हिरगर बगालसे डशिया डेवारीके शुभकामना
धनगढी, २६ कुँवार । हिरगर साहित्यिक बगालसे डशिया डेवारीके शुभकामना आदानप्रदान करगिल बा ।
हिरगरके नियमित साहित्यिक श्रृङखलाके ५२औं भाग अन्र्तगत डसिया ओ डेवारीके शुभकामना आदान प्रदान करगिल हो । हिरगर साहित्यिक बगालके अध्यक्ष तथा यूनियन लाइफ इन्स्योरेन्स कम्पनी धनगढीके शाखा अधिकृत हिरालाल सत्गौंवा डसिया ओ डेवारी टडकभडकके साथ नै मनाके आपन क्षमता शक्ति अनुसारके मनाइ परना बाट बत्वाइल रहिट । साथे डसिया डेवारीमे लराइ झगरा ओ जुवा, तास खेल्के आपन ओ आपन घरपरिवारहे विचल्लीमे नै परिट कना सन्देश डेहल रहिट ।
कार्यक्रममे युवा अभियन्ता ठाकुर प्रसाद करियाप्रधान युवा देशके कर्णधार हुइलक ओरसे अब्बाके युवा आपन खाली समय जुवा तास नै खेल्के समाजसेवा तथा सामाजिक कार्यमे संलग्न होके खाली समयहे सदुपयोग कैना बात बत्वाइल रहिट ।
ओस्टके कार्यक्रममे सिर्जना चौधरी डसिया लच्क्याइल ओरसे सखिया नाच नाचेबेर गैना गीत गाके कार्यक्रमहे चैनार परले रहिट । साथे चित्रकार मनिष चौधरी, गायिका गौरी चौधरी, साहित्यकार सागर कुश्मी, तुलाराम सनम, दुर्जनकुमार चौधरी, प्रेमलाल चौधरीलगायत साहित्यकारहुकनके उपस्थित रहल रहे ।
कार्यक्रममे एक आपसमे शुभकामना आदान प्रदान करटी हिरगर डटकमहे कैसिक आगे लैजाइ सेकजाइ कना विषयमे समेत छलफल करगील रहे ।
