माघ १ गते किल विदा करल कहटी थारु समुदाय असुन्तुष्ट

धनगढी, २७ पुस । सुदूरपश्चिम प्रदेश सरकार माघ टिहुवारमे न्यायोचित ढंगसे विदा नैडेहल कहटी कैलाली कञ्चनपुरके थारु समुदाय असन्तुष्टी जनैले बाटै ।

माघक् विशेषता अनुसार प्रदेश–५ सरकार २ दिन सार्वजनिक विदाके घोषणा कर्लेसे फेन सुदूरपश्चिम प्रदेश सरकार भर माघ १ गते किल विदा करल कहटी असुन्तुष्टी जनाइल हुइट । विफेक् रोज बैठल प्रदेश मन्त्रीपरिषदके बैठकसे माघ १ गते विदा डेना निर्णय करल हो ।

१ दिन किल बिदा डेना निर्णय हुइलपाछे थारु अधिकारवादी संघ सस्थाहुक्रे माघ टिहुवारवारे प्रदेश सरकार गम्भीर नैरहल कहटी आक्रोश समेत पोख्ले बाटै ।

थारु कल्याणकारिणी सभा कैलाली ओ थारु नागरिक समाज कैलाली विफेक् रोज एक विज्ञप्ती जारी करके विरोध जनैले बाटै । थाकस कैलालीके कार्यवाहक सभापति माधव चौधरी ओ थारु नागरिक समाज कैलालीके संयोजक दिलबहादुर चौधरी संयुक्त रुपमे विज्ञप्ती जारी करके विरोध जनाइल हुइट ।

थारु नागरिक समाज कैलालीके संयोजक दिलबहादुर चौधरी सुदूरपश्चिम प्रदेश सरकारके रबैयासे अप्नेहुकनके संस्कृति जोखिममे परल बटैलै । अप्नेहुक्रे पटक–पटक ध्यानाकर्षण करैलेसे फेन कौनो सुनुवाई नैहुइल संयोजक चौधरीके गुनासो बा ।

संयोजक चौधरी कहलै–‘थारु समुदायमे माघीहे लौव बरसके रुपमे मनाजाइठ । पुस अन्तिम दिनसे सुरु हुइना माघी माघ ३ गतेसम मनाजाइठ । मने हम्रे माघ १ ओ २ गते किल विदाके माग करल रहि । विदा नैडेहल कारण हम्रे टिहुवार मनैनासे बञ्चित हुइबी । सांस्कृतिक अधिकारउप्पर राज्य पक्षसे प्रहार हुइल बा ।’

ओस्टके थाकस कैलाली अध्यक्ष माधव चौधरी संविधानसे व्यवस्था करल साँस्कृतिक अधिकार प्रदेश सरकारसे हनन् हुइल उहाँके तर्क बा । उहाँ फेन थारु समुदायके हकअधिकारप्रति प्रदेश सरकार गम्भीर नैरहल बटैलै । यहेबीच माघ लच्क्याइलपाछे तराईमे माघक् रौनक सुरु हुइल बा । विशेष करके लौव बरसके रुपमे माघहे धुमधामसे मनैटी आइल थारु समुदायमे चहलपहल बह्रल हो ।

कैलाली, कञ्चनपुरलगायत जिल्लाके थारु वस्तीमे माघीक् तयारी हुइटी रहल बा । पट्टा टुरके डोना टेपरी छेड्ना, ढिक्री बनाइक लाग चाउर पिसैना, टिना टवान खोज्न काम हुइटी रहल बा । ओस्टके सुरिक सिकारके लिस्ट बनैना काम फेन हुइटी रहल बा । कामके लाग बाहेर गैल मनै गाउँघर पिर्ता हुइ लागल बाटै ।

माघ थारु समुदायके सबसे बरवार टिहुवार हो । माघ मनाइलपाछे लौव कामके सुरुवात हुइना हुत्तइलओरसे विशेष ढंगसे मनैटी आइल बटैठै धनगढी उपमहानगरपालिका–५ तारानगरके स्थानीय दलबहादुर दहित । ‘हमार पुर्खाहुक्रे माघ ओस्टही लौव बरसके रुपमे नैमाइल हुइट’, उहाँ कहलै–‘वास्तवमे माघ हमार लौव सालसे जोरल बा । माघसे हम्रे मजा ओ लौव कामके सुरुवात कर्ठी ।’

माघ मन्से बरसभर कर्ना कामके योजना बनैना काम हुइठ । थारु बुद्धिजिवीहुकनके अनुसार घरपरिवार ओ समाजहे कसिक आघे बह्राई सेकजाई कहिके गम्भीर रुपमा छलफल कर्ना ओ बरस भरिक योजना बनैना काम सुरु हुइना हुइलओरसे लौव बरसके रुपमे लेजाइठ ।
यहेबीच माघके अवसरमे ठाउँ–ठाउमे माघी मेला, महोत्सव कर्र्ना तयारी फेन हुइटी रहल बा ।