारु, प्रकाश थारु, प्रेम थारु, कालीचरण थारु, हिरादेवी थारु, चेतराम थारु, रन्जु थारु, ल्यप्टन थारु ओ सोनीया थारु रहल बटै ।

प्रचण्ड शहिदके सपनाउप्पर होली खेलटैः विप्लव माओवादी

काठमाडौँ, १ फागुन । नेत्रविक्रम चन्द नेतृत्वके नेपाल कम्युनिष्ट पार्टी जनयुद्धके नेतृत्व करल नेपाल कम्युनिष्ट पार्टी (नेकपा)के अध्यक्ष पुष्पकमल दाहाल शहिदहुकनके सपनाउप्पर होली खेल्टी रहल आरोप लगैले बा ।

जनयुद्ध दिवसके अवसर पारके बुधके काठमाडौँमे आयोजित एक कार्यक्रममे बोल्टी चन्द नेतृत्वके नेपाल कम्युनिष्ट पार्टीके केन्द्रिय सदस्य भृकुटी उपाध्याय जनयुद्ध सुरु करलके उद्देश्य, सहिदहुकनके बलिदान ओ नेपाली जनताके त्याग ओ समर्पणउप्पर दाहाल तुषारापात करटी रहल आरोप लगाइल हुइट ।

उहाँ संसदीय राजनीतिके फोहोरी खेलविरुद्ध सुरु करल जनयुद्धहे धोका डेहुइया १५ हजारसे ढेर जनयुद्धके शहिदहुकनके अपमान करल दावी करटी ओकर विरुद्ध आन्दोलनमे अइनाफे सक्कुहुनहे आह्वान करली ।

उपाध्याय जनताके जनवादी व्यवस्था नन्ना उद्देश्यके साथ पार्टी जनवादी आन्दोलनके सुरु करे परल दावीफे करली । चन्द नेतृत्वके नेपाल कम्युनिष्ट पार्टी जनयुद्ध दिवसके अवसर पारके काठमाडौंमे ¥यालीसहितके प्रर्दशन करले बा । प्रर्दशनमे सहभागी हुइल ओरसे जनताके शासन व्यवस्था स्थापनाके लाग पार्टीके अभियानमे साथ डेना अपिल करटी नाराबाजी करले रहिट ।