भादा महोत्सवके आठौं संस्करण पुस १७ गतेसे

धनगढी,५ पुस । ‘संरक्षण सम्बद्र्धनके लाग सक्कु जाने करी काम, संस्कृति भेष भुषा राखी हमार पहिचान’ कना मूल नाराके साथ प्रत्येक बरस लग्टी आइल थारु होमस्टे गाउँ भादा महोत्सव २०७५ के आठौं संस्करण पुस १७ गतेसे हुइना जनागिल बा ।

लोप हुई लागल थारु समुदायके सिप, कला संस्कृति, भाषा खानपिन, सम्पदा ओ प्राकृतिक स्रोतके सदुपयोग करके आर्थिक तथा सामाजिक स्तरमे अभिबृद्धि करटी थारु जातीके पहिचानहे पर्यटन व्यवसाय मार्फत राष्ट्रिय तथा अन्तर्राष्ट्रिय स्तरमे पुगाइक लाग महोत्सवहे निरन्तरता डेहे लागल थारु होमस्टे गाउँ भादा पर्यटन विकास तथा व्यवस्थापन समिति विफेक रोज धनगढीमे पत्रकार सम्मेलनके आयोजना करके जानकारी डेहल हो ।

फाइल फोटो

समितिके अध्यक्ष लक्ष्मीनारायण चौधरी यि बरषके महोत्सव पुस १७ गतेसे २१ गतेसम संचालन हुइना जनैलै । महोत्सव संचालन कैना करिब ५ लाख खर्च हुइना ओ ५० हजारसे ढेर जे अवलोकन कैना उहाँ जनैलै । महोत्सव अवलोकन करुइयाके लाग प्रवेश निशुल्क रहना उहाँ कहलै ।
होमस्टे तथा महोत्सव संचालनसे स्थानीय स्तरमे स्वरोजगारके अवसर सृजना हुइना, थारु सामुदायिक होमस्टे गाउँ भादाके प्रचार पंसार हुइना, हरेक जातजाती तथा देश विदेशके नागरिकहुकनविच सामाजिक सदभाव कायम रहनाफे अध्यक्ष जनैलै । होमस्टे संचालन करलपाछे बोली भाषा, सरसफाईमे चेतनाके बृद्धि हुइनाके साठे स्थानीयस्तरमे आर्थिक स्रोतमे बृद्धि हुइल अध्यक्ष चौधरी जनैलै ।

समितिके कोषाध्यक्ष पदम चौधरी भादा गाउँमे २ सय २४ जाने थारुनके घर संख्या रहलमे १९ घर होमस्टे संचालन हुइल बा, कलेसे अशौसे २० घर पुगैना कहलै । २०६७ सालमे होमस्टे संचालन हुइलपाछे ओकर प्रचारप्रसार करेक २०६८ सालसे महोत्सवके आयोजना हुइटी आइल उहाँ कहलै । महोत्सवहे सभ्य, भव्य बनाइक लाग एक ठो मुल समिति ओ १२ ठो उपसमितिके गठन हुइलफे कोषाध्यक्ष चौधरी कहलै । धनगढी उपमहानगरपालिका–१६ मे पर्ना थारु होमस्टे गाउँ भादा पुगेक लाग धनगढीसे १७ किलोमिटर केल रहल उहाँ कहलै ।

फाइल फोटो

महोत्सवमे थारु समुदायसे हातले बनाइल ढकिया, डेलुवा, लेहंगा, पनछोपनी, मचिया, हेल्का, डेलिया, सिकहर, हसिया, बेल्ना चौकी, लगायत घरायसी प्रायोजनमे प्रयोग हुइना बस्तु अवलोकन करे मिल्ना व्यवस्था मिलाइल आयोजक जनैले बा । ओस्टेक महोत्सवमे खानाके परिकारमे ढिक्री, घोंघी, बरिया, फुलौरी, खेर्या, बंगुर तथा मुसक पकुवा, गेङटक पकौरी, सिध्रा, चरङगीक पक्ली, आलुक अचार, पनझझरा, कचरीक बरिया, अण्डी भात, महुँवक दारु, चौरक दारु, जा“र, जा“रके झोल लगायतके थारु खानपिनके परिकार दर्शकहुक्रे छानछान खाई पैना व्यवस्था रहना जनागिल बा ।

महोत्सवहे मनोरन्जनात्मक बनाइक लाग हरेक दिन राष्ट्रिय तथा स्थानीय कलाकारहुकनके बेजोड प्रस्तुती, स्थानीय थारु नाचगानमे सखिया, झुम्रा, मघौटा, लठ्ठी, बैठक्की, मुङग्रहुवा, हुर्डङवा, छोक्रा, बर्का नाँच, अखरिया नाँच, कठघोरी नाँच, रानाथारु, कठरिया थारुहुकनके नाँचगानके प्रस्तुती रहना जनागिल बा ।

ओस्टेक आधुनिक गीत, पुरान सजना, मैना, धमार, बरकीमार, लग्नी, कठमैया, विरहनी गीतके प्रस्तुती रहना आयोजक बटैले बा । महोत्सव संचालन स्थलमे मठमन्दिर, भुइहर, ताल तलैया हेरे पैना, थारु होमस्टे घुमे चाहुइयनके लाग लहरु भ्रमण, लाउ शयर करे पैनाफे व्यवस्था मिलैना आयोजक जनैले बा ।

ओस्टेक थारु होमस्टे गाउँ भादा पर्यटन विकास तथा व्यवस्थापन समिति गैल बरषके महोत्सवमे वर्का पहुना रहल नगरप्रमुख नृप बहादुर वडहे ९ बुँदे मागपत्र बुझैले रहे । मागपत्रमे कनरी भादा हुइटी चौमालासमके सडकहे हाली कालोपत्रे करेक लाग पहल करे पर्ना, थारु सांस्कृतिक संग्राहलय निर्माणके अति आवश्यक सहयोग करे पर्ना, दिपेन्द्र चारपातेके लग्गे पार्क निर्माण करे पर्ना, होमस्टेमे अउइया पर्यटकके लाग शयर करेक लाग चार ठो लाउ उपलब्ध कराई माग रहल बा ।

ओस्टेक टमान मेरिक तालिम संचालन करे पर्ना, होमस्टे गाउँमे सोलर बत्ती जडान करे पर्ना, जोगिन्या टलुवाहे पिकनिक बनाई पर्ना, भादा होमस्टके विकासके गुरु योजना नाने पर्ना ओ उहाँसम पुगेक लाग टमान ठाउँमे होडिङबोर्डके व्यवस्था करे पर्ना लगायत मागपत्र अध्यक्ष बुझैले रहिट ।

महोत्सव धनगढी उपमहानगरपालिका–१६ थारु होमस्टे गाउँ भादा स्थित दिपेन्द्र चारपाटे माविके खेल मैदानमे हुइना कहल बा ।