अट्वारी ओ तीजके अवसरमे फुटवल प्रतियोगिता
हसुलिया, २१ भदौ । थारु समुदायके विशेष टिहुवार अट्वारी ओ हिन्दु नारीहुक्रनके पर्व हरितालिका तीजके अवसर पारके कैलारी वडा नं. ४ के गाउँमे २१औं महिला तथा पुरुष फुटवल प्रतियोगिता सुरु हुइल बा ।
‘स्वास्थ्यके लाग खेलकुद, राष्ट्रके लाग खेलकुद’ कना मूल नारा सहित आयोजित प्रतियोगिताके वडा नं. ४ के वडा अध्यक्ष भीमराम चौधरी उद्घाटन करल रहिट । उहाँ ब्यानर बाचनके साथे इम्पायरहे बल हस्तान्तरण कैके प्रतियोगिताके उद्घाटन करल रहिट । कार्यक्रमके बर्का पहुना समेत रहल वडा अध्यक्ष चौधरी थारु समुदायके अट्वारी टिहुवार तथा गैरथारु समुदायके तीजके अवसरमे आयोजित प्रतियोगितासे समुदायमे सदभाव कायम कैना विश्वास व्यक्त करल रहिट ।
प्रतियोगिताके उद्घाटन खेलमे कैलारी स्मार्ट क्लब बी टीम ओ धनगढी युथ क्लब बीच हुइल रहे ।
कार्यक्रमके उद्घाटन सत्रमे क्लबके सदस्य भीम तिरुवा स्वागत मनतब्य राखल रहिट । क्बलके अध्यक्ष बतासु चौधरीके घरगोसियाइमे हुइल कार्यक्रमके सञ्चालन कोषाध्यक्ष वृक्ष चौधरी करले रहिट ।
श्री युवा सुन्दर शक्ति क्बल कैलारी गाउँपालिका वडा नं. ४ के गाउँ आयोजनामे हुइटी रहल प्रतियोगिताके प्रयोजक श्री डिके इन्डष्ट्रिज प्रालि भितरीया, सहप्रयोजक गोर्खा ब्रेवरी प्रालि, विष्णु सप्लायर्स रहल बा । प्रतियोगितामे २४ ठो पुरुष फुटबल प्रतियोगी टीम रहल आयोजक जनैले बा ।
