सुदुरपश्चिमके सरकारी स्वास्थ्यकर्मीहे निजीमे काम कैना प्रतिवन्ध
धनगढी, ३ अगहन । सुदूरपश्चिमके प्रादेशिक सरकारसे सरकारी स्वास्थ्यकर्मीहे निजी अस्पताल ओ क्लिनिकमे काम कैना प्रतिवन्ध लगैले बा ।
प्रदेश स्वास्थ्य निर्देशनालयसे प्रदेश मातहातमे रहल अस्पताल, प्राथमिक स्वास्थ्य केन्द्र ओ स्वास्थ्य चौकीहे निर्णय कार्यान्वयन कैना परिपत्र समेत करसेकल बा । निर्देशनालयके स्वास्थ्य निर्देशक डाक्टर गुणराज अवस्थीसे हस्ताक्षरित पत्रमे सरकारी डाक्टर, नर्स तथा स्वास्थ्यकर्मीहे कार्यालय समयमे निजी अस्पताल ओ क्लिनिकमे काम नाइ कैना निर्देशन डेहल हो ।
उहाँ स्वास्थ्यकर्मीहुक्रनहे कार्यालय समयमे निजी क्लिनिकमे जैना गुनासो बह्रलपाछे अइसीन निर्देशन डेहल बटैलै । कार्यालय समयमे निजी अस्पताल ओ क्लिनिकमे काम करल पाइलमे कारबाही हुइना पत्रमे उल्लेख बा ।
निर्देशनालयसे प्रदेशके उपक्षेत्रीय अस्पताल डडेल्धुरा, सेती अञ्चल अस्पताल धनगढी, महाकाली अञ्चल अस्पताल महेन्द्रनगर, प्रदेशभित्तरके सक्कु जिल्ला अस्पताल, टीकापुर, जोगबुढा, गोकुलेश्वर, मालाखेती अस्पताल, प्राथमिक स्वास्थ्य केन्द्र ओ स्वास्थ्य चौकीहे परिपत्र करसेकल जनाइल बा ।
