‘छाइन् पह्राई, गरिबी हटाई’ कना अभियानके साथ स्टेम उत्सव मनैना
धनगढी, १२ अगहन । कैलाली जिल्लास्थित ३० ठो सामुदायिक विद्यालयके सहभागितामे धनगढीमे स्टेम उत्सव हुइना हुइल बा । युके एडके आर्थिक सहयोगमे मर्सिकोर नेपाल ओ ब्याकवार्ड एजुकेशन (बेस) के संयुक्त साझेदारीमे अगहन १४ गते शुकके रोज हुइना हुइल हो ।
बुधके रोज धनगढीमे आयोजित पत्रकार सम्मेलनमे मर्सिकार नेपालके कार्यक्रम व्यवस्थापक नविन लामिछाने सिमान्तकृत बालिकाहुकनके शिक्षामे सहयोग परियोजनाके दोसर चरण अन्तरगतके कार्यक्रम अन्तरगत स्टेम उत्सवके आयोजना करल जानकारी डेलै ।
उहाँके अनुसार परियोजना लागु हुइल जिल्लाके धनगढी उपमहानगरपालिका, गौरीगंगा नगरपालिका, घोडाघोडी नगरपालिका, टीकापुर नगरपालिका, बर्दगोरिया गाउँपालिका ओ कैलारी गाउँपालिकास्थित ३० ठो विद्यालयके सहभागिता हुइना हुइल बा । ‘छाइन् पह्राई, गरिबी हटाई’ कना अभियानके साथ हुइटी रहल उत्सवमे ६ सय विद्यार्थीहुकनके सहभागिताके टमान अतिरिक्त क्रियाकलाप हुइना फेन जनागिल बा ।
ओस्टके कार्यक्रममे बालिका तथा अन्य सरोकारवालाहुक्रे शिक्षण सिकाई, उद्यमशिलता ओ जीवन उपयोगी सीपके बारेमे आपन जानक सीप प्रर्दशन कर्ना हुइल बाटै । कलेसे स्थानीय तथा राष्ट्रिय रोल मोडल व्यक्तिहुक्रे आपन प्रेरक जीवनके अनुभव सटासाट कर्ना कार्यक्रम रहल बा ।
कार्यक्रममे कमलरी मुक्तिके अभियान्ता एंव ‘फ्रिडम फ्रम फेयर अवार्ड २०१८’ से सम्मानित उर्मिला चौधरीसे आपन अुनभव सटासाट कर्ना कार्यक्रमम तय हुइल कार्यक्रम व्यवस्थापक छामिछाने बटैलै । थारु समुदायमे रहल कमलरी प्रथा उन्मुलनमे योगदान पुगाइल कहटी उर्मिलाहे नेदरल्यान्डसके रुसभेल्ट फाउन्डेनस उ अवार्डसे सम्मान करल रहे ।
