कैलारी गाउँपालिकामे सयपत्री फुलासे सडक सुहावन
धनगढी, २० कार्तिक । कैलारी गाउँपालिका वडा नं. ३ दख्खिन भर्रीके डगरा धकमक्क फुलल् रंगीबिरंगी फुलासे सुहावन बनल बा ।
ग्रिन ओ स्मार्ट कैलारी गाउँपालिका बनैना अभियान अन्र्तगत भड्रीके स्थानीय ओ जनप्रतिनिधीहुक्रनके अगुवाइमे डगराके आँजरपाँजर लगाइल फुला धकमक्क फुलके डगरा सुहावन डेखजैनाके साथे गाउँके सुन्दरता थपल हो ।
हुलाकी रोडठनसे लेके उत्तर डेढसय दुइसय मिटर दुरीमे लगाइल उ फुलासे गाउँक सुन्दरता बह्रल हो । डगराके आँजरपाँजर गेन्डा, घुनेसर लगायत लगाइल फुला अब्बे धकमक्क फुलल्् बा ।
डगरा आँजरपाँजर फुलल् फुलासे गाउँघरके सुन्दरता थपल स्थानीय रामकुमारी बटैली । वडा नं. ३ के वडा अध्यक्ष कैलाश कुश्मी गाउँपालिकाहे ग्रीन ओ स्मार्ट गाउँपालिका बनैना उद्देश्यसे डगराके आँजरपाँजर फुला सहित तमान प्रजातिके रुखविरुवाके टेलुवा लगाइल बटैलै ।
अध्यक्ष कुश्मी उ अभियान अन्र्तगत भर्री गाउँमे १८५ ठोसम अशोक रुखुवाके टेलुवा लगाइल बटैलै । साथे उ टेलुवाहे गाइगोरुनसे बचाइक लाग तारबार समेत करल जनैलै । यरक साथे अध्यक्ष कुश्मी गाउँघरहे सफा सुग्घर राखक लाग हरेक अठ्वार गाउँघरके डगरा सरसफाई करटी आइल बटैलै ।
‘स्वास्थ्य, शिक्षा, रोजगार, कृषि, पर्यटन तथा भौतिक पूर्वाधारके सृजना, ग्रिन ओ स्मार्ट कैलारी गाउँपालिकाके परिकल्पना’ मूल नारा सहित गाउँपालिकाहे ग्रिन ओ स्मार्ट बनैना लक्ष्य रख्ले बा ।
