टीकापुरमे थरुहटके भेला, अप्ने नेताहुकन कारवाहीके चेतावनी

टीकापुर, २५ अगहन । थरुहटरथारुवान पक्षधर नेताहुक्रे मंगरके रोजसे फेनसे थरुहट आन्दोलन सुरु हुइल उद्घोष कर्ले बाटै ।

थारु कल्याणकारिणी सभा ९थाकस० कैलालीसे टीकापुरमे आयोजित भेलामे थरुहट नेताहुक्रे फेरसे थरुहट आन्दोलन सुरु हुइल बटैले बाटै ।

आन्दोलनके विकल्प नैरहल निष्कर्षमे पुगल नेताहुक्रे सुरुवाती चरणमे अप्ने पक्षधरके भगौडा नेताहुकनहे कारवाही कर्ना चेतावनी डेहल हुइट ।

थाकसके केन्द्रीय पार्षद एंव नयाँ शक्ति पार्टी नेपालके सुदूरपश्चिम संयोजक कृष्णकुमार चौधरी थरुहटसे उठाइल माग मुद्धाके सुनिश्चिता तथा टीकापुर घटनाके आरोपीहुकनके रिहाईके लाग सशक्त आन्दोलनके विकल्प नैरहल बटैलै ।

थरुहट/थारुवान संयुक्त संघर्ष समिति कैलालीके संयोजक समेत रहल कृष्ण कुमार कहलै–‘राजबन्दीहुकनके रिहाईके लाग आन्दोलनके विकल्प हुइबे नाई करे । जे टीकापुर घटनाहे भ¥र्याङ बनाइल, सांसद बन्लै, सत्तामे पुग्लै, मन्त्री बन्लै । मने हाल वेवास्ता करलहुकनहे सुरुमे कारवाही करटी आन्दोलन आघे बह्राव ।’ विगतमे हुइल थहरुट आन्दोलनके मोर्चा सम्हारके नाराबाजी करल मने हाल निक्रिय बैठल नेताहुक्रे आन्दोलनमे सक्रिय नैहुइलेसे कारवाही कर्ना उहाँके चेतावनी रहे ।

थाकसके डोसर केन्द्रीय पार्षद एंव पूर्व जिल्ला सभापति प्रभात कुमार चौधरी अधिकार प्राप्तीके लाग हुइल थरुहट आन्दोलन विशुद्ध राजनीतिक आन्दोलन हुइल दावी कर्लै । आन्दोलनके क्रममे घटल टीकापुर घटनाके अभियोगमे २७ जाने थारुहुकनहे टमान झुठा मुद्धा लगाके राज्यसे थुनके अन्याय करल उहाँ दोहो¥याइलै । वास्तवमे राज्य थारु समुदायहे नागरिकके दर्जा डेहठ कलेसे सर्वोच्च अदालतके पूर्व न्यायधिश गिरिशचन्द लालके प्रतिवेदन सार्वजनिक करेक पर्र्ना पूर्वसभापति चौधरीके तर्क रहे ।

ओस्टके, थाकसके टेसर केन्द्रीय पार्षद पुरन चौधरी कैदीबन्दीहुकनके रिहाई ओ थरुहट माग मुद्धाके लाग सक्कु स्थानीय तहमे जनजागरण अभियान लेके जैटी रहल बटैटी आन्दोलन तार्किक निस्कर्षमे पुगाइक लाग फेरसे सडक संघर्ष करेक पर्नामे जोड डेलै ।

थाकस कैलालीके कार्यवाहक सभापति माधव चौधरी आन्दोलनहे निश्कर्षमे पुगाके किल विश्राम लेना दावी कर्लै । जेकर लाग सक्कु पक्षससे समन्वय करटी सक्कु स्थानीय तहमे जनजागरण अभियान सुरु करल उहाँ जानकारी डेलै ।

यहेबीच टीकापुर घटनाके आभियोगमे जेल चलान करलहुकनके परिवारजनहुक्रे राज्य ओ अप्ने नेताहुक्रे धोखा डेटी रहल कहटी आक्रोश व्यक्त कर्लै । घरके अभिभावक जेलमे परलपाछे अप्नेहुकनके विचल्ली हुइल दुखेसो राख्टी उहाँहुक्रे रिहाईके लाग कौनो कसर बाँकी नैराखेक् पर्नामे नेतृत्वकर्ताहुकन दवाव डेलै । साथे उहाँहुक्रे वर्तमान सरकार थारु विरोधी रहल कहटी आक्रोश समेत पोख्लै ।

थारु बाहुल क्षेत्रहे अलग्गे प्रदेश बनाइक पर्ना कहटी थरुहट आन्दोलन २०७२ सममे उत्कर्षमे पुगल रहे । उ समयमे डोसर विरोधी अखण्ड सुदूरपश्चिम आन्दोलन फेन उत्कर्षमे पुगल रहे । २०७२ भदौ ७ गते १ नाबालकसहित ८ प्रहरीके टीकापुर घटनामे ज्यान गैल । ओकर डोसर दिन भदौ ८ गते संयौ थारु समुदायके घर, पसल, एफएममे आजजनि हुइल रहे । उ घटनाके आरोपमे सांसद रेशम चौधरीसहित २७ जाने पुर्पक्षके लाग जेल चलान हुइल बाटै । मने हालसम उ मुद्धाके फैसाला नैहुइल हो । पहुरा थारु दैनिकसे