निष्ट एलपिएल हिमालयन ह्वाइटहाउस ओ लिटिल बुद्ध सेमी फाईनलमे

धनगढी, २ अगहन । धनगढीमे जारी तिसरा निष्ट कलेज लिटिल फ्लावर प्रिमियर लिगमे काठमाडौँके हिमालयन ह्वाइट हाउस स्कुल ओ कञ्चनपुरके लिटिल बुद्ध सेमी फाईनलमे प्रवेश करले बावै ।

अट्वारके खेलमे जित निकरटी दुनु टिम अन्तिम ४ मे स्थान सुरक्षित बनाइल हो । अट्वारके हुइल पहिल खेलमे लिटिल बुद्ध एकेडेमीसे मोक्षदा स्कुल काठमाडौँउपर २ रनके जित निकारल रहे । टस हारके व्याटिङके निम्तो पाइल लिटिल बुद्ध एकेडेमी महेन्द्रनगरसे निर्धारित २० ओभरमे ७ विकेट गुमैटी १ सय ७ रन बनाइल रहे ।

ओकर लाग ब्याटिङमे रोशन साउद ओ शुशिल खड्का ४६÷४६ रन बनाइल रहिट कलेसे ओपनर ब्याट्सम्यान हेमन्त कार्की ३०, नरायण जोशी १८ ओ हेमन्त धामी १६ रन बनाइल रहिट । बलिङ ओर मोक्षदा स्कुल काठमाडाँैके सुबोध प्रशाद ढुङेल ३, बिपिन खत्री ओ रोसन पुलामी मगर समान १÷१ विकेट लेहल रहिट ।

१ सय ७९ रनके लक्ष्य पछ्याइटी जवाफी ब्याटिङ करल मोक्षदा स्कुल काठमाडौ निर्धारित २० ओभरमे ८ विकेट गुमैटी ८१ रन किल बनाइ सेकल । ओकर लाग ब्याटिङमे सन्दिप बिष्ट सर्वाधिक ३४, रोशन पुलामी मगर अविजित २५ रन बनैलेसे फेन टिमहे जित भर डेहुवाइ नाइ सेकल ।

बलिङओर लिटिल बुद्धके विवेक यादव ओ रोचक ऐर समान २÷२, हेमन्त धामी ओ हेमन्त कार्की समान १÷१ विकेट लेहल रहिट । लिटिल बुद्धके हेमन्त कार्की म्यान अफ द म्याच हुइलै । ओस्टके अट्वारके सम्पन्न लिग चरणके अन्तिम खेलमे हिमालयन ह्वाईट हाउस स्कुल काठमाडौं कैलाली मोडल स्कुल उपर ११० रनके फराकिलो जित निकारल रहे ।

उत्कृष्ट ब्याटिङ ओ बलिङ करटी फराकिलो जित निकारल हिमालयन सेमिफाईनल प्रवेश करले बा कलेसे पराजित हुइल कैलाली मोडल प्रतियोगितासे बाहल हुइल बा । टस जितके पहिले ब्याटिङ करल हिमालयन ह्वाईट हाउस २० ओभरमे ६ विकेट गुमैटी १७९ रन बनाइल रहे ।

हिमालयनके लाग ब्याटिङमे अंकित सुवेदी ४३ बलमे १० चौका ओ २ छ्क्का सहित सर्वाधिक ७६, फ्रिदोस अन्सारी अविजित ३२, अमित यादव १६ तथा रमेश भट्ट ओ सन्जय श्रेष्ठ समान १३÷१३ रनके योगदान डेलै । बलिङ ओर कैलाली मोडलके कैलाश खत्री ३ तथा अजय बिष्ट ओ सुबोध ऐर समान १÷१ विकेट लेहल रहिट ।

हिमालयनसे जितके लाग डेहल १८० रनके लक्ष्य पछ्याइटी जवाफी ब्याटिङ करल कैलाली मोडलसे निर्धारित २० ओभरमे ९ विकेट गुमैटी ६९ रन बनाइ सेकल रहे । कैलाली मोडलके लाग ब्याटिङमे शुवास ऐर किल दोहरो अङकके स्कोर बनाइ सेकल रहिट ।

सुबोध ऐर ११ रनके योगदान डेलेसे फेन अन्य ब्याट्सम्यान अपेक्षित ब्याटिङ प्रदर्शन करे नाइ सेक्लै । हिमालयनके फ्रिदोस अन्सारी, अमृत सिंह ओ सुशान्त सिंह समान २÷२ विकेट लेहल रहिट । हिमालयनके अंकीत सुवेदी म्यान अफ द म्याच हुइलै ।

यिहे बिच प्रतियोगिता अन्तर्गत लिग चरणके समीकरण पुरा हुइल बा । लिग चरणमे सहभागी समुह बिजेता बन्टी सिद्धार्थ शिशु सदन कैलाली, लिटिल फ्लावर स्कुल धनगढी, लिटिल बुद्ध एकेडेमी कन्चनपुर ओ हिमालयन ह्वाईट हाउस सेमिफाइनल प्रवेश करले बाटै ।