बाजुरामे मुक्त हलिया पुनःस्थापनाके लाग १६ करोड वितरण
मार्तडी, २७ माघ । सरकार औरके हर जोटके घरपरिवार पल्टी आइल मुक्त हलियाहे पुनःस्थापना करेक लाग विसं २०६५ भदौ २१ गते मुक्त हलिया घोषणासहित पाँच बुँदे सम्झौतामे हस्ताक्षर करल ।
बर्सेनी जग्गाधनीके हर जोटके घरपरिवार पल्टी आइल हलियाहे पुनःस्थापना करेक लाग सरकार कार्यक्रम नानल हो । मने फे जिल्लाके मुक्त हलियाके भर साहुके हर जोत्न काम छुटल नाइहो । सरकार हलियाहे मुक्त घोषणाके टमान बुँदामे सहमति हुके सम्झौता करलअनुसारके काम करटी आइलेसेफे हलिया भर हर जोटके गुजारा चलैटी आइल बाटै ।
भूमि व्यवस्था तथा सहकारी मन्त्रालय जिल्ला हलिया पुनःस्थापना कार्यदलके सिफारिशके आधारमे क से घ वर्गके परिचयपत्र डेले बा ।ओइनहे परिचयपत्र डेहल हुइलेसेफे साहुके हर भर जोत्न नइछोरल मुक्त हलिया पुनःस्थापना जिल्ला कार्यदल बाजुराके सदस्यसचिव तथा मालपोत कार्यालय बाजुराके प्रमुख लक्ष्मणदेव पाण्डे बटैलै ।
मुक्त हलियाहे जग्गा खरीद, घर निर्माण ओ मर्मतकार्य करके ओइनहे पुनःस्थापना करटी बर्सेनी करोडौं रकम डेना करल हुइलेसेफे ओइने हर जोटे नइछोरल बताइल बा । ओइने कहठै– ‘सरकार जत्रा पैसा डेलेसेफे साहुके हर नइजोटलेसे भोकभोके बैठे परठ । घर निर्माण ओ मर्मत करके भुखे बैठे नाइसेक्ना हुइल ओरसे हर जोत्न करल हुई ।’ जिल्लामे हलियाके मुक्तिके लाग आन्दोलन कैना गैरसरकारी संस्थाके लगानीसमेत खेर जाई लागल हलिया मुक्ति आन्दोलनके अगुवा गोरखबहादुर सार्की बटैलै ।
साहुके रु १० ऋण लेके पुस्तौपुस्तासम हर जोत्न प्रथाके भर न्यूनीकरण हुइटी गैल जिल्ला दलित नेटवर्कके वीरबहादुर विश्वकर्मा बटैलै । परापूर्वकालसे साहुके ऋण लेहलवापत सयौँ पुस्ता हर जोटे पर्ना बाध्यता हटल विश्वकर्माके कहाई बा ।
१६ करोड वितरण
बाजुरा जिल्लाके नौ स्थानीय तहमे रहल एक हजार ६३३ हलियाहे मुक्त हलिया पुनःस्थापना कार्यक्रममे आइल रकम वितरण करल हलिया पुनःस्थापना तथा जिल्ला मालपोत कार्यालय बाजुरा जनैले बा ।
मुक्त हलियामे परल टमान वर्गहे रु एक लाख २५ हजारसे रु पाँच लाखसम रकम डेहल कार्यालय प्रमुख पाण्डे बटैठै । आव २०७५–७६ मे मुक्त हलिया पुनःस्थापनाके लाग रु १६ करोड ७८ लाख ८७ हजार रकम मुक्त हलियाके बैंक खातामे जम्मा करल कार्यालय प्रमुख पाण्डेके कहाई बा ।
मुक्त हलिया पुनःस्थापनाके लाग घर निर्माणके लाग ३६, जग्गा खरीदके लाग ४७ ओ घर मर्मतके लाग ६७४ जे रकम लेले बाटै । जग्गा खरीदमे रु दुई लाख, घर निर्माणके लाग रु तीन लाख २५ हजार ओ घर मर्मतके लाग रु एक लाख २५ हजारके दरसे रकम वितरण करल बा ।
