पत्रकारके भौतिक तथा पेशागत सुरक्षाके लाग संचारगृह संवेदनशील हुइ पर्ना
धनगढी, ९ अगहन । पत्रकारके भौतिक तथा पेशागत सुरक्षाके लाग संचारगृह संवेदनशील हुइ पर्नामे जोड डेहल बा ।
शनिच्चरके रोज धनगढीमे क्रियाशिल पत्रकार महिला धनगढी कैलालीसे आयोजित पत्रकार महिलाहुक्रनके सुरक्षा विषयक सन्डे क्लब कार्यक्रमके सहभागीहुक्रे संचारगृह संवेदनशिल हुइ पर्ना आवश्यक रहल बटाइल रहिट ।
अन्नपूर्ण दैनिक सुदूरपश्चिम प्रदेशके व्यूरोचिफ शिवराज भट्ट पत्रकार महिला लगायत सक्कु पत्रकारहुक्रनके भौतिक तथा पेशागत सुरक्षाके लाग संचारगृह संवेदनशील हुई पर्ना औल्याइलै । यकर साथे उहाँ पत्रकार स्वंम फेन आपन सुरक्षाप्रति सचेत हुइना आवश्यक रहल बटैलै ।
कार्यक्रममे पत्रकार महासंघ कैलाली शाखाके कोषाध्यक्ष हिमाल जोशी पत्रकार महिलाहुक्रनके पेशागत सुरक्षाके लाग तमान मेरिक क्षमता अभिवृद्धिके तालिमके आवश्यकता रहल बटैलै ।
कार्यक्रममे टमान मिडियामे कार्यरत पत्रकार महिलाहुक्रे पत्रकारिता क्षेत्र ओर फेन महिलाहुक्रे सुरक्षित नाइ रहल बटाइल रहिट । उहाँहुक्रे पत्रकार महिला हुइलक कारण फेन समाज नाइ मजा दृष्टिकोणसे हेर्ना, रिपोर्टिङ लगायत अन्य ठाउँमे जाइबर फेन अनेक समस्या रहल बटाइल रहिट ।
कार्यक्रममे तमान मिडियामे कार्यरत पत्रकारह’क्रनके सहभागिता रहल रहे । कार्यक्रममे क्रियाशिल पत्रकार महिला कैलाली अध्यक्ष उन्नती चौधरी सहजीकरण करल रही
