नेपाल आदिवासी जनजाति पत्रकार महासंघके प्रदेश तदर्थ समिति गठन
धनगढी, १९ पुस । नेपाल आदिवासी जनजाति पत्रकार महासंघ (फोनिज) सुदूरपश्चिम प्रदेश तदर्थ समिति गठन हुइल बा ।
बिफेक रोज धनगढी उपमहानगरपालिका वडा नं. १६ थारु होमस्टे भादा गाउँमे हुइल भेलासे फोनिज सुदूरपश्चिम संयोजक रामचन्द्र कुश्मीके संयोजकत्वमे तदर्थ समिति गठन हुइल बा । जेकर सदस्यमे फोनिज कैलाली जिल्ला अध्यक्ष रामलखन चौधरी ओ फोनिज कञ्चनपुर जिल्ला अध्यक्ष हेमन्ती चौधरी रहल बाटै ।
फोनिज केन्द्रिय महासचिव मनोज घर्तीमगरके बर्का पहुनाईमे हुइल रहे । कार्यक्रमके बर्का पहुना घर्तीमगर कैलाली ओ कञ्चनपुर जिल्ला बाहेक सुदूरपश्चिम प्रदेशके अन्य जिल्लामे फेन आदिवासी जनजाति पत्रकारहुक्रनके संख्या वृद्धिमे जोड डेहे पर्ना बटैलै । महासचिव घर्तीमगर आदिवासी जनजाति पत्रकारहुक्रनके संख्या ओ मिडिया बह्रलेसे आदिवासी जनजातिके मुद्धाके उठान हुइना बटाइल रहिट ।
कार्यक्रमके खास पहुना धनगढी उपमहानगरपालिका वडा नं. १६ के वडा अध्यक्ष लक्ष्मीनारायण चौधरी फेन आदिवासी जनजाति पत्रकारहुक्रनके संख्या ओ मिडियामे वृद्धि हुइना आवश्यक रहल औल्याइलै । उहाँ फेन मिडिया ओ पत्रकारहुक्रनके संख्यामे वृद्धि हुइलेसे आदिवासी जनजाति समुदायके हकअधिरकार बारे मिडिया मार्फत सरकारहे ध्यानाकार्षण कराइ सेक्ना बटाइल रहिट ।
कार्यक्रम सुदूरपश्चिम प्रदेश संयोजक रामचन्द्र कुश्मीके अध्यक्षतामे हुइल रहे । कार्यक्रममे फोनिज केन्द्रिय सदस्य लक्ष्मी चौधरी, फोनिज कञ्चनपुर जिल्ला अध्यक्ष हेमन्ती चौधरी, थारु पत्रकार संघ सुदूरपश्चिम संयोजक उन्नती चौधरी, थारु पत्रकारसंघ जिल्ला अध्यक्ष प्रेम चौधरी लगायत शुभकामना मनतब्य राखल रहिट ।
फोनिज कैलाली जिल्ला अध्यक्ष राम लखन चौधरीसे स्वागत हुइल कार्यक्रमके सञ्चालन जिल्ला सचिव राम दहित करले रहिट । भेलामे कैलाली ओ कञ्चनपुरके आदिवासी जनजाति पत्रकारहुक्रनके सहभागिता रहल रहे ।
