दुइ बरस भित्रे कैलाली कञ्चनपुरहे पर्यटकीय क्षेत्रके रुपमे चिन्हैना : थापा
धनगढी, १३ कार्तिक । जिल्ला समन्वय समिति कैलालीके प्रमुख सुर्यबहादुर थापा दुइ बरस भित्रे कैलाली कञ्चनपुरहे पर्यटकीय क्षेत्रके रुपमे चिन्हैना बटैले बाटै ।
सोम्मारके रोज धनगढीके पत्रकारहुक्रनसे डस्या डेवारी तथा छठ टिहुवारके अवसरमे हुइल शुभकामना अदानप्रदान कार्यक्रममे प्रमुख थापा ओइसीन बटाइल हुइट ।
कैलाली, कञ्चनपुर लगायत सुदूरपश्चिम प्रदेशमे पर्यटकीय सम्भावना बोकल ढिउर क्षेत्र रहल ओरसे प्रमुख थापा पर्यटकीय क्षेत्रके प्रचार प्रसार तथा प्रवद्र्धन कैके आन्तरिक तथा बाह्य पर्यटकसे सम्वृद्ध प्रदेश समेत बनैना लक्ष्य रहल बटैलै ।
कैलालीके धार्मिक तथा पर्यटकीय क्षेत्रहे पहिचान कैके कैलाली जिल्लाहे पर्यटकीय जिल्लाके रुपमे चिन्हैना अभियान चालल् बटैटी पर्यटन क्षेत्रसे रोजगारी सृजना कैके वेरोजगार युवाहुक्रनहे रोजगार बनैना समेत प्रमुख थापाके लक्ष्य रहल बटैलै ।
ओस्टके शिक्षा, स्वास्थ्य क्षेत्रमे समेत यहाँके बालबालिका तथा विद्यार्थीनहे पहुँच पुगैना समेत लक्ष्य लेहल प्रमुख थापा बटैलै । कार्यक्रममे वरिष्ठ पत्रकार मनमोहन स्वाँर, चित्राङ्ग थापा, नेपाल पत्रकार महासंघके प्रदेश अध्यक्ष अर्जुन शाह, कैलाली अध्यक्ष जगत साउद, अनुमोदन दैनिकके प्रकाश शाह, धनगढी पोष्ट दैनिकके सम्पादक कर्ण शाह लगायत शुभकामना मनतब्य राखल रहिट ।
