डोटीमे महिला हिंसाके घटनामे कमी
डोटी, २ अगहन । डोटीमे महिलाउपर हुइना हिंसाके घटनामे कमी आइल डेखगैल बा । जिल्ला प्रहरी कार्यालय डोटीके अभिलेख अनुसार बिगत तीन बरसके तथ्यांकमे महिलाउपर हुइना हिंसाके घटनामे कमी आइल पागिल हो ।
आर्थिक बरस ०७२/७३ मे जिल्लामे लैंगिक हिंसा सम्वन्धी ४४ घटना हुइल रहे । आर्थिक बरस ०७३/७४ मे लैंगिक हिंसाके घटना २५ हुइल रहे । गैल आर्थिक बरसमे लैंगिक हिंसा सम्वन्धी १३ घटना किल हुइल जिल्ला प्रहरी कार्यालय डोटीके सूचना अधिकारी प्रहरी नायव उपरीक्षक लालवहादुर धामी जानकारी डेलै ।
धामीके अनुसार चालु आर्थिक बरसके पहिल चार महिनामे लैंगिक हिंसा सम्बन्धी दुईठो घटना दर्ता हुइल बावै । ओस्टके, महिलाउपर हुइना घरेलु हिंसामे फेन कमी आइल डेखगैल बा । ०७२/७३ मे ७७ घरेलु हिंसाके घटना हुइल रहे कलेसे ०७३/७४ मे ४५ घटना हुइल रहे । आर्थिक बरस ०७४/७५ मे ३७ ठो घरेलु हिंसाके घटना हुइल रहे ।
चालु आर्थिक बरसके पहिल चौमासिकमे घरेलु हिंसा सम्वन्धी चार घटना दर्ता हुइल बावै । ‘महिलाउपर हुइना हिंसाके घटना ढिउर जैसिन मदिराके कारण हुइना करठ्’ प्रहरी नायव उपरीक्षक धामी कहलै ‘तमान निकाय ओ प्रहरी अपनहे फेन टोलटोलमे मदिराबिरुद्धके सचेतनामूलक अभियान सञ्चालन करल कारण यी मेरके घटनामे कमी आइल हुइ सेकी ।’
उहाँ डोटीमे हुइना अधिकांश घटनाके जरिय मदिरा नै रहल डेखगैल ओरसे मदिरा नियन्त्रण करक लाग सक्कुहुनके पहल हुइ पर्ना बटैलै । अनौपचारिक क्षेत्र सेवा केन्द्र (ईन्सेक) से मानवअधिकार वर्ष पुस्तक २०१९ के पूर्व समीक्षाके लाग आयोजना करल एक कार्यक्रममे प्रहरी नायव उपरीक्षकसे २०७२ साल सावनसे २०७५ कात्तिकसम ३१ जने आत्महत्या करल बटैलै ।
उहाँ कहलै ‘चालु आर्थिक बरसके पहिल चौमासिकमे किल चार जने आत्महत्या करले बाटै, प्रारम्भिक आँकडा हेरेबर आत्महत्याके संख्या गैल बरसके तुलनामे ढिउर हुइना डेखजाइठ् ।’ गत आर्थिक बरसमे गरझुलके आठ ओ बिष सेवन कैके दुई सहित १० जने आत्महत्या करल रहिट । यी बरस आत्महत्या करुइयामे दुई जने गरझुलके ओ दुई जने बिष सेवन कैके आत्महत्या करल बाटै ।
ओस्टके, चालु आर्थिक बरसके पहिल चौमासिकमे जवरजस्ती करणीके चार मुद्धा दर्ता हुइल बावै । जवरजस्ती करणी उद्योगमे दुई घटना दर्ता हुइल बावै । यी अवधिमे कर्तव्य ज्यानमे एक मुद्धा दर्ता हुइल बा । यी अवधीमे १४ जने हेराइलमे आठ जने आभिन फेला नाइ परल प्रहरी नायव उपरीक्षक धामी जानकारी डेलै ।
