‘बालकृष्णहे छोर्ना ओ रेशमहे क¥र्याके भारी अन्याय’

धनगढी, २४ अगहन । नयाँ शक्ति पार्टी नेपालके हेड क्वाटर सदस्य एंव नेतृ हिसिला यमी शनिच्चरके रोज धनगढीमे थारु अगुवाहुकन बलाके टीकापुर घटनावारे छलफल कर्ले बाटी ।

थरुहट/थारुवान आन्दोलनके क्रममे घटल टीकापुर घटना घटाइल अभियोगमे पुर्पक्षके लाग कारागार चलान करगिल सांसद रेशम चौधरीसहित २७ जहन विरुद्ध लागल मुद्धा ओ समसमायिक राजनीतिक घटनाक्रमवारे थारु अगुवाहुकन बलाके छलफल करल रहि ।

‘उहाँ कहली–‘नयाँ शक्ति पार्टी नेपाल पहिलसे अधिकार ओ पहिचानके लाग उठल थरुहट आन्दोलनहे समर्थन करटी आइल बा । माग जायज रहे । मने आन्दोलनके क्रममे घटल घटना दुखद हो । यद्यपी राजनीतिक मुद्धा हुइलओरसे राजनीतिक रुपमे समाधान खोज्न चाही । यत्रा दिनसम (४० महिना) जेलमे कोचके राज्यसे भारी अन्याय हुइटा ।’

उहाँ नेकपाके सत्ताधारी नेताहुक्रे राजनीतिक सेटिङ मिलाके राजनीतिक घटना क्रम अन्तरगत मुद्धा खेप्टी रहल बालकृष्ण ढुंगेलहे स–सम्मान रिहाई करल दाबी कर्ली । मने जनताहुकनके अत्याधिक बहुमतसे विजय हुइल सांसद रेशम चौधरीहे राज्यसे जेलमे कोचके जनमतके अपमान करल उहाँके तर्क रहे । राज्य थारु समुदायके हक अधिकारवारे गम्भीर बा कलसे तत्काल रेशमहे प्रमाणपत्रसहित शपथ ग्रहण कराइक पर्ना फेन उहाँके कहाई रहे । नयाँ शक्तिके संयोजक डा. बाबुराम भट्टराईक गोसिनिया समेत रहल यमी थारु समुदायके अधिकारवारे अप्नेहुक्रे पहिलेसे गम्भीर रहल बटैली ।

छलफल कार्यक्रममे थारु कल्याणकारिणी सभा (थाकस) कैलालीके कार्यवाहक सभापति माधव चौधरी राज्यसे थारु समुदायहे पेलके राखल बटैलै । अधिकारके आन्दोलनहे दमन करेक लाग फेन निर्दोष थारुहुकन उप्पर झुठा मुद्धा लगाइल उहाँके दाबी बा ।

थरुहट आन्दोलनवारे प्रकाश परटी उहाँ कहलै–‘हम्रे यहाँ हुइटी रहल टमान राजनीतिक आन्दोलनके घटना क्रमहे हेरटी आइल बाटी । राज्य एक पक्षहे पोस्टी आइल बा । डोसर पक्षहे दबैटी आइल बा । हमार आन्दोलन ओराइल नैहो । कौनो न कौनो दिन उठी ।’

राष्ट्रिय जनता पार्टीके नेतृ एंव प्रदेश सभा सदस्य मालामति राना थरुहट÷मधेश आन्दोलनवारे छानविन करेक लाग सर्वोच्च अदालतके पूर्व न्यायधिश गिरिषचन्द्र लालके संयोजकत्वमे गठित छानविन टोलीसे तयार पारल प्रतिबेदन सार्वजनिक कर्नामे राज्य डराइल बटैली । सरकारसे तयार पारल प्रतिवेदन सार्वजनिक नैकर्ना कलेक् सरकारसे तानाशाही प्रवृति देखाइल टिप्पणी कर्ली ।

थारु अगुवा एंव थाकस कैलालीके पूर्व सभापति प्रभात कुमार चौधरी नयाँ संविधान थारु समुदायहे ‘कागलाई बेल पाक्यो, हर्ष न विस्मात’ जस्ते हुइल बटैलै । उहाँ प्रधानमन्त्री केपी शर्मा ओली रहलसम थारु समुदाय अधिकार नैपैना फेन जिकिर कर्लै ।

थारु यूवा ठाकुरकरिया प्रधान मुलुकके नयाँ संघीय संरचना थारु समुदायहे ‘खैबे टे खा, नैटे घिच’ हुइल बटैलै । हाल थरुहट आन्दोलन ओराइल बिल्गैलेसे फेन भिट्रे भिट्रे उकुसमुकुसके अवस्था रहलओरेसे कौनो फेन बेला विष्फोट हुई सेक्ना फेन उहाँ चेतावनी डेली ।

कार्यक्रममे थारु नागरिक समाज कैलालीके संयोजक दिलबहादुर चौधरी यदि कोई थारु समुदायके अधिकारके लाग बोलम् या लरम कहठ कलेसे उ रेशम चौधरीहे प्रमाणपत्रसहित शपथ ग्रहण कराके डेखाइक पर्ना बटैलै । नैटे सक्कु बात बकवास रहल उहाँके कहाई रहे ।

छलफलमे उपस्थित अगुवाहुक्रे नयाँ शक्ति पार्टी नेपाल थारुलगायत उत्पीडित समुदायके मुद्धावारे स्पष्ट आधिकारिक दृष्टिकोण बनाके आइक पर्ना सुझाव डेहल रहिट । कार्यक्रममे मुक्तकमैया समाजके केन्द्रीय अध्यक्ष पशुपति चौधरी, राजपाके नेता फोनिराम चौधरी, सुनिता चौधरी, वसन्ती चौधरी, केवल चौधरी, पत्रकार उन्नती चौधरी मन्तव्य राखल रही ।