फुलवारीमे माघी मेलासंगे भलिबल प्रतियोगिता
धनगढी, २४ पुस । थारु समुदायके लौव बरस एवं बर्का टिहुवार माघीके अवरसमे धनगढी उपमहानगरपालिका वडा नं. १९ फुलवारी मेला आयोजना हुइना हुइल बा ।
माघ १ गते लहैलक दिनसे सुरु हुइना मेलामे भलिबल प्रतियोगिता फेन आयोजना हुइना जनाइल बा । माघ लक्याइटी रहल बेला मेलाके फेन तयारी तीब्र पारल बा ।
फुलवारी मेला समिति ओ फुलवारी यूवा क्लबके संयुक्त आयोजनामे फुलवारी आधारभुत विद्यालयके अंगनामे मेला लग्ना जनाइल बा ।
मेलाहे भब्य ओ सभ्य तरिकासे सम्पन्न पारक लाग तमान उपसमिति फेन गठन हुइल मेला व्यवस्थापन समितिके अध्यक्ष धनकुमार चौधरी बटैलै ।
मेलाके तयारीसंगे मन्दिरके सरसफाई फेन करगैल अध्यक्ष चौधरी जानकारी डेलै । मेलामे खेले अउइयाहक्रनके लाग मन्दिर परिसरमे पानीके लाग नल्काके फेन व्यवस्था करल बा । माघीके अवसरमे बाबा मन्दिरमे दर्शानार्थीहुक्रनके पुनाआजाके लाग भीड लग्ना जनाइल बा । मन्दिरके अपने धार्मिक तथा ऐतिहासिक महत्व रहल बा ।
यहोर माघीके अवसरमे फुलवारी युवा क्लबके आयोजनामे भलिबल प्रतियोगिताके फेन आयोजना हुइना हुइल बा । भलिबलके पहिल हुउइया टीमहे नगद ५० हजार ओ दुसरा हुउइयाहे ३० हजार पुरस्कारके व्यवस्था रहल प्रतियोगिताके संयोजक पर्बत चौधरी जानकारी डेलै ।
करिब ६० बरससे लग्टी आइल मेला एवं मन्दिरके संरक्षण सम्बद्र्धन ओर भर कौनो निकायके आभिनसम ध्यान नाइ गैल हो । मेला आयोजनाके लाग हरेक साल चन्दा संकलन करे पर्ना बाध्यता रहल अध्यक्ष चौधरीके गुनासो रहल बा ।
